Skip to main content

 

နိုင်ငံတော်ကို လွှတ်တော်မဲဆန္ဒနယ် ၃၃၀ တို့ဖြင့်အခြေခံကာ မြို့နယ်အဖြစ်တည်ဆောက်ခဲ့ပြီး ဖွဲ့စည်းပုံ အခြေခံဥပဒေပုဒ်မ ၅၅၁ ပုဒ်မခွဲ (ခ) အရ ရပ်ကွက်များကို မြို့သို့မဟုတ်မြို့နယ်များအဖြစ် သတ်မှတ် ခဲ့ပါကြောင်း၊ အလားတူ မြို့အဆင့်ဖြစ်နေပြီဖြစ်သည့် ကျေးရွာအုပ်စုကြီးကိုလည်း မြို့အဖြစ်အသိအမှတ်ပြု သတ်မှတ်ခေါ်ဝေါ်ခြင်း ခံခဲ့ရကြသော်လည်း မြို့နှင့်ထိုက်တန်သော ဖွံ့ဖြိုးစည်ပင်စေသော အစီအမံများ၊ ဆောင်ရွက်ပေးမှုများ အားနည်းနေခြင်းနှင့် ပတ်သက်ပြီး မေးမြန်းသွားမည် ဖြစ်ပါကြောင်း၊

လွန်ခဲ့သည့်လများက မိမိတို့ကိုယ်စားလှယ်အချို့ ချင်းပြည်နယ်၊ ရိဒ်ခေါဒါမြို့ကို အလည်အပတ် သွားရောက်ခဲ့ပါကြောင်း၊ ဒေသခံမိတ်ဆွေများနှင့် စကားပြောသည့်အခါ ယနေ့ ၎င်းတို့ မြို့နှင့်ပတ်သက်ပြီး ရင်ဆိုင်နေရသော အခက်အခဲများ၊ ခံစားချက်များ၊ သိမြင်ခြင်းများကို ထောက်ပြကြရာ အလွန်စိတ်ဝင်စား ဖွယ်ကောင်းပြီး ၎င်းတို့ကို မည်သို့ကူညီနိုင်မည်၊ ပံ့ပိုးနိုင်မည်ကို မိမိတို့စဉ်းစားခဲ့ကြပါကြောင်း၊ အဆိုပါ မြို့လေးကို ယခင်တပ်မတော်အစိုးရခေတ်ကတည်းက မြို့အဖြစ်အသိအမှတ်ပြုခဲ့ခြင်းဖြစ်ပြီး မြန်မာနိုင်ငံ တစ်ဝန်းလုံးတွင် အလားတူမြို့များ၊ တစ်နည်းအားဖြင့် ပြည်ထဲရေးအမည်ပေါက်မြို့များ ၄၃၀ ကျော် ရှိသည်ဟု လေ့လာသိရှိရပါကြောင်း၊ မြို့အားလုံးရင်ဆိုင်နေရသည့် စိန်ခေါ်မှုများလည်း အလားတူဖြစ်မည် ဖြစ်သည့်အတွက် တစ်နိုင်ငံလုံးက မြို့အားလုံးနှင့် အနာဂတ်တွင်ဖြစ်ပေါ်လာမည့် မြို့အားလုံးအတွက် ရည်ရွယ်၍ မေးမြန်းခြင်း ဖြစ်ပါကြောင်း၊

ဥပဒေအရ ယနေ့တည်ထောင်ထားကြသည့် မြို့များသည် ကျေးရွာများ၊ မြို့နယ်များ မဟုတ်ကြပါကြောင်း၊ သာမန်အားဖြင့် စည်ပင်သာယာရေး အဖွဲ့များရှိလာပါကြောင်း၊ ရွာနှင့်မတူသည့် စည်ပင်အခွန် အကောက်စနစ်များ ဖြစ်လာပါကြောင်း၊ ၎င်းအခွန်များဖြင့် အဆိုပါမြို့ကိုဖွံ့ဖြိုးစေရန် လုပ်ဆောင်နိုင်မည်ဟု  