Skip to main content

 

ညောင်တုန်း ပြည်သူ့ဆေးရုံတွင် ဆေးရုံနှင့်လူနာ ကြပ်တည်းမှုကြောင့် ပေ ၁၅၀ x ၆၂ ပေ သုံးထပ် လူနာဆောင်အသစ်ကို ၂၀၁၆-၁၇ ဘဏ္ဍာရေးနှစ်တွင် ကုသရေးဦးစီးဌာနမှ တင်ဒါအောင်ဈေးနှုန်း ၆၆၈.၂၇၆ သန်းဖြင့် အောင်မြေတော်ဝင်ကုမ္ပဏီကို အပ်နှံ၍  ၃-၂-၂၀၁၇ ရက်နေ့တွင် စတင်တည်ဆောက် စေခဲ့ပါကြောင်း၊ စတင်တည်ဆောက်ကပင် ကြပ်မတ်မှုမရှိခြင်း၊ Drawing ပုံပါအတိုင်း Frame Work ကို အတိတကျ မလုပ်ဆောင်ဘဲ ကျောက်လောင်းခြင်း၊ တိုင်ခြေများအံ့လွဲချော်ခြင်း၊ Alignment မမှန်ခြင်း စသည်တို့ကြောင့် အကြိမ်ကြိမ်ပြင်ဆင်တည်ဆောက် ခဲ့ရပါကြောင်း၊ Frame Work များကို သေချာစွာ ဆောင်ရွက်ခြင်းမရှိဘဲ ကျောက်လောင်းခဲ့သည့်အတွက် Alignment များ လွဲခြင်း၊ Footing နှင့် အပေါ်က Ground Level ကွာနေသည့်အပေါ်သေချာစွာ ကျောက်မလောင်းဘဲ မြေကြီးဖို့ခြင်း၊  Footing တိုင်နှင့် အပေါ်က Structure နှင့် လွဲနေသည့်အပေါ် တိုင်သံချောင်းများကောက်၍ ဆက်တက်ရန် ဆောင်ရွက်ခြင်း၊ အောက်ခြေ Footing တွင် အနည်းငယ်ကွဲလွဲသည်နှင့် တိုင်မျဉ်းမတ် ပိုလွဲလာသည်အပေါ် သံချောင်းများကို ညဘက် တိတ်တဆိတ်ဖြတ်ပြီး တိုင်ကိုရွှေ့ထားခြင်း၊ သံချောင်းမူရင်း Structure တွင် 16 mm သုံးရမည့် အစား 12 mm သံချောင်းများ သုံးစွဲထားခြင်း၊ ဈေးကွက်တွင် ပေါပေါလောလော ဝယ်ယူရနိုင်သည့် နန်းဆွဲ သံချောင်းများကို အသုံးပြုခဲ့ပြီး ၂၀၁၈ ခုနှစ် ၅ လပိုင်းကနေစတင်၍ လုပ်ငန်းရပ်ဆိုင်း နေခဲ့သည်မှာ ယနေ့အချိန်အထိ ဖြစ်ပါကြောင်း၊

ဆေးရုံတည်ဆောက် နေသည့်နေရာတွင်ရှိသော သားဖွားခန်း၊ အမျိုးသမီးအထူးခန်းတို့ကို ခေတ္တဘေးတွင် ရွှေ့ပြောင်းထားပြီး Corridor တွင် လူနာများကို ကြပ်တည်းစွာ ကုသနေရပါကြောင်း၊  

