Skip to main content

 

အိန္ဒု-ဂျိုင်း-ကော့ကရိတ်လမ်းမကြီးအား ကောင်းမွန်သည့်အစီအမံများနှင့် ပြုပြင်ဆောင်ရွက်နေခြင်း ဖြစ်ပါကြောင်း၊ လမ်းပန်းဆက်သွယ်ရေး အနေဖြင့် သွားလာနိုင်သည့်မြို့များမှာ ဘားအံမှ အိန္ဒု၊ အိန္ဒုမှ ဂျိုင်း၊ ဂျိုင်းမှ ကော့ကရိတ်၊ မြဝတီသို့ ဆက်သွယ်သွားလာနိုင်သကဲ့သို့ အိန္ဒုကနေ မွန်ပြည်နယ် သထုံ၊ မော်လမြိုင်မြို့များမှတစ်ဆင့် ရန်ကုန်မြို့အထိ ပေါက်ရောက်သွားလာနိုင်ခြင်းကြောင့် အာရှလမ်းကြီး၏ ဒုတိယပိုင်းဟုလည်း ခေါ်ဆိုကြပါကြောင်း၊ ၎င်းမှာ စီမံကိန်း၏အချက် အလက်များကို ဖော်ပြထားခြင်းဖြစ်ပြီး လမ်းမကြီး၏ ပြုပြင်ခြင်းကို ဇူလိုင်လ ၄-၇-၂၀၁၆ ရက်နေ့တွင် စတင်ခဲ့သော်လည်း လုပ်ငန်းမပြီးဆုံးမီ ၂၀၁၇ ခုနှစ်အတွင်း ရပ်ဆိုင်းထားခဲ့ရာက ယနေ့ထက်တိုင် ဖြစ်ပါကြောင်း၊ အိန္ဒု-ကော့ကရိတ် လမ်းပိုင်းတွင် မိုးရာသီကာလအတွင်း လမ်း၊ တံတားပျက်စီးနေမှုများကို တွေ့ရှိရပါကြောင်း၊ အဆိုပါ အိန္ဒု-ဂျိုင်း-ကော့ကရိတ်လမ်းမကြီးသည် တစ်နေ့လျှင် ကားအစီးရေ ၃၀၀၀ ခန့် ဖြတ်သန်းသွားလာလျက်ရှိပြီး ပျက်စီးနေခြင်းကြောင့် မြေပြင်အခြေအနေမှာ ၁၂ ဘီးကား၊ ၂၂ ဘီးကားများမှာ လမ်းပိတ်ထားမှုကြောင့် အိန္ဒုကျေးရွာအတွင်းလမ်းကို အသုံးပြုကြသည့်အတွက် ကျေးရွာလမ်းများ ပျက်စီးမှုကိုလည်း ဖြစ်စေပါကြောင်း၊ ကရင်ပြည်နယ်တွင် လေယာဉ်လမ်း၊ မီးရထားလမ်း၊ ရေကြောင်းလမ်းများမရှိပါကြောင်း၊ အဆိုပါကုန်းလမ်းတစ်ခုကိုသာ အားကိုးအားထား ပြုနေရခြင်းကြောင့် အိန္ဒု-ဂျိုင်း-ကော့ကရိတ်လမ်းမကြီး ကောင်းမွန်ရန်မှာလည်း ဒေသတစ်ခုလုံးအတွက် အရေးကြီးပါကြောင်း၊ ထို့အပြင် ကရင်ပြည်နယ်အစိုးရအဖွဲ့၏ စီမံခန့်ခွဲနိုင်ခြင်းမရှိကြောင်းကိုလည်း သိရှိထားပြီး ဖြစ်သောကြောင့် ပြည်သူလူထု၏ ဆန္ဒအရ အိန္ဒု-ဂျိုင်း-ကော့ကရိတ်လမ်းမကြီးအား အမြန်ဆုံးပြီးစီးအောင် ဆောင်ရွက်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။


 

