Skip to main content

 

မကွီအိမ်နူးမြို့သည် အစိုးရသစ်လက်ထက်တွင် မြို့အဖြစ်အဆင့်တိုးမြှင့် သတ်မှတ်ပေးခဲ့ခြင်း ဖြစ်ပါကြောင်း၊ မင်းတပ်၊ မတူပီ၊ ကန်ပက်လက်၊ ပလက်ဝ လေးမြို့၏အဆုံတွင် တည်ရှိပြီး ပထဝီသဘောအရ အလွန်အချက်အချာကျသည့် နေရာတွင် တည်ရှိသော မြို့ဖြစ်ပါကြောင်း၊ မကွီအိမ်နူး မြို့နှင့်ထိစပ်လျက်ရှိသည့် မြို့နယ်လေးမြို့နယ်သည် အနည်းဆုံး မိုင် ၇၀ ကျော်မှ မိုင် ၉၀ ကျော်အထိ ဝေးကွာသည့်နေရာတွင် တည်ရှိသောကြောင့် အလွန်ချောင်ကျပြီး ခေါင်ကျလှသည့်နေရာမျိုး ဖြစ်ပါကြောင်း၊ မကွီအိမ်နူးမြို့အပါအဝင် မင်းတပ်၊ မတူပီ၊ ကန်ပက်လက်၊ ပလက်ဝ လေးမြို့နယ်တွင် ရှိသည့် ဒေသခံတိုင်းရင်းသားများအတွက် ကျန်းမာရေးစောင့်ရှောက်မှု အလွန်ခက်ခဲ လျက်ရှိပါကြောင်း၊ တခါတရံ ကျန်းမာရေး အခြေအနေကြောင့် မြို့ကိုတက်ပြီး ဆေးကုသသည့်အခါ အဆင်မသင့်သော အချိန်တွင် လမ်းခရီးမှာလူနာများ အသက်ဆုံးရှုံးမှု အကြိမ်များစွာ ကြုံတွေ့ခဲ့ရပါကြောင်း၊ ထို့ကြောင့် မကွီအိမ်နူးမြို့တွင် ၁၆ ခုတင်ဆံ့ဆေးရုံမဖြစ်မနေ တည်ဆောက်ပေးရန် လိုအပ်နေပြီ ဖြစ်ပါကြောင်း၊ တည်ဆောက်ပေးရန်လည်း အချိန်တန်ပြီဖြစ်ပါကြောင်း၊ အကြောင်းမှာ မကွီအိမ်နူးမြို့မဖြစ်ခင် မကွီအိမ်နူး ကျေးရွာတုန်းက ယခင်အစိုးရလက်ထက် တိုက်နယ်ဆေးရုံ အဖြစ် ဘတ်ဂျက်ငွေ ချထားပေးခဲ့သော်လည်း အကြောင်းအမျိုးမျိုးကြောင့် တည်ဆောက်ပေး နိုင်ခြင်းမရှိဘဲ ဘတ်ဂျက်ကို ပြန်လည်သိမ်းယူ သွားသည့်အတွက် ဒေသခံတိုင်းရင်းသား ပြည်သူများ ယနေ့အချိန်အထိ စိတ်ခံစားချက်များ ရှိနေသေးပါကြောင်း၊ မြင်သာမြင်ရမကြင်ရ၊ နီးလျက်နှင့်ဝေး ဆိုသကဲ့သို့ ထမင်းလုတ်ကို ပါးစပ်ထဲခွံ့ခါနီးမှ လက်ကိုပုတ်ချသကဲ့သို့ ခံစားရခြင်းမျိုး ခံစားနေရပါကြောင်း၊ ထို့အပြင် တိုင်းရင်းသားပြည်သူများ၏ ရင်ထဲ၊ အသည်းထဲတွင် ဆူးညှောင့်လေးတစ်ခုကို ရိုက်ထည့်လိုက်သကဲ့သို့ ပြန်နုတ်မပေးဘဲ၊ ကုစားမပေးဘဲ ခံစားနေရသောကြောင့် ယနေ့အချိန်အထိ မျက်တက်မျက်တက်နှင့် ခံစားနေရသည့် ဝေဒနာကို ကြုံတွေ့နေရပါကြောင်း၊ ထို့ကြောင့် ဒေသခံတိုင်းရင်းသား ပြည်သူများသည် ယခင်အစိုးရ လက်ထက်ခံစားခဲ့ရသည့် ဤခံစားချက်များကို ယခုအစိုးရသစ်လက်ထက်တွင်  ပြန်လည်ကုစား ပေးလိမ့်မည်ဟု မျှော်လင့်စောင့်စား နေကြပါကြောင်း၊ မကွီအိမ်နူးမြို့တွင် လူနာနည်းကြောင်း၊ မြို့ပြဖွံ့ဖြိုးမှုနှင့် ရေရရှိရေးကို အခြေခံ၍သော်လည်းကောင်း၊ သို့မဟုတ် မီးရရှိရေးကိုအခြေခံ၍ ဆောင်ရွက်ပေးမည် ဆိုပါက တိုင်းရင်းသားဒေသများအတွက် ရှေ့ဆက်ဆောင်ရွက်ရန် အခက်အခဲများ ရှိနိုင်ပါကြောင်း၊