သို့ပါ၍ ယခုအခါ ဆေးရုံအသစ်သည် မည်သည့်အချိန်တွင် ပြီးစီးမည်ကို မသိရှိသကဲ့သို့ သားဖွားခန်းနှင့် ခွဲစိတ်ခန်းအတွက် ထပ်မံနေရာပေးရသည့်အတွက် ကုသရေးဆေးရုံနှင့်မတူဘဲ ရောဂါပြန့်ပွားရေး ဆေးရုံ အဖြစ်သို့ ရောက်ရှိနေပါသဖြင့် ၂၀၁၆-၁၇ ဘဏ္ဍာရေးနှစ်ကပင် တည်ဆောက်နေသော ညောင်တုန်း ပြည်သူ့ဆေးရုံ သုံးထပ်လူနာဆောင် အသစ်အားမည်သည့် ဘဏ္ဍာရေးနှစ်တွင် အပြီးသတ် တည်ဆောက်ပေး မည်ကိုသိရှိလိုပါကြောင်း မေးမြန်းပါသည်။


 

တိုးချဲ့သုံးထပ်ဆောင် ဆောက်လုပ်ရန် ၂၀၁၆-၁၇ ဘဏ္ဍာရေးနှစ်တွင် သန်းပေါင်း ၆၆၈ သန်းနှင့် တင်ဒါ အောင်မြင်သော တော်ဝင်အောင်မြင်ကုမ္မဏီနှင့် စာချုပ်ချုပ်ဆိုပါကြောင်း၊ ၂၀၁၆-၁၇ ဘဏ္ဍာရေးနှစ် ပထမနှစ်တွင် သန်း ၄၀၀ ခွင့်ပြုခဲ့ပြီး ပြီးစီးမှု ရာခိုင်နှုန်းအရ နည်းသည့်အတွက် သန်း ၁၀၀ သာ ပေးချေပြီး ကုမ္ပဏီမပြီးသည့်အတွက် သန်း ၃၀၀ ကို နိုင်ငံတော်အစိုးရသို့ ပြန်အပ်ခဲ့ရပါကြောင်း၊ ၂၀၁၇-၁၈ ဘဏ္ဍာရေးနှစ်တွင် သန်း ၃၀၀ ထပ်မံလျာထားပြီး ပြီးစီးမှုရာခိုင်နှုန်းအရ ၂၄၃ သန်းသာ ပေးချေပြီး ၆၅ သန်း ပြန်အပ်ခဲ့ပါကြောင်း၊ ခြောက်လဘတ်ဂျက်တွင် သန်း ၂၃၀ ထပ်မံလျာထားသော်လည်း  အရည်အသွေး စစ်ဆေးခြင်း ဆောင်ရွက်နေဆဲဖြစ်၍ လုပ်ငန်းဆောင်ရွက်ခြင်း မရှိဘဲ နိုင်ငံတော်ကို ပြန်အပ်ခဲ့ရပါကြောင်း၊

အဆိုပါကိစ္စအား သိရှိပြီးနောက် အရည်အသွေးပြည့်မီစွာ ဆောက်လုပ်နိုင်ရေးအတွက် ဧရာဝတီတိုင်း ဒေသကြီးအစိုးရက ၇-၉-၂၀၁၈ ရက်နေ့တွင် ကျင်းပသော အစည်းအဝေးမှတ်တမ်း ဆုံးဖြတ်ချက်အရ (၁) တော်ဝင် အောင်မြေကုမ္ပဏီမှ Structural Drawing ၊ Archie Tech Drawing နှင့် Manganic and Electrical Drawing များ အသစ်ရေးဆွဲတင်ပြရန် ဧရာဝတီတိုင်းဒေသကြီးအစိုးရက ဆုံးဖြတ်ပါကြောင်း၊  (၂) Restraining Procedure Report က တိုင်းဒေသကြီး တည်ဆောက်ရေး ကော်မတီကို တင်ပြခိုင်းပါကြောင်း၊ (၃) ပြန်လည်ပြုပြင် တည်ဆောက်ခြင်းအား ဒေသခံပြည်သူများမှ လက်မခံပါက ကုမ္ပဏီမှတာဝန်ယူကာ အသစ်ဖြိုဖျက်၍ ပြန်လည်တည်ဆောက်ရန် အစည်းအဝေးမှတ်တမ်းအရ စက်တင်ဘာလ ၇ ရက်နေ့က ဆောင်ရွက်ခဲ့ပါကြောင်း၊

