Skip to main content

 

ပြည်ထောင်စုသမ္မတမြန်မာနိုင်ငံတော်

 

ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး တတိယနေ့

 

အစည်းအဝေးမှတ်တမ်းအကျဉ်းချုပ်

 

(၂၀၁၉ ခုနှစ်၊ ဇန်နဝါရီလ ၂၃ ရက်)

 

၁။       ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး တတိယနေ့ကို ၂၀၁၉  ခုနှစ်၊ ဇန်နဝါရီလ ၂၃ ရက်နေ့ နံနက် ၁၀ နာရီအချိန်တွင် စတင်ကျင်းပပြီး တက်ရောက်ခွင့်ရှိသူ လွှတ်တော် ကိုယ်စားလှယ်( ၄၃၃ )ဦးအနက် ( ၃၈၃ )ဦး တက်ရောက်သည်။

၂။       လွှတ်တော်အစည်းအဝေးတွင် ပြုလုပ်ခဲ့သည့် ဆောင်ရွက်ချက်များမှာ အောက်ပါအတိုင်း ဖြစ်ပါသည်-

(က)   ကြယ်ပွင့်ပြမေးခွန်း(၆)ခုမေးမြန်းဖြေကြားခြင်း

(၁)    ဦးသန့်ဇင်ထွန်း၊ ဒက္ခိဏသီရိမဲဆန္ဒနယ်က မေးမြန်းသော  လယ်ယာမြေ      ထောက်ပံ့ကြေး နည်းပါးစွာရရှိခဲ့သူများအတွက် တန်ဖိုးနည်းအိမ်ရာ မြေကွက်များ ဖော်ထုတ်ရောင်းချပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ နေပြည်တော် ကောင်စီဝင် ဦးညီထွန်းက နေပြည်တော်စည်ပင်သာယာရေးကော်မတီမှ အိမ်ရာ စီမံကိန်းများ၊ မြေကွက်စီမံကိန်းများ ဖော်ဆောင်ချိန်တွင် ဆောင်ရွက်ပေးနိုင်ရေး အတွက် မှတ်တမ်းတင်ထားရှိပါကြောင်းနှင့် စီမံကိန်းများဖော်ဆောင်ရန် စီစဉ် နေပြီ ဖြစ်ပါသဖြင့် အမှန်တကယ်နေထိုင်မည့်မိသားစုများနှင့် အမှန်တကယ်နစ်နာပြီး အခက်အခဲရှိသော မိသားစုများကို ဦးစားပေးနေရာ ချထားပေးမည်ဖြစ်ပါကြောင်း ပြန်လည်ဖြေကြားခဲ့သည်။

(၂)    ဦးသိန်းထွန်း၊ ကျောင်းကုန်းမဲဆန္ဒနယ်က မေးမြန်းသော ကျောင်းကုန်းမြို့နယ်၊ ကညင်ကောက်- ဒါးက လျှပ်စစ်မြစ်ရေတင်စီမံကိန်းအား အပြီးဖျက်သိမ်း၍ လယ်ယာ မြေများ ပြန်လည်ဖော်ထုတ်ပြီး မူလတောင်သူများအား ပြန်လည်ချထားပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ဒုတိယဝန်ကြီး ဦးလှကျော်က စီမံကိန်းမှရယူအသုံးပြုခဲ့သည့် မူလ လယ်မြေများနှင့် အနီးစပ်ဆုံးမြေညှိပြုပြင်၍ ၂၀၁၉-၂၀၂၀ ဘဏ္ဍာရေးနှစ်တွင် မူလပိုင်ရှင်တောင်သူများထံသို့ ပြန်လည်ပေးအပ်နိုင်ရေး ဆောင်ရွက်ပေးသွားမည် ဖြစ်ပါကြောင်း ပြန်လည်ဖြေကြားခဲ့သည်။