ယေဘုယျတွက်ဆ၍ ရပါသော်လည်း လက်တေ့ွတွင် ၎င်းတွက်ဆမှုသည် မှားယွင်းနေပါကြောင်း၊ နိုင်ငံတစ်ဝန်းက ကျေးရွာများ စည်ပင်ဝပြောရန်အတွက် ကျေးလက်ဒေသဖွံ့ဖြိုးရေးနှင့် သက်ဆိုင်သည့် ဦးစီးဌာနများသည် စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန အောက်တွင်ရှိနေပြီး ကျေးလက် အခြေခံ အဆောက်အဦများ၊ ရေအရင်းအမြစ် ရရှိရေးအပါအဝင် ဖွံ့ဖြိုးရေးလုပ်ငန်းများကို ထောက်ပံ့ ဖြည့်ဆည်း ပေးနေရပါကြောင်း၊ ယခု ဆောက်လုပ်ရေးဝန်ကြီးဌာန၏ ကျေးလက်ဖွံ့ဖြိုးရေး ဦးစီးဌာနကလည်း လမ်းများဖြစ်လာရန် စီမံပေးနေပါကြောင်း၊ ကမ္ဘာ့ဘဏ်ချေးငွေဖြင့် CTC စီမံကိန်း၊ VPP စီမံကိန်းကဲ့သို့သော ရွာလူထုစိတ်ကြိုက် တည်ဆောက်နိုင်မည့် လုပ်ငန်းများ၊ မြစိမ်းရောင်ကဲ့သို့ ချေးငွေများ ရှိနေချိန်တွင် တင်ပြပါမြို့ကလေးများက အဆိုပါစီမံကိန်းများ၊ ရငွေများနှင့်မသက်ဆိုင်ခြင်း ဖြစ်နေပါကြောင်း၊ တစ်ဖက်ကကြည့်ပါက မြို့နယ်ရုံးစိုက်သောမြို့များကဲ့သို့ အိမ်ထောင်စုအရေအတွက်၊ ဖြတ်သန်းသည့် ယာဉ်အရေအတွက်၊ ဈေးများ၏ရောင်းဝယ် လှုပ်ရှားမှုပမာဏသည် မများပြားသည့်အတွက် မြို့စည်ပင်အခွန်သည် ပြောပြလောက်အောင် မရှိပါကြောင်း၊ ၎င်းငွေဖြင့် ဖွံ့ဖြိုးစေရန် တည်ဆောက်ရပ်တည်ရမည် ဆိုပါက လက်တွေ့တွင် ခက်ခဲလှပါကြောင်း၊ အခြားထောက်ပံ့ငွေ၊ ဖွံ့ဖြိုးရေးအကူအညီများလည်း မရရှိသည့်အတွက် မိမိအခွန်ဖြင့် စီမံဖွံ့ဖြိုးစေရေးသည် မဖြစ်နိုင်သကဲ့သို့ ဖြစ်နေပါကြောင်း၊ ကျေးလက်ဖွံ့ဖြိုးရေးရရှိရန် ၂၀၁၀ ခုနှစ်မှစတင် လုပ်ဆောင် ခဲ့ကြသည့်အတွက် ကျေးရွာပြည်သူလူထုများအတွက် လမ်းများ၊ တံတားများ၊ ရေကန်များအတွက် ရန်ပုံငွေများခွဲဝေ ချထားပေးနိုင်ခဲ့သည်မှာ ရှစ်နှစ်အကြာတွင် အတော်အတန် ခရီးရောက်ရှိနေပြီ ဖြစ်ပါကြောင်း၊ လွှတ်တော်ဖွံ့ဖြိုးရေး ရန်ပုံငွေဖြင့်လည်း လုပ်ဆောင်ပေးနိုင်ခဲ့ပါကြောင်း၊ ဆက်လက်ပြီး မိမိတို့ လုပ်ဆောင်ကြရဦးမည် ဖြစ်ပါကြောင်း၊ တစ်ဖက်တွင်လည်း