Skip to main content

အစိုးရအာမခံချက်များ ကတိများနှင့် တာဝန်ခံချက်များ စိစစ်ရေးကော်မတီ၊ ဝန်ကြီးဌာနများ၊ ပြည်ထောင်စုအဆင့် ဌာနများနှင့် ညှိနှိုင်းစည်းဝေးကျင်းပ

နေပြည်တော် မေ ၂   

<--break->

                     

ပြည်သူ့လွှတ်တော် အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီသည် ပထမအကြိမ် ပြည်သူ့လွှတ်တော် သတ္တမပုံမှန်အစည်းအဝေးတွင် အစီရင်ခံစာ တင်သွင်းနိုင်ရန်အတွက် ဝန်ကြီးဌာနများ၊ ပြည်ထောင်စုအဆင့်ဌာနများနှင့် လုပ်ငန်းညှိနှိုင်းအစည်းအဝေးကို ယနေ့ မွန်းလွဲ ၁ နာရီတွင် နေပြည်တော်ရှိ လွှတ်တော်အဆောက် အအုံ ပြည်သူ့လွှတ်တော်ကော်မတီ အဆောင် အမှတ်(၃)၌ ကျင်းပရာ အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေး ကော်မတီဥက္ကဋ္ဌ ဦးဝင်းစိန်က ပြည်သူ့လွှတ်တော် ပထမ၊ ဒုတိယ၊ တတိယ၊ စတုတ္ထနှင့်ပဉ္စမအကြိမ် ပုံမှန်အစည်းအဝေးများတွင် ကတိပြုခဲ့သော မေးခွန်းများ၊ အတည်ပြုခဲ့သော အဆိုများနှင့် ကြယ်ပွင့်မပြ စာဖြင့်မေးသော မေးခွန်းများ၏ မပြီးပြတ်သေးသည့် လုပ်ငန်းများနှင့်စပ်လျဉ်း၍ ရှင်းလင်းပြောကြားသည်။ ထို့နောက် ကော်မတီအတွင်းရေးမှူး ဦးသန်းမြင့်၊ ကော်မတီအဖွဲ့ဝင် များဖြစ်ကြသည့် ဦးဝင်းသန်း၊ ဦးသန်းနွယ်၊ ဦးလှထွန်းဦး၊ ဦးကိုကိုလွင်၊ ဦးသန်းထွန်း၊ ဒေါ်ခင်စောဝေနှင့် ဒေါ်ခင်သန္တာတို့က ကျင်းပပြီးစီးခဲ့သည့် ပြည်သူ့လွှတ်တော် ပုံမှန်အစည်းအဝေးများတွင် ကတိပြုခဲ့သော မေးခွန်းများ၊ အဆိုများ၏ မပြီးပြတ်သေးသောလုပ်ငန်းများ၊ စာဖြင့်မေးသော မေးခွန်းများနှင့် စပ်လျဉ်း၍ဆွေးနွေးတင်ပြကြသည်။

၎င်းနောက် အစည်းအဝေးသို့တက်ရောက်လာကြသည့် ဝန်ကြီးဌာနများနှင့် ပြည်ထောင်စုအဆင့်ဌာနများမှ တာဝန်ရှိသူများက ဝန်ကြီးဌာနအလိုက် ဆောင်ရွက်ပြီးစီးမှု၊ ဆက်လက်ဆောင်ရွက်မည့် လုပ်ငန်း အစီအစဉ်များကို ဆွေးနွေးတင်ပြကြသည်။

၎င်းနောက် ကော်မတီဥက္ကဋ္ဌ ဦးဝင်းစိန်က ဝန်ကြီးဌာနများ၏ တင်ပြ ဆွေးနွေးမှုများအပေါ် ပြန်လည် သုံးသပ်ဆွေးနွေးပြောကြားပြီး ကျင်းပပြီးစီးခဲ့သည့် ပြည်သူ့လွှတ်တော် ပုံမှန်အစည်းအဝေးများတွင် ကတိပြုခဲ့သော မေးခွန်းများ၊ အဆိုများ၊ စာဖြင့် မေးသောမေးခွန်းများ၏ မပြီးပြတ်သေးသည့် လုပ်ငန်းများကို ပြီးပြတ်အောင် ဝန်ကြီးဌာနအချင်းချင်း ပေါင်းစပ်ညှိနှိုင်းဆောင်ရွက်ကြရန် မှာကြားပြီး အစည်းအဝေးကို ညနေပိုင်းတွင် ရုပ်သိမ်းလိုက်သည်။

အစည်းအဝေးသို့ ပြည်သူ့လွှတ်တော်၊ အစိုးရ၏ အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ ဥက္ကဋ္ဌ ဦးဝင်းစိန်၊ ကော်မတီအတွင်းရေးမှူး၊ ကော်မတီအဖွဲ့ဝင်များ၊ ဝန်ကြီးဌာနများနှင့် ပြည်ထောင်စုအဆင့် ဌာနများမှ ရုံးအဖွဲ့မှူးများနှင့် တာဝန်ရှိသူများ တက်ရောက်ကြသည်။

(သတင်းစဉ်)