ယခုအခါ အစည်းအဝေးမှတ်တမ်း ဆုံးဖြတ်ချက်အရ ညောင်တုန်းမြို့နယ် ပြည်သူ့ဆေးရုံကို တိုးချဲ့သုံးထပ် ဆောင်ဆောက်လုပ်ရေးလုပ်ငန်း အမြန်ဆုံးပြန်လည် တည်ဆောက်ရန်အတွက် ကုမ္ပဏီ၏ပြင်ဆင်မှု ပုံစံကို ဧရာဝတီတိုင်းအစိုးရ လူမှုရေးဝန်ကြီးဌာနမှ တိုင်းဒေသကြီး ဆောက်လုပ်ရေးလုပ်ငန်း စိစစ်ရေးကော်မတီသို့ တော်ဝင်အောင်မြေကုမ္ပဏီက တင်ပြလာသည့် အစီရင်ခံစာကို အောက်တိုဘာလ ၂၉ ရက်နေ့တွင် သဘောထား ပြန်ညှိနှိုင်းခဲ့ရာ (၁) Third Party အဖွဲ့ဖြစ်သော ACEG Engineering မှ သွားရောက်စစ် ဆေးပြီးနောက် တော်ဝင်အောင်မြေကုမ္ပဏီမှ တင်ပြလာသည့်နည်းလမ်းများ၊ နည်းစနစ်များအတိုင်း ဆောင်ရွက် သတ်မှတ်သော်လည်း Low Test ပြန်လုပ်ရန်လိုပါကြောင်း၊ လုပ်ငန်းစိစစ်ချက်အရ အဓိက အားနည်းချက်သည် Alignment မမှန်ကန်ခြင်း ဖြစ်ပါကြောင်း၊ Ground Beam များ၊ Alignment ကို စနစ်တကျ မချိန်ထားခြင်း၊ လုပ်ငန်းခွင်ကြီးကြပ်မှုအားနည်းခြင်း၊ နည်းစနစ်ကျွမ်းကျင်သော လုပ်သားများ မသုံးခြင်း၊ QA ၊ QC Team များဖြင့် လုပ်ငန်းစဉ်အတိုင်း စိစစ်ပြီးမှ ဆက်လက် ဆောင်ရွက်မှုမရှိခြင်း၊ QA ၊ QC သီးသန့်အဖွဲ့ စစ်ဆေးစမ်းသပ်မှုများ မရှိခြင်းများကို တွေ့ရှိရပါကြောင်း၊ ထို့ကြောင့် အဆိုပါ စိစစ်တွေ့ရှိချက်များ ကို ၁၄-၁-၂၀၁၉ ရက် ရက်စွဲဖြင့် တိုင်းဒေသကြီးတည်ဆောက်ရေး လုပ်ငန်းစိစစ်ရေးကော်မတီ တွဲဖက် အတွင်းရေးမှူး လူမှုရေးဝန်ကြီး၊ တိုင်းဒေသကြီးအစိုးရအဖွဲ့က ပုသိမ်မြို့ကို တင်ပြထားပါကြောင်းနှင့်  ပြန်လည်ဆောက်လုပ်ရေး လုပ်ငန်းများကို ၂၀၁၉-၂၀ ဘဏ္ဍာရေးနှစ်တွင် အမြန်ဆုံးပြီးအောင် တိုင်းဒေသကြီး အစိုးရ၊ အင်ဂျင်နီယာများ၊ QA ၊ QC Team များ၊ ကျန်းမာရေးနှင့် အားကစားဝန်ကြီးဌာနများက အမြန်ဆုံး ပြီးစီးအောင်နှင့်  ဆောင်ရွက်မည် ဖြစ်ပါကြောင်းပြန်လည် ဖြေကြားပါသည်။

ပြည်ထောင်စုဝန်ကြီး ဒေါက်တာမြင့်ထွေး ဝန်ကြီး