မြို့ပြဖွံ့ဖြိုးရေးအတွက် စည်ပင်ရန်ပုံငွေ၊ နိုင်ငံတော်၏ ရန်ပုံငွေများကို နှစ်စဉ်အသုံးပြုပြီး ဆောင်ရွက်ပေးနိုင်နေပြီ ဖြစ်ပါကြောင်း၊ ပြီးပြည့်စုံသော အခြေအနေကို ရောက်ရှိရန် ကြိုးစားရဦးမည်ဖြစ်သော်လည်း အတန်အသင့်ခရီးရောက်ရှိနေပြီး တစ်နည်းအားဖြင့် လမ်းကြောင်းပေါ်ရောက်ရှိနေပြီဟု ပြောရမည်ဖြစ်ပါကြောင်း၊

ယခုအချိန်တွင် မိမိပြောကြားသည့်မြို့များကို မေ့လျော့မထားသင့်သည်ကို လွှတ်တော်ကြီးမှတစ်ဆင့် အသိပေးတင်ပြလိုပါကြောင်း၊ မြို့နယ်လည်းမဟုတ်၊ ကျေးလက်လည်းမဟုတ်၊ ပြောရမည်ဆိုပါက တောမကျ၊ မြို့မကျ၊ တောမရောက်၊ တောင်မရောက်နှင့် အလှမ်းကျယ် အလယ်လပ်နေသော မြို့များအတွက် ပြည်ထောင်စုအစိုးရအနေဖြင့် အစီအမံများချမှတ်ရန်၊ ဘဏ္ဍာရန်ပုံငွေများခွဲဝေပေးရန် တိုင်းဒေသကြီးနှင့် ပြည်နယ်အစိုးရများနှင့် ညှိနှိုင်းပြီး မြို့များတွင် လိုအပ်နေသော၊ ရှိသင့်ရှိထိုက်သည့် အဆင့်မီဖွံ့ဖြိုး သာယာရေးအတွက် အားနည်းချက်များ ပြုပြင်ထိန်းသိမ်း ဆောင်ရွက်သွားရန် လိုအပ်နေပြီ ဖြစ်သည့်အတွက် မြန်မာနိုင်ငံတစ်ဝန်းမြို့များ၏ ဖွံ့ဖြိုးစည်ပင်သာယာမှုအပေါ် ရေတို/ရေရှည် အစီအမံများဖြင့် ဘဏ္ဍာငွေချမှတ်၍ တိုးမြှင့်ဆောင်ရွက်သွားရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။


 

မြန်မာနိုင်ငံတစ်ဝန်းရှိ မြို့များ၏ဖွံ့ဖြိုးတိုးတက်ရေးနှင့် စည်ပင်သာယာရေးအတွက် ၂၀၁၁ ခုနှစ်မတိုင်မီက ရန်ကုန်နှင့်မန္တလေးမြို့ကြီး နှစ်မြို့မှအပ ကျန်မြို့များအားလုံးကို စည်ပင်သာယာရေးကို နိုင်ငံတော်မှ ဝန်ကြီးဌာနဖွဲ့စည်းပြီး ဗဟိုမှတိုက်ရိုက်စီမံခန့်ခွဲသော စနစ်ကိုကျင့်သုံး ဆောင်ရွက်ခဲ့ပါကြောင်း၊ ၂၀၁၁ ခုနှစ်မှ စတင်ပြီးမြို့များ ဖွံ့ဖြိုးတိုးတက်၍ သာယာလှပစေရန်နှင့် စည်ပင်သာယာရေးလုပ်ငန်းများကို ပိုမိုထိရောက်စွာ လုပ်ကိုင်နိုင်ရေးအတွက် ပြည်ထောင်စုသမ္မတ မြန်မာနိုင်ငံတော် ၂၀၀၈ ခုနှစ်၊ ဖွဲ့စည်းပုံ အခြေခံဥပဒေပုဒ်မ ၁၈၈ အရ တိုင်းဒေသကြီး/ပြည်နယ်များက