(၃)    ဒေါက်တာဦးအေးကြူ၊ လပွတ္တာမဲဆန္ဒနယ်က မေးမြန်းသော လပွတ္တာမြို့နယ်၊ ဆင်ခြေရာကျေးရွာအုပ်စုနှင့် သင်္ကန်းကြီးကျေးရွာအုပ်စုတွင်ရှိသော သာပေါင်း စက္ကူစက်ရုံမှ သိမ်းဆည်းထားသောသင်္ကန်းလေး ဆားကွင်းအား ၂၉-၁၂-၂၀၁၅ ရက်နေ့တွင် အထွေထွေအုပ်ချုပ်ရေးဦးစီးဌာနသို့ ပြန်လည်အပ်နှံခဲ့ရာ မူလပိုင်ရှင် လယ်သမားများက မိမိတို့လယ်ယာမြေများကို တရားဝင်ပုံစံ(၇)နှင့်အညီ ရရှိအောင် သက်ဆိုင်ရာမှ ဆောင်ရွက်ပေးရန် အစီအစဉ်ရှိ၊မရှိ မေးခွန်းနှင့် စပ်လျဉ်း၍ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးလှကျော်က ဧရာဝတီတိုင်းဒေသကြီးအစိုးရအဖွဲ့၏ အစီအမံဖြင့် လယ်ယာမြေစီမံခန့်ခွဲမှု အဆင့် ဆင့်သို့ တင်ပြဆောင်ရွက်လျက်ရှိပါကြောင်းနှင့် လ/န(၃၉) ပယ်ဖျက်ခွင့်အမိန့် ရရှိပါက မူလလက်ငုတ် တောင်သူများထံသို့ လယ်ယာမြေ လုပ်ပိုင်ခွင့်ပြု လက်မှတ် ပုံစံ(၇)များ ထုတ်ပေးနိုင်ရေးကို လယ်ယာမြေဥပဒေ၊ နည်းဥပဒေ၊ လုပ်ထုံးလုပ်နည်း၊ ညွှန်ကြားချက်များနှင့်အညီ ဆောင်ရွက်ပေးသွားမည်ဖြစ်ပါကြောင်း ဧရာဝတီတိုင်း ဒေသကြီးအစိုးရအဖွဲ့၏ဖြေကြားချက်နှင့်အတူ ပြန်လည်ဖြေကြားခဲ့သည်။

(၄)    ဦးဝမ်းလှ၊ နန်းယွန်းမဲဆန္ဒနယ်က မေးမြန်းသော နာဂကိုယ်ပိုင်အုပ်ချုပ်ခွင့်ရဒေသ၊ နန်းယွန်းမြို့နယ်၊ ယူဝရပ်ကွက်ရှိ မူလတန်းကျောင်းဝန်းဧရိယာအား သိုင်ယောင်း ချောင်းရေတိုက်စားခြင်းမှ ကာကွယ်နိုင်ရန်အတွက် ကမ်းထိန်းနံရံ တည်ဆောက် ပေးရန်အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပို့ဆောင်ရေးနှင့်ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုးက ၂၀၁၉-၂၀၂၀ ဘဏ္ဍာနှစ် စစ်ကိုင်းတိုင်း ဒေသကြီးအစိုးရအဖွဲ့၏ ငွေလုံးငွေရင်းရန်ပုံငွေစာရင်းတွင် ထည့်သွင်းတင်ပြ တောင်းခံပြီး ရန်ပုံငွေရရှိမှုအပေါ်မူတည်၍ လုပ်ငန်းများဆောင်ရွက်ပေးသွားမည် ဖြစ်ပါကြောင်း စစ်ကိုင်းတိုင်းဒေသကြီးအစိုးရအဖွဲ့ကိုယ်စား ပြန်လည်ဖြေကြားခဲ့ သည်။

(၅)    ဦးအောင်စိန်၊ ထားဝယ်မဲဆန္ဒနယ်က မေးမြန်းသော ထားဝယ်-မြိတ် ရထားလမ်း ဖောက်လုပ်ရေး စီမံကိန်းတွင် ပါဝင်သွားသော မြေယာများအတွက် မြေယာလျော်ကြေး ပေးရန် သို့မဟုတ် ရထားလမ်းအဖြစ် ဆက်လက်အသုံးမပြုသည့် ထိုမြေယာများကို မူလလက်ရှိထားလုပ်ကိုင်ခဲ့သည့် တောင်သူလယ်သမားများလက်သို့  ပြန်လည်ပေး အပ်ရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ ပို့ဆောင်ရေးနှင့်ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုးက မြန်မာ့မီးရထားအနေဖြင့် ထားဝယ်-မြိတ်ရထားလမ်း ဖော်လုပ်ရေးစီမံကိန်းကို ဆက်လက်အကောင်အထည်ဖော်ဆောင် ရွက်ရန်မရှိသဖြင့် လက်ရှိအနေအထားအတိုင်း မူလပိုင်ရှင်များထံ ပြန်လည်ပေးအပ် သွားမည်ဖြစ်ပါကြောင်း ပြန်လည်ဖြေကြားခဲ့သည်။

