Skip to main content

 

မိမိတို့နိုင်ငံသည် ပါတီစုံဒီမိုကရေစီစနစ်ကို ဖော်ဆောင်နေကြောင်း အားလုံးအသိ ဖြစ်ကြောင်းကို ဖွဲ့စည်းအုပ်ချုပ်ပုံ အခြေခံဥပဒေပုဒ်မ ၇ တွင် ပြဆိုထားပြီး ဖြစ်ပါကြောင်း၊ ဒီမိုကရေစီစနစ်က လူထုကိုဗဟိုပြုမျက်နှာမူနေသည့်အတွက် နိုင်ငံ့အကြီးအကဲနှင့် အုပ်ချုပ်သူအစိုးရ ဝန်ကြီးချုပ်၊ ဝန်ကြီးများနှင့် လွှတ်တော်ကိုယ်စားလှယ်များက လူထုနှင့်ကျယ်ကျယ်ပြန့်ပြန့် တွေ့ဆုံဆွေးနွေးရန် လိုအပ်ပါကြောင်းနှင့် လူထုအစည်းအဝေးကြီးများလည်း ကျင်းပရန် လိုအပ်ပါကြောင်း၊ ၎င်းကဲ့သို့တွေ့ရန် မြို့နယ်တိုင်းတွင် လူထုများများဖြင့် ဥတုသုံးပါးမရွေး တွေ့ဆုံနိုင်သည့် မြို့တော်ခန်းမ လိုအပ်ပါကြောင်း၊ သို့သော် မိမိတို့မြို့နယ်တွင် မရှိပါကြောင်း၊ မြို့တော်ခန်းမ (Town Hall) ဆိုသည်မှာလည်း မြို့လယ်ခေါင်မှ တင့်တယ်မည် ဖြစ်ပါကြောင်း၊ ဆင်ခြေဖုံးများတွင် ဆောက်သည့် အမျိုးအစားထဲတွင် မပါပါကြောင်း၊ သံဖြူဇရပ် မြို့လယ်ခေါင်တွင်လည်း မြေနေရာမရှိတော့ပါကြောင်း၊ သို့သော်လည်း မြို့လယ်ခေါင် ပြည်ထောင်စုလမ်းမကြီးနံဘေး ကျောင်းပိုင်းရပ်ကွက်တွင် ကုန်သွယ်လယ်ယာဌာန မျက်နှာစာ ၈၄ ပေ အကျယ်၊ အရှည် ၂၉၀ ပေနှင့် ၂၅၇ ပေ ရှိပြီး ဝ.၆၅၅ ဧကရှိပါကြောင်း၊ ၎င်းနေရာတွင် ဆိုင်ခန်းများ ငှားစားပြီး မည်သည့်အတွက်မျှ အသုံးမပြုတော့သည့် ဂိုဒေါင်ပျက်ကြီးကိုလည်းကောင်း၊ ဆက်လျက်တွင် မြို့နယ်သမဝါယမ အသင်းစုပိုင် မျက်နှာစာ ၁၅၀ ပေ၊ အရှည် ၂၅၇ ပေတွင် မြေဧရိယာ ဝ.၆၂၉ ဧကကိုလည်း မျက်နှာစာဆိုင်ခန်း ငှားစားပြီး အသုံးမပြုတော့သည့် ဂိုဒေါင်ပျက်ကြီး ထားရှိသည်ကို တွေ့ရှိရပါကြောင်း၊ အကယ်၍ သမဝါယမအသင်းစုနှင့် ကုန်သယ်လယ်ယာကပါ အကြောင်းအမျိုးမျိုးပြပြီး စွန့်လွှတ်ရန်ငြင်းဆိုပါက ခ.လ.ရ (၆၂) အနီး စက်မှု (၂) က စွန့်လွှတ်မြေဧက ၄၀ နေရာတွင် အစားထိုးပြောင်းပေးရန် ရှိပါကြောင်း၊ အဆိုပါကိစ္စများကိုလည်း ပြည်နယ်ဝန်ကြီးချုပ်နှင့် တွေ့ဆုံတင်ပြခဲ့ပြီး ဖြစ်သော်လည်း ရန်ပုံငွေနည်းပါးသည့် ပြည်နယ်ဖြစ်သည့်အတွက် အဆိုပါမြို့တော် ခန်းမကြီးကို ပြည်ထောင်စုနှင့်ပြည်နယ် ပေါင်းစပ်ပြီး ဖော်ဆောင်ပေးလျှင် ဖြစ်နိုင်သည့်အတွက်ကြောင့် မိမိမှမေးခွန်း မေးမြန်းရခြင်း ဖြစ်ပါသည်။ အဆိုပါ ခန်းမကြီးဆောက်ပြီးလျှင် ကုန်ကျစရိတ်နှင့် ဝန်ထမ်းခများကိုလည်း ခန်းမငှားရမ်းခကနေပြီး‌သက်သောင့်သက်သာဖြင့် ဖြေရှင်းသွားနိုင်မည် ဖြစ်ပါကြောင်း၊ ထို့ကြောင့် အဆိုပါမေးခွန်းကို အကောင်အထည်ဖော်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။