ဆေးရုံမရှိလျှင် လူနာမရှိပါကြောင်း၊ မြို့ပြဖွံ့ဖြိုးမှုများ၊ ရေရရှိမှ၊ မီးရရှိမှလုပ်ပေးမည်ဆိုလျှင် မကွီအိမ်နူး မြို့သည် လမ်း၊ ကျောင်း၊ တံတား၊ ဆေးရုံတို့ကို အခြေခံပြီးမှသာလျှင် မြို့ပြဖွံ့ဖြိုးမှုကို တည်ဆောက်နေရသည့် မြို့ဖြစ်သောကြောင့် ဖြစ်ပါကြောင်း၊ ပြည်ထောင်စုဝန်ကြီးက ၇-၂-၂၀၁၈ ရက်နေ့ လွန်ခဲ့သည့် တစ်နှစ်ပိုင်းခန့်က ထန်တလန်မြို့နယ်ထဲမှ ဒေါ်နီရွှေလျန်းနှင့် ဒေါက်တာ ဆလိုင်းရီရန်းဗဲလ်တို့၏ မေးခွန်းများအပေါ် ဖြေကြားသွားသည်ကို တိုင်းရင်းသားများက မှတ်သား ထားပါကြောင်း၊ ဝန်ကြီးဖြေကြားသွားသည်မှာ ယခင်က ချင်းပြည်နယ်အတွက်ဆိုလျှင် လူဦးရေကိုလည်း လျှော့ပေါ့ပြီး စဉ်းစားခဲ့ပါကြောင်း၊ ချင်းပြည်နယ်သည် ကျန်းမာရေး စောင့်ရှောက်မှု အလွန်ခက်ခဲသောကြောင့် အထူးဦးစားပေး ဆောင်ရွက်ပေးနေသည်ဟု ဖြေကြားခဲ့သည်ကို ယခုတိုင်းရင်းသားများက မှတ်သားပြီး ယနေ့ တီဗွီဖန်သားပြင်ပေါ်တွင် ကြည့်ရှု နေကြပါကြောင်း၊ မကွီအိမ်နူးမြို့၏ အင်္ဂါရပ်နှင့်ညီအောင် သော်လည်းကောင်း၊ မင်းတပ်၊ မတူပီ၊ ကန်ပက်လက်၊ ပလက်ဝ လေးမြို့နယ်ရှိ အစွန်အဖျားမှ ဒေသများနှင့် မကွီအိမ်နူးမြို့ရှိ ပြည်သူများပါ ကျန်းမာရေးစောင့်ရှောက်မှု လွှမ်းခြုံနိုင်အောင် သော်လည်းကောင်း၊ မိမိတို့ ပြည်ထောင်စုဝန်ကြီး ပြောသည့်အတိုင်း လုပ်သည်ဟု အပြောနှင့်အလုပ် ညီသည့် ဝန်ကြီးတစ်ပါး ဖြစ်သည်ကို မိမိတို့မှတ်သားထားသည့် အချက်များကို ယနေ့အကောင်အထည် ဖော်မည့်အချိန် ကျရောက်ပြီ ဖြစ်သည့်အတွက် မင်းတပ်မြို့နယ်ရှိ မကွီအိမ်နူးစံကိုက် (၁၆) ခုတင်ဆံ့ ဆေးရုံ တည်ဆောက် ပေးရန်အစီအစဉ်ရှိ/မရှိ သိရှိလိုကြောင်း မေးမြန်းပါသည်။