သထုံ-ဘားအံ-ကော့ကရိတ်-မြဝတီ လမ်း၏ အိန္ဒု-ကော့ကရိတ် လမ်းပိုင်းအား ADB ထံမှ ချေးငွေအမျိုးအစား နှစ်မျိုးဖြစ်သော Asian Development Fund ချေးငွေကာလ ၃၂ နှစ်နှင့် ASEAN Infrastructure Fund ချေးငွေကာလ ၂၀ နှစ် စုစုပေါင်း ကုန်ကျငွေ အမေရိကန်ဒေါ်လာသန်း ၁၂၀ ဖြင့် စီမံကိန်းနှင့်ဘဏ္ဍာရေးဝန်ကြီးဌာနက ချေးငွေစာချုပ်ချုပ်ဆို ဆောင်ရွက်ခဲ့ပါကြောင်း၊ ဆောက်လုပ်ရေး ဝန်ကြီးဌာနအနေဖြင့် Project Management Unit (PMU) ဖွဲ့စည်းထားပြီး စီမံကိန်း အကောင်အထည်ဖော်ရန် စီမံခန့်ခွဲမှုများကို ဆောင်ရွက်ပါကြောင်း၊ PMU  အဖွဲ့အစည်းမှ Construction Supervision Consultant နှင့် ကန်ထရိုက်တာ တို့ကိုခန့်အပ်ပြီး ကန်ထရိုက်တာကို လုပ်ငန်းစတင်ဆောင်ရွက်စေခဲ့ကာ ၎င်း Consultant မှ လုပ်ငန်းအရည်အသွေး ကြီးကြပ်ကွပ်ကဲခြင်း၊ နည်းပညာဆိုင်ရာ စံချိန်စံညွှန်းများကို ကြီးကြပ်ကွပ်ကဲခြင်းနှင့် ကန်ထရိုက်တာမှ Request For Inspection တင်ပြလာသည့် လုပ်ငန်းအပေါ် စစ်ဆေးခြင်း၊ ကန်ထရိုက်တာမှ တင်ပြလာသည့် Payment Application များကို စိစစ်တွက်ချက်ပြီး Interim Payment Certificate ထုတ်ပေး၍ PMU မှတစ်ဆင့် ADB ကို ဆက်လက်ပေးပို့ရပါကြောင်း၊ ထို့နောက် ADB မှ သက်ဆိုင်ရာ ကန်ထရိုက်တာနှင့် Consultant ကို တိုက်ရိုက် ငွေပေးချေသည့်စနစ်ဖြင့် ဆောင်ရွက်နေခြင်း ဖြစ်ပါကြောင်း၊ အဆိုပါ အိန္ဒု-ကော့ကရိတ်လမ်း အဆင့်မြှင့်တင်ရေးစီမံကိန်းမှာ ဘားအံခရိုင်အပိုင်း ၄၀.၄၄ ကီလိုမီတာနှင့် ကော့ကရိတ်ခရိုင်အပိုင်း ၂၄.၂၉၅ ကီလိုမီတာတို့တွင် ၁၈ ကီလိုမီတာအား လမ်းတာပေါင် မြှင့်တင်ခြင်း၊ လမ်းအန္တရာယ်ကွေ့ ၁၅ ကီလိုမီတာခန့်အား လမ်းအူကြောင်းပြုပြင်ခြင်း၊ လမ်းဆုံရှစ်ခုအား အဆင့်မြှင့်တင်ခြင်း၊ လမ်းအား မော်တော်ဆိုင်ကယ်လမ်း အပါအဝင် တည်ဆောက်ခြင်း၊ စာသင်ကျောင်း၊ ရုံးများ၊ ဈေးများရှေ့တွင် လမ်းအန္တရာယ်ကင်းရှင်းရေး ဆောင်ရွက်ခြင်းနှင့် ကျုံဒိုးဆိပ်ကမ်းပတ်လည်လမ်း ၇၀၀ မီတာခန့်အား ကွန်ကရစ်လမ်းခင်းခြင်း