(၆)    ဦးအောင်ကျော်ကျော်ဦး၊ လှိုင်မဲဆန္ဒနယ်က မေးမြန်းသော ရန်ကုန်ဆိပ်ကမ်း-သင်္ဘောဆိုက်ကပ်မှု ကုန်ကျစရိတ်မြင့်မားနေ၍ ပို့ကုန်မြှင့်တင်ရန် အခက်အခဲဖြစ် ပေါ်ခြင်း၊ သွင်းကုန်များ ဈေးကြီးမြင့်စေခြင်းတို့ ကြုံတွေ့နေရသဖြင့် သင်္ဘောဆိုက် ကပ်မှု ကုန်ကျစရိတ်လျော့ချပေးရန် အစီအစဉ်ရှိ၊မရှိ မေးခွန်းနှင့်စပ်လျဉ်း၍ ပို့ဆောင်ရေးနှင့် ဆက်သွယ်ရေး ဝန်ကြီးဌာနဒုတိယဝန်ကြီး ဦးကျော်မျိုးက နိုင်ငံတော် စီးပွားရေးအဖွဲ့အစည်းတစ်ခုဖြစ်သည့် မြန်မာ့ဆိပ်ကမ်းအာဏာပိုင်အနေဖြင့် နိုင်ငံတော် ဝင်ငွေကို တိုးမြှင့်ရှာဖွေရန် တာဝန်ရှိသော်လည်း တစ်ဖက်မှာလည်း ပို့ကုန်/သွင်းကုန် လုပ်ငန်းရှင်များ၊ ဆိပ်ကမ်းလုပ်ငန်း ဆောင်ရွက်သူများ၊ သင်္ဘောလုပ်ငန်းဆောင်ရွက် သူများနှင့် စားသုံးသူဈေးကွက်အကြား မျှတမှုရှိစေရေးအတွက် အစဉ်အမြဲ  လေ့လာ ဆွေးနွေးမှုများ ဆောင်ရွက်လျက်ရှိပါကြောင်းနှင့် မိမိနိုင်ငံ၏ရေကြောင်း ကုန်စည်တင်ပို့တင်သွင်းမှုအခြေအနေကို အမြဲတစေလေ့လာသုံးသပ်ပြီး ဆိပ်ကမ်း ကုန်ကျစရိတ်များကို အခါအားလျော်စွာ သင့်တင့်မျှတသည့်နှုန်းထားများဖြင့် ပြင်ဆင် ကောက်ခံနိုင်ရန် စီစဉ်ဆောင်ရွက်သွားမည်ဖြစ်ပါကြောင်း ပြန်လည်ဖြေကြားခဲ့သည်။

(ခ)    ဥပဒေကြမ်း (၁) ခု လက်ခံရရှိကြောင်း လွှတ်တော်သို့အသိပေးခြင်း

အမျိုးသားလွှတ်တော်က ပြင်ဆင်ချက်ဖြင့် အတည်ပြု၍ ပေးပို့လာသော တံတားကြီးများ ဥပဒေကြမ်းကို လက်ခံရရှိကြောင်း လွှတ်တော်သို့ အသိပေးပြီး အဆိုပါ ဥပဒေကြမ်းနှင့် စပ်လျဉ်း၍ ပြင်ဆင်ချက်အဆို ဆွေးနွေးလိုသော လွှတ်တော်ကိုယ်စားလှယ်များက ၂၅.၁.၂၀၁၉ (သောကြာနေ့) ညနေ ၄ နာရီ နောက်ဆုံးထား၍ အမည်စာရင်း တင်သွင်း ရန်ဖြစ်သည်။

(ဂ)    အဆို (၁) ခုတင်သွင်းခြင်း

ဒေါက်တာဦးသန်းအောင်စိုး၊ မင်းလှမဲဆန္ဒနယ်က လူနှင့်တိရစ္ဆာန်များတွင် ခွေးရူးရောဂါ ဖြစ်ပွားမှု လျော့နည်းကျဆင်းရေးအတွက် ဌာနဆိုင်ရာများ၊ ပြည်တွင်းပြည်ပအဖွဲ့အစည်း များ အားလုံးပူးပေါင်းလျက် စီမံချက်ချမှတ်ရေးဆွဲပြီးဆောင်ရွက်ရန် ပြည်ထောင်စုအစိုးရ အား တိုက်တွန်းကြောင်းအဆို တင်သွင်းပြီး ဒေါက်တာဦးမင်းသိန်း၊ ရေဦးမဲဆန္ဒနယ်က ထောက်ခံခဲ့သည်။ အဆိုအား ဆက်လက်ဆွေးနွေးရန် လွှတ်တော်က ဆုံးဖြတ်ခဲ့သဖြင့် ဆွေးနွေးလိုသော လွှတ်တော်ကိုယ်စားလှယ်များက ၂၄-၁-၂၀၁၉ ရက် (ကြာသပတေးနေ့) ညနေ ၄ နာရီ နောက်ဆုံး ထား၍ အမည်စာရင်း တင်သွင်းရန်ဖြစ်သည်။

၃။       ပြည်သူ့လွှတ်တော် အစည်းအဝေးကို နံနက် ၁၁ နာရီ ၁၀ မိနစ်တွင် ရပ်နားပြီး ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး စတုတ္ထနေ့ ကျင်းပမည့်ရက်ကို ၂၅-၁-၂၀၁၉ ရက် (သောကြာနေ့) နံနက် ၁၀ နာရီ တွင် လျာထားပါသည်။