 

ချင်းပြည်နယ်၊ ကချင်ပြည်နယ်စသည့် ခက်ခဲသည့်ဒေသများတွင် မိမိတို့ Criteria အားလုံးလျှော့ပါကြောင်း၊ အဖြစ်နိုင်ဆုံးနှင့် အတတ်နိုင်ဆုံးပေး၍ မူအတိုင်းဆက်လက်လုပ်မည် ဖြစ်ပါကြောင်း၊ ပထမဦးဆုံး ၂၀၁၅-၁၆ ဘဏ္ဍာရေးနှစ်တွင် ဘဏ္ဍာငွေချလိုက်ပြီး ဆောက်လို့မရသည့် လမ်းမရှိပါကြောင်း၊ သွားမည့်လမ်း မရှိလျှင်လည်း ပစ္စည်းကိရိယာများ သယ်ယူ၍မရသောကြောင့် ဆောက်၍မရပါကြောင်း၊ ချင်းပြည်နယ်တွင် Station Hospital  သန်း ၆၃၀ နှင့် အခြားတိုင်းဒေသကြီးတွင်ရလျှင် ချင်းပြည်နယ်တွင် မရသည့်အတွက် ချင်းပြည်နယ်ကို ပိုပေးပါကြောင်း၊ PAE ဆိုလျှင်လည်း ၂၅၀၀၀ ကျပ် ပတ်ဝန်းကျင်နှင့် ၄၈၀၀၀ ကျပ်အထိ ပိုပေးပါကြောင်း၊ သို့မှသာ ဆောက်လုပ်ရေးက အဆင်ပြေမည် ဖြစ်ပါကြောင်း၊ မင်းတပ်မြို့နယ်၊ မကွီအိမ်နူး မြို့သည် မင်းတပ်မြို့နှင့် ၈၅ မိုင် ဝေးပြီး ပွင့်လင်းရာသီတွင်ပင် ခြောက်နာရီခန့် ကြာသောကြောင့် ဤကိစ္စကိုလည်း ပြန်လည်ဆန်းစစ်သည့်အခါ တိုက်နယ်ဆေးရုံဆောက်ရန် လျာထားသော မြေနေရာ ၅.၈ ဧကက ရပ်ကွက်အသစ်ဖြစ်သော ဗွီနူးနေရာတွင် ရှိပါကြောင်း၊ ဗွီနူးရပ်ကွက်က စီမံကိန်း လျာထားသည့် မြေနေရာ ဖြစ်ပါကြောင်း၊ အဆိုပါမြေနေရာကို ရဖို့ဆိုလျှင် လျာထားသော မြေနေရာသည် ဌာနဆိုင်ရာမြေမှ လောလောဆယ် ကွင်းဆင်းမြေပြင် တိုင်းတာဆောင်ရွက်လျက် ရှိသည်ကို တွေ့ရှိရပါကြောင်း၊ မြေမိန့်ရရှိရန် ၂၀၁၉-၂၀ ဘတ်ဂျက်တွင် ပိုက်ဆံထည့်၍ ရပါကြောင်း၊ မိမိတို့ဗဟို၊ ပြည်နယ်ဦးစီးမှူး၊ လွှတ်တော်ကိုယ်စားလှယ်ကြီး၊  ထွေ/အုပ်စသည်တို့က ပံ့ပိုးရန်လိုပါကြောင်း၊ အခြားဝန်ကြီးဌာန အဆောက်အဦ ဆောက်ရန်အတွက် ဆေးရုံဆောက်ရန် ဦးစားပေးဖြစ်သည့်အတွက် ဆေးရုံဆောက်မည့်နေရာကို သတ်သတ်မှတ်မှတ် ၅.၈ ဧကသေချာလုပ်ပြီး မြေမိန့်ရရှိအောင် အရင်ဆုံးလုပ်ပေးစေလိုကြောင်း၊ မြေမိန့်ကို ယခုနှစ်အတွင်းရလျှင် ၂၀၁၉-၂၀၂၀ ဘတ်ဂျက်တွင် ပိုက်ဆံထည့်လိုက်၍ ရပါကြောင်း၊ မြေမိန့်မရဘဲ ပိုက်ဆံသွားထည့်လိုက်လျှင် ပိုက်ဆံကို ပြန်အပ်လိုက်ရလျှင် မကောင်းကြောင်း၊ မကွီအိမ်နူးမြို့တွင် လောလောဆယ် စိမ့်စမ်းရေကို အဓိက သွယ်သုံးလျက်ရှိပြီး စိမ့်စမ်းရေ အသုံးပြုလျက်ရှိသည့် မကွီအိမ်နူးရပ်ကွက်မှ ယခုတိုက်နယ်ဆေးရုံ ဆောက်မည့်နေရာက ၅ မိုင်ခန့် ဝေးပါကြောင်း၊