စသည်တို့ကို ဆောင်ရွက်ရန်အတွက် International Competitive Bidding စနစ်ဖြင့် လုပ်ငန်းတင်ဒါအောင်မြင်သည့် ကန်ထရိုက်တာ China Road and Bridge Corporation (CRBC) ကို တာဝန်ပေးဆောင်ရွက်စေခဲ့ပါကြောင်း၊ ၎င်း CRBC က လုပ်ငန်း စတင်သည့် ၂၀၁၆ ခုနှစ် ဒီဇင်ဘာလတွင် ငြိမ်းချမ်းရေးရယူထားသော အဖွဲ့အစည်းဖြစ်သည့် ချစ်လင်းမြိုင် ကုမ္ပဏီအား စီမံကိန်းအတွက် လိုအပ်သောကျောက်များကို လွန်းညကျောက်တောင်မှ ထုတ်ယူရန် Sub-contractor အဖြစ် စာချုပ်ချုပ်ဆိုဆောင်ရွက်စေခဲ့ပါကြောင်း၊

အဆိုပါလွန်းညကျောက်တောင်မှ ကျောက်များကို ချစ်လင်းမြိုင်ကုမ္ပဏီမှ ကျောက်ထုတ်လုပ်နေစဉ် အတွင်း ဒေသခံပြည်သူလူထုနှင့် ထိပ်တိုက်တွေ့ဆုံ မှုများ ဖြစ်ပွားခဲ့ပြီး ဒေသခံများ၏ ဆန္ဒပြမှုများနှင့် တွေ့ကြုံခဲ့ရပါကြောင်း၊ အဆိုပါ ဒေသခံများ၏ဆန္ဒပြမှုကို ဟောင်ကောင်တွင်ထုတ်ဝေသည့် Frontier မဂ္ဂဇင်း၏မျက်နှာဖုံးတွင် နှစ်ကြိမ်တိုင်တိုင် ဖော်ပြပါရှိလာသည့်တွက် ဖိလစ်ပိုင်နိုင်ငံအခြေစိုက် ADB ဌာနချုပ်မှ မြန်မာနိုင်ငံ ADB တာဝန်ခံပုဂ္ဂိုလ်ကို လွန်းညကျောက်တောင်မှထုတ်သည့် ကျောက်များကို လုံးဝထုတ်ယူခြင်းမပြုဘဲ အခြားကျောက်မိုင်းတွင်းများကို ထပ်မံရှာဖွေဆောင်ရွက်ရန်အတွက် အကြောင်းကြားစာ ပေးပို့လာပါကြောင်း၊ အဆိုပါ အကြောင်းကြားစာကို ADB National တာဝန်ခံမှ ဆောက်လုပ်ရေးဝန်ကြီးဌာနကို ဆက်လက်ပေးပို့ပါကြောင်း၊ အဆိုပါကိစ္စရပ်နှင့်ပတ်သက်၍ ကရင်ပြည်နယ် အစိုးရအဖွဲ့ကလည်း လွန်းညကျောက်တောင်သည် လုပ်ငန်းခွင်နှင့်အနီးကပ်ဆုံး နေရာတွင် တည်ရှိပြီး  ဒေသခံပြည်သူများနှင့်လည်း ညှိနှိုင်း၍ နားလည်မှုရရှိသွားပြီး ဖြစ်ပါကြောင်း၊ EIA, SIA လည်း ပြီးစီးပြီဖြစ်နေသောကြောင့် လွန်းညကျောက်တောင်မှ ကျောက်များကို ဆက်လက်အသုံးပြုခွင့် ပေးရန် ကရင်ပြည်နယ်အစိုးရအဖွဲ့က ADB နှင့်ညှိနှိုင်းပေးရန် ဆောက်လုပ်ရေးဝန်ကြီးဌာနကို ညှိနှိုင်းလာခဲ့ပါကြောင်း၊ အဆိုပါ ညှိနှိုင်းလာချက်ကို