ပြဋ္ဌာန်းပိုင်ခွင့်ရှိသော ဥပဒေပြုစာရင်း ဇယားနှင့်သော်လည်းကောင်း၊ အခွန်ဆိုင်ရာဇယား (၅) တွင်လည်းကောင်း၊ စည်ပင်သာယာရေး လုပ်ငန်းများကို ဖော်ပြထားရှိပြီး တိုင်းဒေသကြီး/ပြည်နယ် အစိုးရအဖွဲ့များအား လုပ်ပိုင်ခွင့် အပ်နှင်းထားသည်ကို တွေ့ရှိရသည့်အတွက် တိုင်းဒေသကြီး/ပြည်နယ် အစိုးရအဖွဲ့များကလည်း တိုင်းဒေသကြီး/ပြည်နယ် အစိုးရအဖွဲ့ဥပဒေပုဒ်မ ၃၅ အရ အရအသုံးဆိုင်ရာလျာထားချက်ကို ဘဏ္ဍာရေး ကော်မရှင်သို့ တင်ပြညှိနှိုင်းပြီး ပြည်ထောင်စုဘဏ္ဍာငွေမှ ရရှိသည့်ထောက်ပံ့ရန်ပုံငွေများ အပါအဝင် တိုင်းဒေသကြီး/ပြည်နယ် ရသုံးမှန်းခြေငွေစာရင်းများကို သက်ဆိုင်ရာလွှတ်တော်သို့တင်ပြပြီး အတည်ပြုချက် ရယူပြီးမြို့များဖွံ့ဖြိုး စည်ပင်သာယာရေးအတွက် ထောက်ပံ့ဆောင်ရွက်ပေးလျက် ရှိပါကြောင်း၊ သက်ဆိုင်ရာစည်ပင်သာယာရေး ကော်မတီဝင်များက မြို့အဖြစ်အဆင့်တိုး သတ်မှတ်သည့် မြို့များတွင်ဖြစ်စေ၊ မူလသတ်မှတ်ပြီး မြို့များတွင်ဖြစ်စေ၊ အမှန်ဆောင်ရွက်သင့်သော ဖွံ့ဖြိုးရေး၊ တိုးတက်ရေး လုပ်ငန်းများကို တင်ပြလာပါက ကောက်ခံရရှိသော အခွန်ငွေပမာဏနှင့် တိုင်းဒေသကြီး အစိုးရအဖွဲ့၏ ဘဏ္ဍာရန်ပုံငွေအစီအစဉ်ဖြင့် စီမံဆောင်ရွက်ပေးလျက် ရှိပါကြောင်း၊ တိုင်းဒေသကြီး/ပြည်နယ် အစိုးရအဖွဲ့အလိုက် မြို့ဟုအသိအမှတ်ပြု ထားသည့်မြို့များအပေါ် ဖွံ့ဖြိုးတိုးတက်စေရန် စည်ပင်သာယာရေးလုပ်ငန်းများ လုပ်ဆောင်ပေးမှု အခြေအနေကို တိုင်းဒေသကြီး/ပြည်နယ် အစိုးရအဖွဲ့၏ ပြန်ကြားချက်များကို အကျဉ်းချုပ်တင်ပြသွားမည် ဖြစ်ပါကြောင်း၊

ကယားပြည်နယ်တွင် မြို့သုံးမြို့ရှိပြီးမြို့သစ်မြို့၊ လွိုင်လင်လေးမြို့နှင့် နန်းဖယ်ခုံမြို့တို့ရှိပါကြောင်း၊ ၂၀၁၈-၁၉ ဘဏ္ဍာရေးနှစ်အတွက် မြို့သစ်မြို့အတွက် ငွေကျပ် ၃၉ သန်း၊ လွိုင်လင်လေးမြို့အတွက် ငွေကျပ် ၂၀၅ သန်း၊ နန်းဖယ်ခုံမြို့အတွက် ငွေကျပ် ၈၆ သန်းကို ကယားပြည်နယ် စည်ပင်သာယာရေးအဖွဲ့က ထောက်ပံ့၍ မြို့ဖွံ့ဖြိုးရေးလုပ်ငန်းများကို ဆောင်ရွက်ထားရှိပါကြောင်း၊ ကရင်ပြည်နယ်တွင် မြို့ကိုးမြို့ရှိပြီး လိပ်သိုမြို့၊ ဘောဂလိမြို့၊ ရှမ်းရွာ (၁)၊ ပိုင်ကျုံမြို့၊ ကမမောင်းမြို့၊ ဘုရားသုံးဆူမြို့၊ ကျိုက်ဒုံမြို့၊ ဝေါလေမြို့၊ စုကလိမြို့တို့ဖြစ်ပြီး ၂၀၁၅ ခုနှစ်တွင် စတင်ကောက်ခံရရှိသော အခွန်ငွေသာမက ပြည်နယ်အစိုးရ ရန်ပုံငွေဖြင့်မြို့ပြဖွံ့ဖြိုးရေး လုပ်ငန်းများကိုဆောင်ရွက်လျက် ရှိပါကြောင်း၊ စစ်ကိုင်းတိုင်းဒေသကြီးတွင် မြို့ ၁၃ မြို့ရှိပြီး အဆိုပါ ၁၃ မြို့အနက် နာဂဒေသဖြစ်သည့် ဆွမ္ပရာမြို့၊ ထန်ပါခွေမြို့၊ ဒုံဟီးနှင့် ပန်ဆောင် (၄) မြို့တို့သည် နာဂတိုင်းရင်းသားလူမျိုးများ နေထိုင်သည့် တောင်ပေါ်မြို့များ ဖြစ်သည့်အတွက် စည်ပင်သာယာရေးနှင့် သက်ဆိုင်သည့် အခွန်အခရရှိမှု နည်းပါးသဖြင့် ဒေသဖွံ့ဖြိုးရေးလုပ်ငန်းများကို ဆောင်ရွက်နိုင်ရန်အတွက် တိုင်းဒေသကြီးအစိုးရအဖွဲ့၏ ထောက်ပံ့ရန်ပုံငွေဖြင့် စစ်ကိုင်းတိုင်းဒေသကြီး စည်ပင်သာယာရေးအဖွဲ့ ရန်ပုံငွေတို့မှလိုအပ်သည့် ဖွံ့ဖြိုးတိုးတက်ရေး လုပ်ငန်းများကို ဆောင်ရွက်ပေးလျက် ရှိပါကြောင်း၊ စိုင်ပြင်မြို့နှင့်မော်လူးမြို့တို့သည် မကြာသေးမီက မြို့အဖြစ်သတ်မှတ်ခဲ့ခြင်း ဖြစ်သည့်အတွက် ရုံးများစတင်ဖွင့်လှစ်နိုင်ရေးအတွက် လိုအပ်သော ရုံးအဆောက်အဦနှင့် လိုအပ်သည့်ပစ္စည်းများကို လာမည့်ဘဏ္ဍာရေးနှစ်တွင် ထည့်သွင်းလျာထား ဆောင်ရွက်ထားပါကြောင်း၊ ၂၀၁၈-၁၉ ဘဏ္ဍာရေးနှစ်တွင် ဇီးကုန်းမြို့အတွက် ၆၀ သန်း၊ မော်လူးမြို့အတွက် ၃၀ သန်း၊ ဆွမ္ပရာမြို့ အတွက် ၃၀ သန်း၊ ထန်ပါခွေမြို့အတွက် ၅၈ သန်းနှင့် ပန်ဆောင်မြို့အတွက် ၂.၇၈ သန်းတို့ကို တိုင်းဒေသကြီးထောက်ပံ့ငွေဖြင့် ဆောင်ရွက်မည်ဖြစ်ပါကြောင်း၊ ရခိုင်ပြည်နယ်တွင် မြို့ကိုးမြို့ရှိပြီး ငပလီမြို့၊ တပ်တောင်မြို့၊ ကမ်းထောင်းကြီးမြို့၊ မအီမြို့၊ ကျိန္တလီမြို့တို့တွင် အခွန်အခစည်းကြပ် ကောက်ခံလျက်ရှိသည့်အတွက် စည်ပင်သာယာရေး