လက်ရှိတွင် ရေမရသောကြောင့် ဆောက်မရပါကြောင်း၊ ရေရရှိအောင် ပံ့ပိုးရန်အတွက် လွှတ်တော်ကိုယ်စားလှယ်ကြီး၊ ထွေ/အုပ်နှင့် ချင်းပြည်နယ်အစိုးရက စီစဉ်ပေးမည်ဆိုလျှင် ရရှိနိုင်ကြောင်း၊ မြေလည်းရမည်ဆိုလျှင် လာမည့်ဘတ်ဂျက်တွင် ထည့်လိုက်လျှင် တစ်ခါတည်း ချင်းပြည်နယ် ပြည်သူများအတွက် အလွန်ကောင်းမွန်မည် ဖြစ်ပါကြောင်း၊ ထို့ကြောင့် အဓိကမြေနှင့်ရေရလျှင် မိမိတို့ဘက်က လုံးဝအာမခံပါကြောင်း၊ ပိုက်ဆံကို တစ်ခါတည်း ထည့်သည့်အပြင် ဤကိစ္စွအားလုံးကိုလည်း ရရှိသည့် Process များက နည်းငယ်ခန့် ကြာပါကြောင်း၊ အဆောက်အဦဆောက်လုပ်ခြင်း၊ ခွင့်ပြုခန့်ထားခြင်း Process ကို တိုအောင်လုပ်လျှင် အလွန်ကောင်းပါကြောင်း၊ အားလုံး၊ တစ်ပြည်လုံး အကျိုးရှိမည် ဖြစ်သောကြောင့် အမြန်ဆုံးဖြစ်စေချင်ပါကြောင်း၊ ယနေ့တင်ပြီး အနည်းဆုံး သုံးလခန့်အတွင်း အဖြေရလျှင် မိမိတို့က ပိုက်ဆံထည့်လိုက်မည် ဖြစ်ပါကြောင်း၊ ချင်းပြည်နယ်သာမက အခြားဒေသများတွင်လည်း ထည့်ရခြင်းဖြစ်ပါကြောင်း၊ ထို့ကြောင့် အဆိုပါကိစ္စကို ဦးစားပေး အနေဖြင့် ဆောင်ရွက်ပေးမည် ဖြစ်ပါကြောင်း ရှင်းလင်းဖြေကြားပါသည်။

ပြည်ထောင်စုဝန်ကြီး ဒေါက်တာမြင့်ထွေး