မိမိအနေဖြင့် ပထမဦးစွာ နယ်မြေခံ ADB၊ နိုင်ငံ့ ADB တာဝန်ခံနှင့် မြန်မာနိုင်ငံတာဝန်ခံ ညှိနှိုင်းသည့်အခါ အဆိုပါတာဝန်ခံမှတစ်ဆင့် ADB ဌာနချုပ်ကို ပေးပို့ခဲ့ပါကြောင်း၊ သို့သော်လည်း မနီလာရှိ ADB ဌာနချုပ်မှ လွန်းညကျောက်တောင်မှလွဲ၍ အခြားကျောက်ကိုသုံးရန် စာထပ်မံရောက်လာသည့်အတွက် ဆောက်လုပ်ရေးဝန်ကြီးဌာန ပြည်ထောင်စုဝန်ကြီး၊ ဒုတိယဝန်ကြီး နှင့် မိမိတို့ကိုယ်တိုင် ADB ဌာနချုပ် တာဝန်ရှိသူများနှင့် အကြိမ်ကြိမ်ညှိနှိုင်းပါသော်လည်း လွန်းညကျောက်တောင်မှလွဲ၍ မည်သည့်ကျောက်မဆို သုံး၍ရကြောင်း ADB ဌာနချုပ်က အကြောင်းပြန်လာပါကြောင်း၊ လွန်းညကျောက်ကို လုံးဝအသုံးပြုခွင့်မပေးနိုင်ဟု အဆိုပါ ADB က ရရှိသည့် အကြောင်းကြားစာကို ကရင်ပြည်နယ်အစိုးရအဖွဲ့သို့ ဆက်လက်ပေးပို့ပြီး ဒေသအတွင်းရှိ ဖြစ်နိုင်ဖွယ်ရှိသည့် ကျောက်စခန်းများကို မိမိတို့ရှာဖွေခဲ့ပါကြောင်း၊ ကရင်ပြည်နယ်အတွင်း၊ မွန်ပြည်နယ်အတွင်း ရှိ ကျောက်တောင်များအားလုံးကို ရှာဖွေပြီး အရည်အသွေးစမ်းသပ်ချက်များ ဆောင်ရွက်ခဲ့ပါကြောင်း၊ ထိုသို့ဆောင်ရွက်သည့်အခါ အရည်အသွေးအကောင်းဆုံးဖြစ်သည့် စံဖရီးကျောက်မိုင်းကို လောလောဆယ် ရွေးချယ်ထားပြီး စံဖရီးကျောက်မိုင်းက ၎င်းကျောက်များကို စမ်းသပ်သောအခါ စံချိန်မီသည့်အတွက် ၎င်းကျောက်မိုင်းမှ ထုတ်လုပ်ခွင့်အတွက် ယခုအခါ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနနှင့် သက်ဆိုင်ရာဌာနများကို ပေးပို့၍ တရားဝင်ခွင့်ပြုချက်ရရန်၊ EIA, SIA ခွင့်ပြုချက်များရရှိရန် ညှိနှိုင်းပြီး စာများပေးပို့ထားပါကြောင်း၊ အဆိုပါ စံဖရီးကျောက်မိုင်းမှ ကျောက်များ အသုံးပြုခွင့်ရရှိရေး ညှိနှိုင်းခွင့်ပြုချက်များ ရရှိပြီးလျှင်  လွန်းညကျောက်တောင်တွင် တပ်ဆင်ထားသည့် မိုင်းခွဲကိရိယာများ၊ ကျောက်ထုတ်သည့် စက်များအားလုံးကို စံဖရီးကျောက်မိုင်းသို့ရွှေ့၍ စံဖရီးကျောက်မိုင်းတွင် ကျောက်ထုတ်သည့်လုပ်ငန်း ပြန်လည်စတင်ပြီး ထုတ်လုပ်ရရှိသည့် ကျောက်များဖြင့် အဆိုပါ လမ်းမကြီးကို ဆောင်ရွက်သွားမည် ဖြစ်ပါကြောင်း၊