လုပ်ငန်းများကို အကောင်အထည်ဖော်ဆောင်ရွက် လျက်ရှိပါကြောင်း၊ တောင်ပြိုလက်ဝဲမြို့၊ ခမောင်းဆိပ်မြို့နှင့် မြင်းလွတ်မြို့တွင် လက်ရှိအခြေအနေအရ ဖွံ့ဖြိုးတိုးတက်ရေး လုပ်ငန်းများ ဆောင်ရွက်နိုင်မှု မရှိသေးပါကြောင်းနှင့် စနဲမြို့သည် ရခိုင်ပြည်နယ်အစိုးရအဖွဲ့ရန်ပုံငွေ ကျပ်သန်း ၁၀၀ ထောက်ပံ့ပြီး ဆောင်ရွက်နိုင်ရေးလျာထားပါကြောင်း၊ တနင်္သာရီတိုင်းဒေသကြီးတွင် မြို့ခြောက်မြို့ရှိပြီး ကလိန်အောင်မြို့၊ မေတ္တာမြို့၊ ပလောက်မြို့၊ ပြည်ကြီးမဏ္ဍိုင်မြို့၊ ကရသူရိမြို့နှင့် ခမောက်ကြီး မြို့တို့ဖြစ်ပါကြောင်း၊ တိုင်းဒေသကြီးအစိုးရအဖွဲ့အနေဖြင့် ၂၀၁၇-၁၈ ဘဏ္ဍာရေးနှစ်တွင် တင်ပြပါ မြို့များအတွက် တင်ပြပါစည်ပင်သာယာရေး လုပ်ငန်းများကို ဆောင်ရွက်လျက်ရှိပြီး ၂၀၁၈-၁၉ ဘဏ္ဍာရေးနှစ်အတွက် တင်ပြပါစည်ပင်သာယာရေး လုပ်ငန်းများကို တိုင်းဒေသကြီး စည်ပင်သာယာရေး အဖွဲ့၏ ကြီးကြပ်ကွပ်ကဲမှု၊ ထောက်ပံ့ပေးမှုဖြင့် ဆောင်ရွက်လျက်ရှိပါကြောင်း၊

ပဲခူးတိုင်းဒေသကြီးတွင် မြို့ ၂၆ မြို့ရှိပြီး တိုင်းဒေသကြီးအစိုးရရန်ပုံငွေ ထောက်ပံ့မှုအပါအဝင် ၂၀၁၆-၁၇ ဘဏ္ဍာရေးနှစ်တွင် ကျပ်သန်းပေါင်း ၁၀၃၉ သန်း၊ ၂၀၁၇-၁၈ ဘဏ္ဍာရေးနှစ်တွင် ကျပ်သန်းပေါင်း ၂၃၃၀ သန်း၊ ၂၀၁၈ ဘဏ္ဍာရေးနှစ်တွင် ကျပ်သန်းပေါင်း ၂၅၀၅ သန်းကို ထောက်ပံ့ပေးပြီး ဆောင်ရွက်လျက် ရှိပါကြောင်း၊ မကွေးတိုင်းဒေသကြီးတွင် မြို့ငါးမြို့ရှိပြီး စလေမြို့၊ ကမ္မမြို့၊ မြစ်ခြေမြို့၊ ကျောမြို့နှင့် ကျောက်ထုမြို့တို့ ဖြစ်ပါကြောင်း၊ စလေမြို့အတွက် တင်ပြပါအတိုင်း ၂၀၁၈ Mini ဘဏ္ဍာရေးနှစ်တွင် ၃၁၃ သိန်း၊ ၂၀၁၈-၁၉ ဘဏ္ဍာရေးနှစ်တွင် ၂၁၉ သိန်း၊ ၂၀၁၉-၂၀ ဘဏ္ဍာရေးနှစ်တွင် ၁၁၂ သိန်းနှင့် ၂၀၂၀-၂၁ ဘဏ္ဍာရေးနှစ်အတွက် ၆၀ သိန်း ရန်ပုံငွေများ ချထားဆောင်ရွက်ရန် လျာထားပါကြောင်း၊ ကမ္မမြို့၊ မြစ်ခြေမြို့၊ ကျောက်ထုမြို့တို့တွင် ဝင်ငွေရရှိမှုသည် ၁၇ သန်းကျော်သာရှိသည့်အတွက် မြို့ဖွံ့ဖြိုးရေး