Skip to main content

 

ပြည်ထောင်စုသမ္မတမြန်မာနိုင်ငံတော်

 

ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး ပဉ္စမနေ့

 

အစည်းအဝေးမှတ်တမ်းအကျဉ်းချုပ်

 

(၂၀၁၉ ခုနှစ်၊ ဇန်နဝါရီလ ၂၈ ရက်)

၁။       ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး ပဉ္စမနေ့ကို ၂၀၁၉  ခုနှစ်၊ ဇန်နဝါရီလ ၂၈ ရက်နေ့ နံနက် ၁၀ နာရီအချိန်တွင် စတင်ကျင်းပပြီး တက်ရောက်ခွင့်ရှိသူ လွှတ်တော် ကိုယ်စားလှယ်( ၄၃၃ )ဦးအနက် ( ၃၉၆ )ဦး တက်ရောက်သည်။

 

၂။       လွှတ်တော်အစည်းအဝေးတွင် ပြုလုပ်ခဲ့သည့် ဆောင်ရွက်ချက်များမှာ အောက်ပါအတိုင်း ဖြစ်ပါသည်-

 

(က)   ကြယ်ပွင့်ပြမေးခွန်း(၇)ခုမေးမြန်းဖြေကြားခြင်း

 

(၁)    ဦးမျိုးညွန့်၊ ဟုမ္မလင်းမဲဆန္ဒနယ်က မေးမြန်းသော  ကျောင်းအပ်စကလေးများသည် ကျောင်းအပ်သောအခါ အသက်မပြည့်ပါက သို့မဟုတ် ၂ လ လိုပါက မြို့နယ် ပညာရေးမှူးလက်မှတ်လိုအပ်ခြင်း၊ ၃ လ လိုပါက ခရိုင်ပညာရေးမှူးထောက်ခံ လက်မှတ်နှင့် အပ်ရခြင်းများ၊ ကျောင်းထွက်လက်မှတ်ယူပါက မြို့နယ်ခြားပြောင်း လျှင် မြို့နယ်ပညာရေးမှူး ထောက်ခံချက်လက်မှတ် ထပ်ဆင့်ယူရခြင်းစသည့်  ဟန့်တားချက်များကို ဖြေလျှော့ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက မြို့နယ်ခြား ပြောင်း (TC)များတွင်မူ မြို့နယ်ပညာရေးမှူး၏ ထောက်ခံချက်လက်မှတ်ထပ်ဆင့် ရေးထိုးရန်မလိုတော့ပါကြောင်းနှင့် ကျောင်းအုပ်မရှိဘဲတာဝန်ခံ ကျောင်းအုပ်သာ ရှိသည့်ကျောင်းများမှ (TC)များအတွက်ကိုသာ မြို့နယ်ပညာရေးမှူး၏ ထပ်ဆင့် ထောက်ခံချက်လက်မှတ် ရယူဆောင်ရွက်ရမည်ဖြစ်ပါကြောင်း ပြန်လည်ဖြေကြား ခဲ့သည်။

 

(၂)    ဦးတင်နု(ခ)ဦးတင်နုအောင်၊ မာန်အောင်မဲဆန္ဒနယ်က မေးမြန်းသော ဝေးလံခေါင်သီ ဒေသအဖြစ် သတ်မှတ်၍ ဒေသရှားပါးစရိတ် ခံစားခွင့်ပြုထားသော မြို့နယ်များမှ တက္ကသိုလ်ဝင်တန်းအောင် ကျောင်းသား၊ ကျောင်းသူများအား အဆင့်မြင့်တက္ကသိုလ် ကောလိပ်များနှင့် အဆင့်မြင့်သင်တန်းကျောင်းသို့ တက်ရောက်ပညာသင်ကြားနိုင် ရေးအတွက် မည်ကဲ့သို့ စီမံဆောင်ရွက်ပေးနေသည်ကို သိလိုခြင်း မေးခွန်းနှင့် စပ်လျဉ်း၍ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက စစ်ကိုင်းပညာရေးတက္ကသိုလ်နှင့် ရန်ကုန်ပညာရေး တက္ကသိုလ်တို့တွင် ဝင်ခွင့်သတ် မှတ်ချက်အရည်အချင်းများနှင့် ကိုက်ညီပါက တိုင်းဒေသကြီး /ပြည်နယ်ခွဲတမ်းဖြင့် ဝင်ခွင့်ပြုပေးလျက်ရှိပြီး ရန်ကုန်တက္ကသိုလ်တွင် ဝေးလံခေါင်သီဒေသများမှ လျှောက်ထားသော ကျောင်းသား၊ ကျောင်းသူများအတွက် ဘာသာရပ်အသီးသီးတွင် Quota ကိုလက်ခံမည့်ဦးရေ၏ ၂ % ထားရှိဆောင်ရွက်ပေးလျက် ရှိပါကြောင်း ပြန်လည်ဖြေကြားခဲ့သည်။

