Skip to main content

 

ပြည်ထောင်စုသမ္မတမြန်မာနိုင်ငံတော်

ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး သတ္တမနေ့

အစည်းအဝေးမှတ်တမ်းအကျဉ်းချုပ်

(၂၀၁၉ ခုနှစ်၊ ဇန်နဝါရီလ ၃၁ ရက်)

၁။      ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး သတ္တမနေ့ကို ၂၀၁၉  ခုနှစ်၊ ဇန်နဝါရီလ ၃၀ ရက်နေ့ နံနက် ၁၀ နာရီအချိန်တွင် စတင်ကျင်းပပြီး တက်ရောက်ခွင့်ရှိသူ လွှတ်တော် ကိုယ်စားလှယ်( ၄၃၃ )ဦးအနက် ( ၄၁၃ )ဦး တက်ရောက်သည်။

၂။      လွှတ်တော်အစည်းအဝေးတွင် ပြုလုပ်ခဲ့သည့် ဆောင်ရွက်ချက်များမှာ အောက်ပါအတိုင်း ဖြစ်ပါ သည်-

(က)    ကြယ်ပွင့်ပြမေးခွန်း(၇)ခုမေးမြန်းဖြေကြားခြင်း

(၁)     ဒေါ်အေးအေးမူ(ခ)ဒေါ်ရှားမီး၊ ကလေးမဲဆန္ဒနယ်က မေးမြန်းသော နိုင်ငံတစ်ဝန်းတွင် ဖွင့်လှစ်ထားရှိကြသည့် နားမကြားကျောင်းများရှိ ကျောင်းသူ၊ကျောင်းသားများနှင့် ကျောင်းသို့ရောက်ရှိမလာ သော ကလေးသူငယ်များ၊ အရွယ်ရောက်ပြီးသူများ၏ ဘဝရှေ့ရေးလုံခြုံချောမွေ့စွာ ရပ်တည်နိုင်ရေးအတွက် မည်သို့စီမံဆောင်ရွက်ထား သည်ကို သိလိုခြင်း မေးခွန်းနှင့် စပ်လျဉ်း၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဦးစိုးအောင်က ဆက်စပ် ဝန်ကြီးဌာနများက စီစဉ်ပြဋ္ဌာန်း ဆောင်ရွက်လျက်ရှိပါကြောင်းနှင့် ၂၀၁၉-၂၀၂၀ ဘဏ္ဍာနှစ်တွင် မသန်စွမ်းသူများ၏ အခွင့်အရေးဥပဒေပါ လုပ်ငန်းများကို ထိရောက် အောင်မြင်စွာ အကောင်အထည်ဖော် ဆောင်ရွက်နိုင်ရန် ရန်ပုံငွေတစ်ရပ် ထူထောင် နိုင်ရေး ညှိနှိုင်းဆောင်ရွက်ထားရှိပါကြောင်း ပြန်လည်ဖြေကြားခဲ့သည်။

 (၂)    ဦးကျော်စိုး၊ ဗန်းမောက်မဲဆန္ဒနယ်က မေးမြန်းသော ဗန်းမောက်မြို့တွင် လူမှုဝန်ထမ်း ဦးစီးဌာနရုံးနှင့် စံပြမူကြိုကျောင်း ဖွင့်လှစ်နိုင်ရေးဆောင်ရွက်ပေးရန် အစီအစဉ်ရှိ၊ မရှိ မေးခွန်းနှင့် စပ်လျဉ်း၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာန ဒုတိယဝန်ကြီး ဦးစိုးအောင်က မြေနေရာရရှိပါက အနီးဆုံး ဘဏ္ဍာရေးနှစ် ငွေလုံးငွေရင်းရန်ပုံငွေတွင် ထည့်သွင်းတောင်းခံပြီး ဖွင့်လှစ်နိုင်ရေး ဆောင်ရွက်သွား မည်ဖြစ်ပါကြောင်း ပြန်လည်ဖြေကြားခဲ့သည်။