 

 

မွန်ပြည်နယ်၊ သံဖြူဇရပ်မြို့၊ မြို့လယ်ခေါင် ပြည်ထောင်စုလမ်းနံဘေးတွင်ရှိသည့် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာန (ယခင်ကုန်သွယ်လယ်ယာ) ပိုင် သိုလှောင်ရုံအား ၁၉၇၆ ခုနှစ်တွင် လယ်ယာကိုင်းကျွန်းနှင့် ဥယျာဉ်ခြံမြေထွက်ကုန် ပစ္စည်းကုန်သွယ်ရေး ကော်ပိုရေးရှင်း လက်ထက်က တည်ဆောက်ခဲ့ပြီး ဆန်စပါးများဝယ်ယူ၍ သိုလှောင်ခဲ့ပါကြောင်း၊ အဆိုပါ သိုလှောင်ရုံကို နောက်ပိုင်းတွင် မြို့နယ်မန်နေဂျာရုံးအဖြစ် အသုံးပြုခဲ့ပါသည်။ မြန်မာ့လယ်ယာထွက်ကုန် ပစ္စည်းရောင်းဝယ်ရေးကို အဆင့်ဆင့်ပြောင်းလဲ ဖွဲ့စည်းခဲ့ရာ ၂၀၁၆ ခုနှစ်တွင် စားသုံးသူ ရေးရာဦးစီးဌာနအဖြစ် ပြောင်းလဲ ဖွဲ့စည်းခဲ့ပါကြောင်း၊

လက်ရှိစားသုံးသူရေးရာ ဦးစီးဌာနအနေဖြင့် စားသုံးသူအကာအကွယ်ပေးရေးနှင့် ပြည်တွင်းကုန်သွယ်မှု ဖွံ့ဖြိုးတိုးတက်ရေး လုပ်ငန်းများကို တစ်နိုင်ငံလုံးအတိုင်းအတာဖြင့် ဆောင်ရွက်လျက် ရှိပါကြောင်း၊ စားသုံးသူအကာအကွယ်ပေးရေးနှင့် ပတ်သက်၍ စားသုံးသူများမှ မိမိတို့၏နစ်နာမှုများအပေါ် သတင်းပို့ တိုင်ကြားလိုပါက အလွယ်တကူတိုင်ကြားနိုင်ပြီး ယင်းသို့တိုင်ကြားလာသည့် ကိစ္စရပ်များအပေါ် အမြန်ဆုံး တုံ့ပြန်ဖြေရှင်းပေးနိုင်ရန်အတွက် စားသုံးသူသတင်း ပြန်ကြားရေးနှင့် တိုင်ကြားမှု လက်ခံဆောင်ရွက်ရေး ဌာနများကိုလည်း တိုင်းဒေသကြီး/ပြည်နယ်များရှိ မြို့နယ်များတွင် ဖွင့်လှစ်ဆောင်ရွက်လျက် ရှိပါကြောင်း၊