လုပ်ငန်းများဆောင်ရွက်နိုင်ရန် ၂၀၁၈ ဘဏ္ဍာရေးနှစ်တွင် ၂၀၈ သိန်းကျပ် ထောက်ပံ့ရန်ပုံငွေ ခွဲဝေဆောင်ရွက်ပါကြောင်း၊ မန္တလေးတိုင်းဒေသကြီးတွင် မြို့နှစ်မြို့ရှိပြီး တကောင်းမြို့နှင့် ငါးသရောက်မြို့ ဖြစ်ပါကြောင်း၊ အခွန်အခအကောက်များ ကောက်ခံရရှိမှုနည်းပါးသည့်အတွက် တင်ပြပါစည်ပင်သာယာ ရေးလုပ်ငန်းများကို တိုင်းဒေသကြီးအစိုးရအဖွဲ့နှင့် စည်ပင်သာယာရေးအဖွဲ့မှ နှစ်စဉ်ထောက်ပံ့ပေးလျက် ရှိပါကြောင်း၊ မွန်ပြည်နယ်တွင် မြို့ခုနစ်မြို့ရှိပြီး သုဝဏ္ဏဝတီမြို့၊ ကမာဝက်မြို့၊ သိမ်ဇရပ်မြို့၊ ကျိုက္ခမီမြို့၊ လမိုင်းမြို့၊ ခေါဇာမြို့နှင့်ဇင်းကျိုက်မြို့တို့ ဖြစ်ပါကြောင်း၊ ၂၀၁၈ ခုနှစ် ဧပြီလမှ စက်တင်ဘာလအထိ တင်ပြပါအတိုင်းမြို့အလိုက် တိုင်းဒေသကြီးရန်ပုံငွေ၊ စည်ပင်သာယာရေးရန်ပုံငွေများမှ ထောက်ပံ့ ပေးလျက်ရှိပြီး ၂၀၁၈ ခုနှစ်နှင့် ၂၀၁၉ ခုနှစ်အတွက်လည်း တင်ပြပါအတိုင်း မြို့အလိုက်ရန်ပုံငွေများကို ပံ့ပိုးဆောင်ရွက်ပေးလျက် ရှိပါကြောင်း၊ ရှမ်းပြည်နယ်အနေဖြင့် စည်ပင်သာယာရေးလုပ်ငန်းများကို ရှမ်း ပြည်နယ်အတွင်း ဌာန ၈၀ ခုဖြင့် ဆောင်ရွက်လျက်ရှိပြီး အခွန်အခကောက်ခံခြင်း မရှိသောမြို့ လေးမြို့၊ မလုံလောက်သော မြို့ ၃၃ မြို့ရှိကြောင်းနှင့် ၎င်းမြို့တို့အတွက် လစာနှင့်သာမန်အသုံးစရိတ်များ၊ ငွေလုံးငွေရင်းအသုံးစရိတ်များအား ပြည်နယ်အစိုးရရန်ပုံငွေနှင့် ရှမ်းပြည်နယ်စည်ပင်သာယာရေးဌာနတို့မှ နှစ်စဉ်ထောက်ပံ့ ဆောင်ရွက်ပေးလျက် ရှိပါကြောင်း၊ ဧရာဝတီတိုင်းဒေသကြီး အနေဖြင့်မြို့ ငါးမြို့ရှိပြီး ကျုံမငေးမြို့၊ ကနောင်မြို့၊ ဘက်ရဲမြို့၊ အထောင်မြို့၊ အသုတ်မြို့တို့ဖြစ်ပြီး ၎င်းမြို့များသည် သီးခြားရသုံး ခန့်မှန်းခြေငွေစာရင်း ရေးဆွဲဆောင်ရွက်ခြင်းမရှိဘဲ ၎င်းမြို့များပါဝင်သော မြို့နယ်စည်ပင်သာယာရေးအဖွဲ့ များတွင်သာ ရသုံးခန့်မှန်းခြေငွေစာရင်း ရေးဆွဲပြီး ဆောင်ရွက်လျက်ရှိပါကြောင်း၊