သထုံ-ဘားအံ-ကော့ကရိတ်-မြဝတီလမ်းပေါ်ရှိ ဂျိုင်းကျေးရွာအနီး ပွန်တွန်းဘောတံတားဟူ၍ ရှိပါကြောင်း၊ ပွန်တွန်းဘောတံတားနှင့်  ကော့ကရိတ်ကြိုးတံတား၊ ကော့ကရိတ်ကြိုးတံတားမှာ ခံနိုင်ဝန် ၁၃ တန်သာရှိသောကြောင့် ၁၃ တန်ထက် ကျော်လွန်သည့် ယာဉ်ကြီးများ အဆိုပါ ကြိုးတံတားအနီးရှိ ယာဉ်ကြီးများကို ပွန်တွန်းဘောတံတားပေါ်မှ ဖြတ်သန်းစေကြောင်း၊ ဂျိုင်းတံတား၊ ကော့ကရိတ်တံတားတွင် JICA ထံမှ ဂျပန်ချေးငွေယန်း ၁၁၂၉၀ သန်းဖြင့် သုံးနှစ်အတွင်း တံတားအသစ်တစ်စင်းကို JICA Loan ဖြင့် အသစ်တည်ဆောက်သွားမည် ဖြစ်ပါကြောင်း၊ တံတားအသစ် တည်ဆောက်ချိန်ကာလ သုံးနှစ်အတွင်း ပွန်တွန်းဘောတံတားပေါ်မှ ဖြတ်သန်းခွင့်ပြုသွားမည် ဖြစ်ပြီး ပွန်တွန်းဘောတံတားမှာ မြန်မာသစ်တောက်ငှက်ကုမ္ပဏီက ၎င်းတို့အစီအစဉ်ဖြင့် တည်ဆောက်ပြီး နိုင်ငံတော်ကို တစ်နှစ်လျှင် ကျပ်သိန်း ၇၀၀၀ ကျော် လေလံကြေးပေးသွင်း၍ တံတားဖြတ်သန်းခ ကောက်ခံနေခြင်းဖြစ်ပါကြောင်း၊ တံတားဖြတ်သန်းခမှာ ၆ ဘီးကား ၂၅ တန်မှအထက်ကို ၃၀ တန်ထိ ၁၅၀၀၀ ကျပ် ကောက်ပါကြောင်း၊ ၁၀ ဘီးကား တန် ၃၀ မှ ၃၅ တန်အထိ ၂၀၀၀၀ ကျပ်နှင့် ၁၂ ဘီး၊ ၁၄ ဘီး၊ ၂၂ ဘီးကားအထိ ၄၂ တန်အထိကို ၂၅၀၀၀ ကျပ်ကောက်ပါကြောင်း၊ ထိုသို့ကောက်လျက်ရှိသည်မှ ၄၂ တန်ကျော်လျှင် ၂၀၀၀၀ ကောက်သည်နှင့် ယခုသက်ဆိုင်ရာကုန်သည်များနှင့် အချင်းများခြင်းကို ကရင်ပြည်နယ် အစိုးရအဖွဲ့မှ ညှိနှိုင်းပြီး ၅၀၀၀ ကျပ်နှုန်းကောက်ရန် သဘောတူပြေလည်မှုရရှိ သွားပြီဖြစ်ပါကြောင်း၊

ကရင်ပြည်နယ်အတွင်းရှိ အိန္ဒု-ဂျိုင်း-ကော့ကရိတ်လမ်းမကြီးကို အမြန်ဆုံးပြီးစီးရေးအတွက် ဆောက်လုပ်ရေးဝန်ကြီးဌာနနှင့် ကရင်ပြည်နယ် အစိုးရအဖွဲ့တို့ ပူးပေါင်းညှိနှိုင်းပြီး ADB နှင့်ညှိနှိုင်းစီမံ ဆောင်ရွက်လျက်ရှိပါကြောင်း ရှင်းလင်းဖြေကြားပါသည်။

ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်း