လွှတ်တော်ကိုယ်စားလှယ်မှ တင်ပြခဲ့သည့် သံဖြူဇရပ်မြို့လယ်ခေါင်ရှိ စီးပွားရေးနှင့်ကူးသန်း ရောင်းဝယ်ရေး ဝန်ကြီးဌာန၊ စားသုံးသူရေးရာ ဦးစီးဌာနပိုင် သိုလှောင်ရုံကို လက်ရှိတွင် စားသုံးသူရေးရာ ဦးစီးဌာန၏ မြို့နယ်တာဝန်ခံ ရုံးအဖြစ်ဖွင့်လှစ် ဆောင်ရွက်လျက် ရှိပါကြောင်း၊ အဆိုပါရုံးတွင် စားသုံးသူ သတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးဌာနကို ဖွင့်လှစ်သွားရန် စီမံဆောင်ရွက် လျက်ရှိပါကြောင်း၊ သို့ဖြစ်ပါ၍ သံဖြူဇရပ်မြို့ရှိ စားသုံးသူရေးရာဦးစီးဌာန၏ အဆောက်အအုံကို နိုင်ငံတော်အတွက် အရေးပါသောလုပ်ငန်းများ ဆောင်ရွက်နေသည့်အတွက် လွှဲပြောင်းပေးအပ်နိုင်ခြင်း မရှိပါကြောင်း၊

လွှတ်တော်ကိုယ်စားလှယ်ကြီး ဆွေးနွေးမှုတွင် ပါဝင်သည့် သံဖြူဇရပ်မြို့လယ်ခေါင်ရှိ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမဝါယမအသင်းစုပိုင် မြေသည် ၅-၂-၂၀၀၁ ရက်နေ့တွင် မြို့နယ်သမဝါယမ အသင်းစုပိုင်လီမိတက် ဥက္ကဋ္ဌဖြစ်သူ ဦးနီက မြို့နယ်တရားရုံး တရားသူကြီးရှေ့မှောက်၌ အသင်းပိုင်ဆိုင်ကြောင်း မြွတ်ဟ၍ ကျမ်းကျိန်ဆိုပြီး ရယူခဲ့သည့်မြေ ဖြစ်ပါကြောင်း၊ ယင်း မြို့နယ်သမဝါယမ အသင်းစုပိုင် မြေဧရိယာ ဝ.၈၂ ဧကအနက် ဧရိယာ ဝ.၁၉၁ ဧကကို သမဝါယမပိုင် အဆောက်အဦနှင့် မြေအဖြစ် လွှဲပြောင်းပေးခဲ့သည့်အတွက် လက်ရှိသံဖြူဇရပ်မြို့နယ် သမဝါယမဦးစီးဌာနရုံးကို ဖွင့်လှစ် ဆောင်ရွက်လျက် ရှိပါကြောင်း၊ ကျန်ရှိမြေ ဝ.၆၂၉ ဧကပေါ်တွင် (၄၀ ပေ x ၁၀၀ ပေ) ဂိုဒေါင်နှင့် ပြည်ထောင်စုလမ်းမကြီး၏ ဘေးလမ်းမဘက် မျက်နှာမူ၌ ဆိုင်ခန်း ၁၄ ခန်း ဆောက်လုပ်ထားရှိပါကြောင်း၊ ဂိုဒေါင်တွင် ဓာတ်မြေသြဇာသိုလှောင်ဖြန့်ဖြူး ရောင်းချခြင်းလုပ်ငန်း ဆောင်ရွက်လျက် ရှိပါကြောင်း၊ ငှားရမ်းထားသော ဆိုင်ခန်းများကိုလည်း စာချုပ်သက်တမ်းပြည့်သဖြင့် ဖယ်ရှားပြီး ဖြစ်ပါကြောင်း၊ အဆိုပါ ဆိုင်ခန်းများ နေရာတွင် ဂိုဒေါင်ကိုဖျက်သိမ်းပြီး ဧည့်ရိပ်သာအဖြစ် ပြုပြင်ဆောက်လုပ်ရန် စီစဉ်ဆောင်ရွက် လျက်ရှိပါကြောင်း၊