သို့ဖြစ်ပါ၍ တိုင်းဒေသကြီး/ပြည်နယ်အစိုးရအဖွဲ့များ၏ ဖြေကြားချက်များအရ မြို့ဟုသတ်မှတ်ထားသော မြို့များတွင် မြို့စည်ပင်သာယာရေးအဖွဲ့များကို စနစ်တကျဖွဲ့စည်း၍ စည်ပင်သာယာရေးလုပ်ငန်းများ လုပ်ဆောင်နိုင်သည်‌့မြို့မှာ မြို့အနည်းစုသာဖြစ်ပြီး ကျန်မြို့များတွင် သက်ဆိုင်ရာလွှတ်တော် ကိုယ်စားလှယ်များ၊ ဒေသအုပ်ချုပ်ရေးအဖွဲ့အစည်းများနှင့် မြို့မိမြို့ဖများ၏ စီမံခန့်ခွဲမှုဖြင့် မြို့ဖွံ့ဖြိုး တိုးတက်ရေး စည်ပင်သာယာရေး လုပ်ငန်းများကို သက်ဆိုင်ရာတိုင်းဒေသကြီး/ပြည်နယ်အစိုးရအဖွဲ့မှ ခွဲဝေထောက်ပံ့ရရှိသော ရန်ပုံငွေအရသာ နှစ်စဉ်စီမံချက်ရေးဆွဲ၍ ဆောင်ရွက်လျက်ရှိပါကြောင်း၊ ဖော်ပြပါမြို့များတွင် အခွန်ကောက်ခံရရှိမှုနည်းပါးခြင်း၊ စီးပွားရေးဖွံ့ဖြိုးတိုးတက်မှုအားနည်းခြင်း၊ ဖွံ့ဖြိုးမှုအခြေခံ အချက်များမတူညီခြင်း၊ နယ်မြေဒေသတည်နေရာနှင့် လမ်းပန်းဆက်သွယ်မှုအခြေအနေ ကွဲပြားခြားနားခြင်း တို့ကြောင့် မြို့များမှတင်ပြလာသော ဖွံ့ဖြိုးတိုးတက်ရေးလုပ်ငန်းများကိုသာ စိစစ်၍ တိုင်းဒေသကြီး/ပြည်နယ် အစိုးရအဖွဲ့များမှ ထောက်ပံ့ရန်ပုံငွေ ခွဲဝေပေးလျက်ရှိပါကြောင်း၊ မြို့ကြီးများနှင့် မြို့နယ်အဆင့်ရှိ  စည်ပင်သာယာရေးကော်မတီတို့တွင် မြို့ဖွံ့ဖြိုးတိုးတက်ရေးအတွက် နှစ်ရှည်/နှစ်တို စီမံကိန်းများချမှတ် ဆောင်ရွက်လျက်ရှိသော်လည်း မြို့ဟုသတ်မှတ်သော မြို့အများစုတွင် တိုင်းဒေသကြီး/ပြည်နယ် အစိုးရအဖွဲ့နှင့် တိုင်းဒေသကြီး/ပြည်နယ် စည်ပင်သာယာရေးအဖွဲ့တို့မှ နှစ်စဉ်ချမှတ်ပေးသော ရန်ပုံငွေအတိုင်းအတာကိုသာ သက်ဆိုင်ရာလွှတ်တော်ကိုယ်စားလှယ်များ၊ ဒေသအုပ်ချုပ်ရေး အဖွဲ့အစည်းများ၊ မြို့မိမြို့ဖများနှင့်ပူးပေါင်း၍ နှစ်စဉ်စီမံချက်များချမှတ်ပြီး မြို့ဖွံ့ဖြိုးစည်ပင်သာယာရေး လုပ်ငန်းများကို လုပ်ဆောင်လျက်ရှိပါကြောင်း တိုင်းဒေသကြီး/ပြည်နယ် အစိုးရအဖွဲ့များ၏ ဖြေကြားချက်အပေါ် ပေါင်းစပ်၍ဖြေကြားပါသည်။

 

နေပြည်တော်ကောင်စီ၊ အဖွဲ့ဝင် ဦးညီထွန်း