 

(၃)    ဦးစောကျော်ဝင်းမောင်၊ ကျိုက်မရောမဲဆန္ဒနယ်က မေးမြန်းသော အခြေခံပညာ (၁၀)တန်းစာမေးပွဲရမှတ်ဖြင့် တက္ကသိုလ်ဝင်ခွင့် သတ်မှတ်ခြင်းကြောင့် အခြေခံ ပညာကလေးများ၏ လက်တွေ့ဘဝဖွံ့ဖြိုးမှုကို ထိခိုက်နေခြင်းအပေါ် ပြောင်းလဲ ဆောင်ရွက်ရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက လက်ရှိအမျိုးသားပညာရေး မဟာဗျူဟာစီမံကိန်း(၂၀၁၆-၂၀၂၁)အရ မဟာဗျူဟာစီမံကိန်းပါ လုပ်ငန်းစဉ်များ အတိုင်း ရည်မှန်းချက်ထားပြီး ဦးတည်ကြိုးပမ်း ပြုပြင်ပြောင်းလဲ အကောင် အထည်ဖော်  ဆောင်ရွက်ပေးလျက်ရှိပါကြောင်း ပြန်လည်ဖြေ ကြားခဲ့သည်။

 

(၄)    ဦးအောင်ခင်ဝင်း၊ မြိုင်မဲဆန္ဒနယ်က မေးမြန်းသော ကျောင်းသားမိဘ နာမည်ကွဲလွဲ မှုများဖြစ်ပေါ်နေရာတွင် အမည်မှန်ပြောင်းလဲ ပြင်ဆင်ခွင့်ပြုရန်အတွက် လုပ်ဆောင် ရသော လုပ်ငန်းစဉ်များ ဖြေလျော့ပေးရန်  မေးခွန်းနှင့်စပ်လျဉ်း၍ ပညာရေးဝန်ကြီး ဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက မွေးသက္ကရာဇ်များကို ပြင်ဆင်လိုပါက တက္ကသိုလ်ဝင်စာမေးပွဲ အောင်စာရင်း မထွက်မီအချိန်ထိ ပြင်ဆင်ခွင့်ပြုပြီး အောင်စာရင်းထွက်ရှိပြီးပါက ပြန်လည်ပြင်ဆင်ခွင့် မပြုတော့ပါကြောင်းနှင့် အမည်မှန်ပြောင်းလဲ ပြင်ဆင်နိုင်ရေးအတွက် သတ်မှတ်ထားသည့် အထောက်အထားများနှင့် တိုက်ဆိုင်စိစစ်ရပါသဖြင့် သတ်မှတ်အထောက်အထားများဖြင့်သာ တင်ပြ လျှောက်ထားရမည်ဖြစ်ပါကြောင်း ပြန်လည်ဖြေကြားခဲ့သည်။

 

(၅)    ဦးစတီဖန်၊ ကျိုင်းတုံမဲဆန္ဒနယ်က မေးမြန်းသော ကျိုင်းတုံမြို့နယ်၊ မိုင်းခွန်အုပ်စု အခြေခံပညာ အထက်တန်းကျောင်း(ခွဲ)တွင် (၆၀ ပေ x ၃၀ ပေ) နှစ်ထပ်ကျောင်း ဆောင်သစ် ထပ်မံဆောက်လုပ်ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက ၂၀၁၉-၂၀၂၀ ဘဏ္ဍာနှစ်၏ ငွေလုံးငွေရင်း ရန်ပုံငွေခေါင်းစဉ်အောက်မှ ဦးစားပေးအဆင့် အလိုက်ခွဲခြားသတ်မှတ်ပြီး ထည့်သွင်းလျာထားနိုင်ရေးအတွက် စိစစ်ဆောင်ရွက် သွားမည်ဖြစ်ပါကြောင်းနှင့် ရန်ပုံငွေခွင့်ပြုချက်ရရှိမှသာ ဆောင်ရွက်ပေးသွားနိုင် မည်ဖြစ်ပါကြောင်း ပြန်လည်ဖြေကြားခဲ့သည်။

 

(၆)    ဦးတင်အေး၊ မက်မန်းမဲဆန္ဒနယ်က မေးမြန်းသော မက်မန်းမြို့နယ်တွင် မြို့နယ် ကော်မရှင်အဖွဲ့ခွဲရုံး အဆောက်အဦ ဆောက်လုပ်ပေးရန်  အစီအစဉ် ရှိ၊ မရှိ မေးခွန်း နှင့်စပ်လျဉ်း၍ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းဌေးက ၂၀၁၉-၂၀၂၀ ဘဏ္ဍာနှစ်တွင် ဘဏ္ဍာငွေလျာထားတောင်းခံတင်ပြပြီးရရှိပါက ဆောက် လုပ်ပေးသွားမည်ဖြစ်ပါကြောင်း ပြန်လည်ဖြေကြားခဲ့သည်။

 

(၇)    ဦးမောင်မြင့်၊ မင်းကင်းမဲဆန္ဒနယ်က မေးမြန်းသော ပြည်ထောင်စုရွေးကောက်ပွဲ ကော်မရှင်အနေဖြင့် Right to Recall အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းဌေးက ပထမအကြိမ် ပြည်သူ့ လွှတ်တော်သက်တမ်းကာလတွင် ပြည်ထောင်စုလွှတ်တော်က မဲခွဲဆုံးဖြတ်၍ ဆိုင်းငံ့ ထားသော အဆုံးအဖြတ်သည် အတည်ဖြစ်နေဆဲဖြစ်ပါသည်။ ပြည်ထောင်စု      ရွေးကောက်ပွဲကော်မရှင်အနေဖြင့် အဆိုပါ ဥပဒေကြမ်းမူကြမ်းကို အသင့်ရေးဆွဲပြီး ဖြစ်ပါကြောင်းနှင့် ပြည်ထောင်စုလွှတ်တော်မှ ဆက်လက်လမ်းညွှန်လာပါက ယင်းလမ်းညွှန်ချက်နှင့်အညီ ဆောင်ရွက်သွားရန် အဆင်သင့်ရှိပါကြောင်း ပြန်လည် ဖြေကြားခဲ့သည်။

 

( ခ )  အစီရင်ခံစာတင်ပြခြင်း

ပြည်သူ့လွှတ်တော်၊ အစိုးရ၏အာမခံချက်များ၊ ကတိများနှင့်တာန်ခံချက်များ စိစစ်ရေး ကော်မတီက အစီရင်ခံစာ တင်ပြပြီး ယင်းအစီရင်ခံနှင့်စပ်လျဉ်း၍ ဆွေးနွေးလိုသော လွှတ်တော်ကိုယ်စားလှယ်များက ၂၉.၁.၂၀၁၉ ရက် (အင်္ဂါနေ့) ညနေ ၄ နာရီ နောက်ဆုံး ထား၍ အမည်စာရင်းတင်သွင်းရန် ဖြစ်သည်။

 

( ဂ )  အဆို(၁)ခုတင်သွင်းခြင်း

ဒေါ်ဇင်မာအောင်၊ ရန်ကင်းမဲဆန္ဒနယ်က ဒစ်ဂျစ်တယ် စာတက်မြောက်မှု (Digital Literacy Framework) မူဘောင်ရေးဆွဲချမှတ်ဆောင်ရွက်ရန် ပြည်ထောင်စုအစိုးရအား တိုက်တွန်းကြောင်းအဆို တင်သွင်းပြီး ဦးစိုင်းဦးခမ်း၊ သိန္နီမဲဆန္ဒနယ်က ထောက်ခံ ခဲ့သည်။ အဆိုအား ဆက်လက်ဆွေးနွေးရန် လွှတ်တော်က ဆုံးဖြတ်ခဲ့သဖြင့် ဆွေးနွေး လိုသော လွှတ်တော် ကိုယ်စားလှယ်များက ၂၉-၁-၂၀၁၉ (အင်္ဂါနေ့) ညနေ ၄ နာရီ နောက်ဆုံးထား၍ အမည် စာရင်း တင်သွင်းရန်ဖြစ်သည်။

 

( ဃ ) ဥပဒေကြမ်း(၁)ခုနှင့်စပ်လျဉ်း၍ လွှတ်တော်၏ အဆုံးအဖြတ်ရယူခြင်း

အမျိုးသားလွှတ်တော်က ပြင်ဆင်ချက်ဖြင့် အတည်ပြု၍ ပေးပို့လာသော တီထွင်မှု မှုပိုင်ခွင့် ဥပဒေကြမ်း တစ်ရပ်လုံးကို ပြင်ဆင်ထားသည့် အပိုဒ်၊ အပိုဒ်ခွဲအတိုင်း အတည်ပြု ကြောင်းနှင့် ၂၀၁၃ ခုနှစ်၊ ပြည်သူ့လွှတ်တော်ဆိုင်ရာ နည်းဥပဒေ ၂၀၀ အရ ဆက်လက် ဆောင်ရွက်သွားမည်ဖြစ်ကြောင်း ကြေညာခဲ့သည်။

 

၃။       ပြည်သူ့လွှတ်တော် အစည်းအဝေးကို နံနက် ၁၂ နာရီ ၃၅ မိနစ်တွင် ရပ်နားပြီး ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး ဆဋ္ဌမနေ့ ကျင်းပမည့်ရက်ကို ၃၀-၁-၂၀၁၉ ရက် (ဗုဒ္ဓဟူးနေ့) နံနက် ၁၀ နာရီ တွင် လျာထားပါသည်။