သံဖြူဇရပ်မြို့နယ် သမဝါယမအသင်းစုသည် အသေးစားအရင်းအနှီး ချေးငွေလုပ်ငန်း၊ လယ်ယာသုံး၊ လုပ်ငန်းသုံးနှင့် ရေလုပ်ငန်းသုံးပစ္စည်းများ အရစ်ကျရောင်းချခြင်းလုပ်ငန်း၊ သွင်းအားစုများဖြန့်ဖြူး ရောင်းချခြင်းလုပ်ငန်း၊ လယ်ယာဝန်ဆောင်မှု အထောက်အကူပြုလုပ်ငန်း၊ လယ်ယာမြေ အဆင့်မြှင့်တင်ခြင်း လုပ်ငန်းများကို ဆောင်ရွက်လျက်ရှိပြီး မြို့နယ်အတွင်းရှိ သမဝါယမအသင်းပေါင်း ၆၇ သင်း၊ အသင်းသား ဦးရေ ၅၄၅၅ ဦးအတွက် လူမှုစီးပွားရေးမြှင့်တင်မှု လုပ်ငန်းများကို  ဆောင်ရွက်ပေးနေပါကြောင်း၊

သို့ဖြစ်ပါ၍ မြို့နယ်သမဝါယမအသင်းစုပိုင် မြေနေရာနှင့်ပတ်သက်၍ လက်ရှိတွင် ဓာတ်မြေသြဇာ သိုလှောင်ဖြန့်ဖြူး ရောင်းချခြင်းလုပ်ငန်း ဆောင်ရွက်နေခြင်းကြောင့်လည်းကောင်း၊ သမဝါယမအသင်း၏ လုပ်ငန်းများစဉ် ဆက်မပြတ် ရှင်သန်ဖွံ့ဖြိုးအောင် ဆောင်ရွက်ရေးနှင်‌့ ရေရှည်ရပ်တည်နိုင်ရေးအတွက် စီစဉ်ဆောင်ရွက်လျက်ရှိခြင်း တို့ကြောင့်လည်းကောင်း စွန့်လွှတ်ပေးနိုင်ခြင်း မရှိပါကြောင်း၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ဖြေကြားထားသည်ကို သိရှိရပါကြောင်း၊

ထို့ကြောင့် မွန်ပြည်နယ်၊ သံဖြူဇရပ်မြို့နယ်အတွက် လွန်စွာလိုအပ်လျက်ရှိသည့် မြို့တော်ခန်းမ တည်ဆောက်ပေးရန် အစီအစဉ်ရှိ/မရှိနှင့် ပတ်သက်၍ မွန်ပြည်နယ်အစိုးရအနေဖြင့် မြို့စီမံကိန်း (Town Plan) ရေးဆွဲရာတွင် သံဖြူဇရပ်မြို့နယ် ဖောင်စိန်ကျေးရွာရှိ စက်မှုဝန်ကြီးဌာနက စွန့်လွှတ်သည့် မြေဧက ၄၀ နေရာတွင် သံဖြူဇရပ်ခန်းမတည်ဆောက်ရန် မြို့စီမံကိန်းတွင်  ထည့်သွင်းရေးဆွဲထားပြီး ဖြစ်ပါကြောင်း ရှင်းလင်းဖြေကြားပါသည်။