(၃)     ဦးဝမ်းလှ၊ နန်းယွန်းမဲဆန္ဒနယ်က မေးမြန်းသော နန်းယွန်းမြို့နယ်ရှိ တကား-လူလွန်းကြား(၅)ပေ Box Culvert(၂၀)စင်း တည်ဆောက်ခြင်း၊ တကား-လိန်နုတ်-တိုက်တီးလမ်းတွင် (၅)မိုင် ကျောက်ခင်းခြင်းနှင့် နမ်ဖာ-တိုက်တီး-တကား-ရှင်ဗွေ ယန်ကြား မြေသားလမ်း(၁၀)မိုင် ဖောက်လုပ်ခြင်းတို့အား မည်သည့်အချိန်တွင် ဆောင်ရွက်ပေးမည်ကို သိလိုခြင်း မေးခွန်းနှင့်စပ်လျဉ်း၍ နယ်စပ်ရေးရာဝန်ကြီး ဌာန ဒုတိယဝန်ကြီး ဗိုလ်ချုပ်သန်းထွဋ်က နယ်မြေလုံခြုံရေးနှင့် ဆောင်ရွက်နိုင် မည့် လုပ်ငန်းအခြေအနေများကို နယ်မြေကွင်းဆင်းစစ်ဆေးပြီး စစ်ကိုင်းတိုင်း ဒေသကြီးအစိုးရအဖွဲ့မှ ဦးစားပေးအလိုက် စိစစ်တင်ပြလာပါက နယ်စပ်ဒေသ ဖွံ့ဖြိုးရေး တတိယ(၅)နှစ် စီမံကိန်းတွင် ထည့်သွင်းလျာထားဆောင်ရွက်ပေးသွားမည်ဖြစ်ပါ ကြောင်း ပြန်လည်ဖြေကြားခဲ့သည်။

(၄)     ဦးအာမိုးဆီ၊ ခေါင်လန်ဖူးမဲဆန္ဒနယ်က မေးမြန်းသော ဆော့လော်မြို့နယ် နယ်စပ်မှ ခီဆီဒီကျေးရွာအထိ(၂၈)မိုင်အား မြေသားလမ်းဖောက်လုပ်ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ်သန်းထွဋ်က ကချင်ပြည်နယ်အစိုးရအဖွဲ့မှ တင်ပြလာပါက  တတိယ(၅)နှစ် စီမံကိန်းတွင် ထည့်သွင်း လျာထား ဆောင်ရွက်ပေးသွားမည်ဖြစ်ပါကြောင်း ပြန်လည်ဖြေကြားခဲ့သည်။

 (၅) ဦးခွန်သန်းထူး၊ ဆီဆိုင်မဲဆန္ဒနယ်က မေးမြန်းသော ဆီဆိုင်မြို့နယ်ရှိ တောင်ရှေ့ ကျေးရွာအုပ်စု၊ နောင်ကျောကျေးရွာအုပ်စု၊ အရှေ့ခြမ်း ရွာပေါင်း(၄၁)ရွာ အဓိက အားထားသွားလာလျက်ရှိသည့် ပုံလောင်းရွာလမ်းခွဲမှ နောင်ထော်ကျေးရွာထိ (၁၁)မိုင် (၆)ဖာလုံလမ်းအား လမ်းဧရိယာပုခုံးချဲ့ခြင်း၊ ရေနုတ်မြောင်းတူးဖော်ခြင်း၊ စံကိုက် ကတ္တရာလမ်းအဖြစ် အဆင့်မြှင့်တင်ပေးခြင်းတို့ ဆောင်ရွက်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ် သန်းထွဋ်က ရှမ်းပြည်နယ်အစိုးရအဖွဲ့မှ လိုအပ်ချက်နှင့် ဖြစ်နိုင်ခြေအပေါ်ဆန်းစစ်ပြီး ဦးစားပေးအလိုက် ရန်ပုံငွေစိစစ် ထောက်ခံတင်ပြလာပါက နယ်စပ်ဒေသဖွံ့ဖြိုးရေး၏ အနီးစပ်ဆုံး ပြည်ထောင်စုဘတ်ဂျတ်တွင်  ရန်ပုံငွေဝင်ဆံ့မှုအပေါ်မူတည်၍ တည့်သွင်း လျာထား ဆောင်ရွက်ပေးသွားမည်ဖြစ်ပါကြောင်း ပြန်လည်ဖြေကြားခဲ့သည်။

(၆)     ဦးလာမာလေး၊ ဆော့လော်မဲဆန္ဒနယ်က မေးမြန်းသော ဆော့လော်-လန်ဆယ်လမ်း ပေါ်ရှိ(၁၄၀)ပေ (၂)ထပ် သံပေါင်ဘေလီတံတား (မော်ဝေကျေးရွာနှင့် ထန်ဒန်ကျေးရွာ ကြားရှိ ထန်ဒန်တံတား)အား တည်ဆောက်ပြီးစီးခဲ့သည့် အချိန်မှ (၈)လကျော်ခန့်၌ ပျက်စီးခဲ့သည့်အတွက် တံတားတည်ဆောက်ခဲ့သည့် ကုမ္ပဏီနှင့်တံတား တည်ဆောက် ပြီးစီးမှုအခြေအနေ၊ တံတားအရည်အသွေးစစ်ဆေးခဲ့သည့်အဖွဲ့များအား နိုင်ငံတော် အစိုးရအနေဖြင့် ပြင်းထန်စွာ အရေးယူဆောင်ရွက်ရန်  အစီအစဉ် ရှိ၊ မရှိ မေးခွန်း နှင့်စပ်လျဉ်း၍ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ်သန်းထွဋ်က အရည်အသွေးမပြည့်မီမှုကြောင့် ပျက်စီးခဲ့ခြင်းမဟုတ်ဘဲ သဘာဝဘေးအန္တရာယ် ကြောင့်သာ ချို့ယွင်းပျက်စီးခဲ့ခြင်း၊ တည်ဆောက်ခဲ့သည့် ကုမ္ပဏီအနေဖြင့်လည်း စာချုပ်စည်းကမ်းနှင့်အညီ ပြန်လည်ပြင်ဆင်ဆောင်ရွက်ခဲ့ပြီးဖြစ်ခြင်း၊ အရည်အသွေး စစ်ဆေးရေးအဖွဲ့ အနေဖြင့်လည်း ပြည်နယ်လွှတ်တော် ကိုယ်စားလှယ်နှင့်အတူ တည်ဆောက်ဆဲကာလနှင့် ပြီးစီးချိန်တို့တွင် စနစ်တကျသွားရောက်စစ်ဆေးခဲ့ခြင်း တို့ကြောင့် တည်ဆောက်ခဲ့သည့် ကုမ္ပဏီနှင့်အရည်အသွေး စစ်ဆေးခဲ့သည့်အဖွဲ့တို့အား အရေးယူဆောင်ရွက်ရန် အစီအစဉ်မရှိပါကြောင်း ပြန်လည်ဖြေကြားခဲ့သည်။

 (၇)    ဦးနေလင်းထွန်း၊ ဘုတ်ပြင်းမဲဆန္ဒနယ်က မေးမြန်းသော တနင်္သာရီတိုင်းဒေသကြီး အတွင်းပြည်ထောင်စုလမ်းမကြီးနှင့် ဆက်သွယ်၍ မရနိုင်သည့် ပင်လယ်ကမ်းရိုးတန်း၊ ကျွန်းအခြေစိုက်ကျေးရွာများအတွက် ဆိပ်ခံတံတား၊ ရွာလယ်လမ်းတံတားများကို ဒေသနှင့်ကိုက်ညီသည့် ပုံစံဖြင့် ပထမဦးစားပေးစာရင်းထည့်သွင်း၍ သတ်မှတ် ဆောင်ရွက်ပေးရန် အစီအစဉ် ရှိ၊မရှိ မေးခွန်းနှင့်စပ်လျဉ်း၍ နယ်စပ်ရေးရာဝန်ကြီး ဌာန ဒုတိယဝန်ကြီး ဗိုလ်ချုပ်သန်းထွဋ်က ဒေသဖွံ့ဖြိုးရေး ဆောင်ရွက်ပေးသော လုပ်ငန်းတွင် ပါဝင်ခြင်းမရှိသဖြင့် ရန်ပုံငွေလျာထားဆောင်ရွက်နိုင်ခြင်း မရှိပါကြောင်းနှင့် တိုင်းဒေသကြီးအစိုးရအဖွဲ့မှ အမှန်တကယ်လိုအပ်ချက်ပေါ်မူတည်၍  ပြည်ထောင်စု သို့မဟုတ် ပြည်နယ်ရန်ပုံငွေဖြင့် ဆောင်ရွက်မည့် နယ်စပ်ဒေသဖွံ့ဖြိုးရေး တတိယ (၅)နှစ် စီမံကိန်းတွင် ရန်ပုံငွေဝင်ဆံ့မှုအပေါ်မူတည်၍ ထည့်သွင်းလျာထားဆောင်ရွက် ပေးသွားမည်ဖြစ်ပါကြောင်း ပြန်လည်ဖြေကြားခဲ့သည်။

( ခ )   အဆို(၁)ခုတင်သွင်းခြင်း

ဒေါ်အေးမြမြမျိုး၊ ကျောက်တန်းမဲဆန္ဒနယ်က အသက်သုံးနှစ်မှ ငါးနှစ်အတွင်းရှိ ကလေး များ၏ မူကြိုပညာရေးအတွက် စွမ်းရည်ပြည့်ဝသော ဆရာ၊ ဆရာမများလေ့ကျင့်သင်ကြား ပေးပါရန်နှင့် မူကြိုကျောင်းများတွင် အာဟာရကျွေးမွေးနိုင်ရန်အတွက် သင့်လျော်သော ဘတ်ဂျက်ထည့်သွင်းပံ့ပိုးပေးပါရန် နိုင်ငံတော်အစိုးရအား တိုက်တွန်းကြောင်း အဆိုကို တင်သွင်းပြီး ဒေါ်နီနီမေမြင့်၊ တောင်ကုတ်မဲဆန္ဒနယ်က ထောက်ခံခဲ့သည်။ အဆိုအား ဆက်လက်ဆွေးနွေးရန် လွှတ်တော်က ဆုံးဖြတ်ခဲ့သဖြင့် ဆွေးနွေးလိုသော လွှတ်တော် ကိုယ်စားလှယ်များက ၁-၂-၂၀၁၉ (သောကြာနေ့) ညနေ ၄ နာရီ နောက်ဆုံးထား၍ အမည်စာရင်း တင်သွင်းရန်ဖြစ်သည်။

( ဂ )     ဥပဒေကြမ်း(၁)ခုလက်ခံရရှိကြောင်း လွှတ်တော်သို့အသိပေးခြင်းနှင့် ဥပဒေကြမ်း(၁)ခု နှင့် စပ်လျဉ်း၍ အစီရင်ခံစာ ဖတ်ကြားခြင်း

(၁)     အမျိုးသားလွှတ်တော်က ပြင်ဆင်ချက်ဖြင့် အတည်ပြု၍ ပေးပို့လာသော ယဉ်ကျေးမှု အမွေအနှစ်ဒေသများ ကာကွယ်ထိန်းသိမ်းရေးဥပဒေကြမ်းကို လက်ခံရရှိကြောင်း လွှတ်တော်သို့ အသိပေးပြီး အဆိုပါ ဥပဒေကြမ်းနှင့် စပ်လျဉ်း၍ ပြင်ဆင်ချက် အဆို ဆွေးနွေးလိုသော လွှတ်တော်ကိုယ်စားလှယ်များက ၄.၂.၂၀၁၉ (တနင်္လာနေ့) ညနေ ၄ နာရီ နောက်ဆုံးထား၍ အမည်စာရင်း တင်သွင်းရန်ဖြစ်သည်။

(၂)     အမျိုးသားလွှတ်တော်က ပြင်ဆင်ချက်ဖြင့် အတည်ပြု၍ ပေးပို့လာသော ၂၀၁၈ ခုနှစ်၊ လောင်းကစား ဥပဒေကြမ်း တစ်ရပ်လုံးကို ပြင်ဆင်ထားသည့် အပိုဒ်၊ အပိုဒ်ခွဲ အတိုင်း အတည်ပြုကြောင်းနှင့် ၂၀၁၃ ခုနှစ်၊ ပြည်သူ့လွှတ်တော်ဆိုင်ရာ နည်းဥပဒေ ၁၉၅၊ နည်းဥပဒေခွဲ(က)နှင့် (ခ)တို့အရ ဆက်လက်ဆောင်ရွက်သွား မည်ဖြစ်ကြောင်း ကြေညာခဲ့သည်။

၃။       ပြည်သူ့လွှတ်တော် အစည်းအဝေးကို နံနက် ၁၁ နာရီ ၄၅ မိနစ်တွင် ရပ်နားပြီး ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး အဋ္ဌမနေ့ ကျင်းပမည့်ရက်ကို ၄-၂-၂၀၁၉ ရက် (တနင်္လာနေ့) နံနက် ၁၀ နာရီ တွင် လျာထားပါသည်။