ဦးဉာဏ်ဟိန်း (သံဖြူဇရပ်မဲဆန္ဒနယ်) က ဆက်စပ်မေးခွန်း မေးမြန်းပါသည်။

မြို့တော်ခန်းမဆိုသည်မှာ မြို့လယ်ခေါင်တွင်ရှိသည့် တင့်တယ်သည့် အမျိုးအစားဖြစ်သည်ဟု မိမိဖော်ပြခဲ့ ပါကြောင်း၊ ခုနကပြောသွားသည့် ကုန်သွယ်လယ်ယာရော၊ မြို့နယ်သမဝါယမရုံးအတွက်ကို လုပ်ငန်းများကို ခုနကတင်ပြခဲ့သည့် ဖောင်စိန်ရပ်ကွက်၊ ခ.လ.ရ (၆၂) ၏ ရှေ့တွင် ရှိပါကြောင်း၊ လုံခြုံရေးလည်း အလွန်ကောင်းပါကြောင်း၊ ခုနကပြောသည့် ကုန်သွယ်လယ်ယာ ဂိုဒေါင်အတွက်လည်း စိတ်ချရပါကြောင်း၊ ထို့ကြောင့် မိမိမေးစဉ်ကတည်းက ၎င်းကိုထည့်သွင်း မေးထားပြီးဖြစ်ပါကြောင်း၊ ထို့ကြောင့် မိမိမှ သက်ဆိုင်သည့် ပြည်နယ်အစိုးရနှင့်လည်း ညှိနှိုင်းထားပြီး ဖြစ်ပါကြောင်း၊ အဆိုပါဧက ၄၀ စွန့်လွှတ်မြေတွင် မူလလျာထားသည်မှာ မြို့တော်ခန်းမ မဟုတ်ပါကြောင်း၊ သာသနာ့ဗိမ္မာန် ဖြစ်ပါကြောင်း၊ မြို့တော်ခန်းမ ဆိုသည်မှာ မိမိတို့ခုနကပြောခဲ့သည့် လူထုအစည်းအဝေးကြီးများ လုပ်ရန်အတွက်ဖြစ်ပါကြောင်း၊ တရားနာ၊ တရားဟောဖို့အတွက် မဟုတ်ပါကြောင်း၊ ထို့ကြောင့် မိမိတင်ပြခဲ့သည့်အဆိုကို ပြန်လည်စဉ်းစားပေးရန် ဆက်စပ်မေးခွန်း မေးမြန်းပါသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး

မိမိတို့မေးခွန်းကို ဖြေကြားသည့်အခါ မိမိတို့၏ဝန်ကြီးဌာန စိုက်ပျိုးရေး၊ မွေးမြူရေးနှင့်ဆည်မြောင်း ဝန်ကြီးဌာနတို့၏ သဘောထား၊ မွန်ပြည်နယ်အစိုးရ၏ သဘောထားများကို မိမိအနေဖြင့် ပေါင်းစပ်ဖြေကြား သွားခြင်း ဖြစ်ပါကြောင်း၊ မိမိတို့ဝန်ကြီးဌာနအနေဖြင့် လုပ်ပေးနိုင်သည့် အချက်တစ်ချက် ရှိပါကြောင်း၊ ၎င်းက ကျိုက္ခမီ-စက်စဲ-သံဖြူဇရပ် ကားလမ်းဘေးတွင်ရှိသည့် မွန်ပြည်နယ်၊ မော်လမြိုင်ခရိုင်၊ သံဖြူဇရပ်မြို့နယ်၊ ကြာကန်ရပ်ကွက်တွင် မြေ ၃.၇၈ ဧကအား ဌာနမှအသုံးပြုရန် မလိုအပ်သည့်အတွက် နိုင်ငံတော်ကို အပ်နှံခဲ့ပြီး ဖြစ်ပါကြောင်း၊ ပြည်ထဲရေးဝန်ကြီးဌာနကလည်း အဆိုပါမြေကို နိုင်ငံတော်ပိုင်မြေ (State Land) အဖြစ် ၂၁-၁၂-၂၀၁၈ ရက်နေ့တွင် အမိန့်ကြော်ငြာစာ ထုတ်ပြန်သတ်မှတ်ထားပြီး ဖြစ်ပါကြောင်း၊ အဆိုပါမြေအား မြို့တော်ခန်းမ ဆောက်လုပ်ရန်အတွက် အသုံးပြုလိုပါက သက်ဆိုင်ရာမြေယာ စီမံခန့်ခွဲမှုကော်မတီကို ညှိနှိုင်း တောင်းခံ ဆောင်ရွက်သင့်ပါကြောင်း ရှင်းလင်းဖြေကြားပါသည်။

 

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး