Skip to main content

 

ဝေးလံခေါင်သီဒေသအဖြစ်သတ်မှတ်၍ ဒေသရှားပါးစရိတ်ခံစားခွင့်ပြုထားသော မြို့နယ်များမှ တက္ကသိုလ်ဝင်တန်းအောင် ကျောင်းသားကျောင်းသူများအား အဆင့်မြင့်တက္ကသိုလ်ကောလိပ်များနှင့် အဆင့်မြင့်သင်တန်းကျောင်းသို့ တက်ရောက်ပညာသင်ကြားနိုင်ရေးအတွက် မည်ကဲ့သို့စီမံဆောင်ရွက် ပေးနေသည်ကို သိလိုခြင်းနှင့်စပ်လျဉ်းသည့်မေးခွန်း

မိမိတို့မြန်မာနိုင်ငံသည် ကမ္ဘာတွင် ဆင်းရဲသည့် နိုင်ငံထဲတွင်ပါဝင်နေသော  နိုင်ငံတစ်နိုင်ငံ ဖြစ်ပါကြောင်း၊ ဆင်းရဲသည့် နိုင်ငံထဲမှာမှ ဝေးလံခေါင်သီ ဒေသနေပြည်သူများသည် ပိုပြီးဆင်းရဲကြပါ ကြောင်း၊ လမ်းပန်းဆက်သွယ်ရေးခက်ခဲမှု၊ စီးပွားရေးအဆင်မပြေမှုတို့ကြောင့် ဝေးလံခေါင်သီနေ ပြည်သူများသည် မိမိတို့၏သားသမီးများကို အဆင့်မြင့်ကျောင်းများတွင် မထားနိုင်ကြပါကြောင်း၊ မိမိဒေသတွင်ရှိသည့် ကျောင်းများတွင် ဖြစ်သလို ကျောင်းထားကြရပါကြောင်း၊ ကျောင်းများတွင်လည်း ဆရာ/မများက ပြည့်ပြည့်စုံစုံမရှိ၊ သင်ထောက်ကူပစ္စည်းနှင့် ကျောင်းအဆောက်အဦများကလည်း ပြည့်ပြည့်စုံစုံမရှိ၊ ကျောင်းသား/သူများသည် ကြိုးစားကြသော်လည်း စာမေးပွဲအောင်သည့်အခါ ရိုးရိုးအောင်ရုံအမှတ်သာ ရရှိကြပါကြောင်း၊ ပြည်နယ်/ပြည်မ ပညာရေးသည် များစွာကွာခြား နေပါကြောင်း၊ ၂၀၁၇-၁၈ ပညာသင်နှစ်က ပြည်မသည် ကိုယ်ပိုင်အထက်တန်း ကျောင်းတစ်ကျောင်း သည် ၆ ဘာသာ ဂုဏ်ထူး ၁၂၃ ယောက်၊ ၅ ဘာသာဂုဏ်ထူး ၁၆၃ ယောက်နှင့် အောင်သည့် အချိန်တွင် မိမိတို့ဝေးလံခေါင်သီဒေသနှင့် ပြည်နယ်များတွင် အောင်ချက်ရာခိုင်နှုန်း လုံးဝမရှိသည့် ကျောင်းပေါင်း ၁၀၀ ကျော် ရှိပါကြောင်း၊ ပြည်နယ်/ပြည်မပညာရေး ကွာဟမှုမဖြစ်သင့်ပါကြောင်း၊

ပညာရေးစနစ်က အဆင့်မြင့်တက္ကသိုလ်၊ ကောလိပ်နှင့်သင်တန်းများကို တက်ခွင့်ရရန် တက္ကသိုလ်ဝင်တန်းအောင် ရမှတ်နှင့် သတ်မှတ်ထားသည့်အတွက် ဝေးလံခေါင်သီဒေသနေ ကျောင်းသား/သူများသည် ပညာရေးလမ်းကြောင်းပေါ်တွင် လမ်းပျောက်သည့် အခြေအနေကို ရောက်ရှိနေကြပါကြောင်း၊ ပြည်မက ကျောင်းသားများ၏ ရမှတ်များကို မည်သို့မျှယှဉ်၍ မရပါကြောင်း၊ ပြည်မက ကျောင်းသားများသည် အရည်အချင်းပြည့်သည့် ဆရာ/မများနှင့် သင်ထောက်ကူပစ္စည်း ပြည့်ပြည့်စုံစုံ သင်ကြားရသဖြင့် သင်္ချာ၊ ဓာတုဗေဒ၊ ရူပဗေဒလို ဘာသာရပ်များတွင် အမှတ် ၁၀၀ အပြည့် ရရှိသည့် ကျောင်းသား/သူများ အများကြီးရှိပါကြောင်း၊ မိမိတို့ ဝေးလံခေါင်သီဒေသက သင်ကြားပေးနေသော ဆရာ/မများကိုယ်တိုင် စာမေးပွဲကို ဝင်ရောက်ဖြေတောင်မှ အမှတ် ၁၀၀ အပြည့်ရရန် မသေချာပါကြောင်း၊ ဝေးလံခေါင်သီဒေသများက ကျောင်းသား/သူများသည် မည်မျှပင် ကြိုးစားကြိုးစား သင်္ချာ၊ ဓာတုဗေဒ၊ ရူပဗေဒလို ဘာသာရပ်များတွင် ရရှိသည့် ဂုဏ်ထူးအမှတ် ၈၀ နှင့် ၈၀ ကျော်ရုံသာ ရရှိကြပါကြောင်း၊ မြန်မာ၊ အင်္ဂလိပ်နှင့် ဇီဝဗေဒလိုဘာသာ ရပ်များတွင်လည်း ၇၅ မှတ်ဖြင့်သာ ဂုဏ်ထူးရရှိကြပါကြောင်း၊ ထို့ကြောင့် ၆ ဘာသာ ဂုဏ်ထူးထွက်သော်လည်း ဆေးတက္ကသိုလ်တက်ရန် အမှတ်မမီကြပါကြောင်း၊

၂၀၁၅-၁၆ ပညာသင်နှစ်မှစပြီး ဝေးလံခေါင်သီဒေသ ရှားပါးစရိတ်ခံစားခွင့် ပြုထားသည့် မြို့နယ်များက ကျောင်းသား/သူများကို ဆေးတက္ကသိုလ်၊ တိ/မွေး/ကုတက္ကသိုလ်နှင့် စိုက်ပျိုးရေးတက္ကသိုလ်များကို အမှတ်လျှော့ပေါ့ပြီး တက်ရောက်ခွင့်ပြု ထားသည့်အတွက် နိုင်ငံတော်အစိုးရကို ကျေးဇူးတင် ရှိပါကြောင်း ပြောကြားလိုပါသည်။ ၂၀၁၆-၁၇ ပညာသင်နှစ်က မိမိတို့မဲဆန္ဒနယ်က ကျောင်းသူတစ်ယောက်သည် အမှတ် ၄၃၆ မှတ်နှင့် ဆေးတက္ကသိုလ်ကို တက်ခွင့်ရခဲ့ပါကြောင်း၊ ၂၀၁၈-၁၉ ပညာသင်နှစ်တွင်လည်း တောင်ကြီးဆေးတက္ကသိုလ်သို့ မိမိမဲဆန္ဒနယ်မှသုံးယောက် တက်ခွင့်ပြုသည့်အတွက် ကျန်းမာရေးနှင့်အားကစားဝန်ကြီးကို အထူးကျေးဇူးတင်ရှိပါကြောင်း၊ ဆေးတက္ကသိုလ်ကဲ့သို့ သွားဘက်ဆိုင်ရာ ဆေးတက္ကသိုလ်၊ အခြေခံကျန်းမာရေး တက္ကသိုလ်နှင့် သူနာပြုတက္ကသိုလ်များကိုလည်း ဝေးလံခေါင်သီဒေသက ကျောင်းသား/သူများ တက်ခွင့်ရအောင် ဆောင်ရွက်ပေးပါဟု တင်ပြလိုပါကြောင်း၊ ကျန်းမာရေးနှင့်အားကစား ဝန်ကြီးဌာနက ဝေးလံခေါင်သီ ဒေသက ကျောင်းသား/သူများကို ဆေးတက္ကသိုလ်ကို တက်ခွင့်ပြုသကဲ့သို့ အမှတ်နှင့်သာ တိုက်ရိုက် လျှောက်ပြီး တက်ခွင့်ပြုသည့် အဆင့်မြင့်တက္ကသိုလ် ၁၁ ခု နှင့် အဆင့်မြင့် ကောလိပ်သင်တန်း များကိုလည်း တက်ရောက်ခွင့်ရအောင် နိုင်ငံတော်အစိုးရအနေဖြင့် ဥပဒေပြဋ္ဌာန်းပြီး ဆောင်ရွက်ပေးရန် လိုအပ်ပါကြောင်း၊ ယခုလို ဆောင်ရွက်ပေးမှ ပြည်နယ်/ပြည်မ ပညာရေးကွာဟမှု နည်းပါးလာမည် ဖြစ်ပါကြောင်း၊ နိုင်ငံတော်အစိုးရက ယခုလိုဆောင်ရွက်ပေးမှသာ ဝေးလံခေါင်သီ ဒေသနေ ကျောင်းသား/သူများ ပညာရေးလမ်းကြောင်းပေါ် ရောက်ရှိပြီး နိုင်ငံတော်အတွက် သားကောင်း/သမီးကောင်းများ ဖြစ်လာကြမည် ဖြစ်ပါကြောင်း၊ ထို့ကြောင့် ဝေးလံခေါင်သီ ဒေသများမှ တက္ကသိုလ်ဝင်တန်းအောင် ကျောင်းသား/သူများကို အဆင့်မြင့်တက္ကသိုလ်၊ ကောလိပ်သင်တန်းများသို့ တက်ရောက်နိုင်ရေးအတွက် နိုင်ငံတော်အစိုးရက မည်ကဲ့သို့ ဆောင်ရွက်ထားသည်ကို သိရှိလိုပါကြောင်း မေးမြန်းပါသည်။


 

ပညာရေးဝန်ကြီးဌာနအနေဖြင့် တက္ကသိုလ်ဝင်တန်းအောင် ကျောင်းသား/သူများအား တက္ကသိုလ်၊ ဒီကရီကောလိပ်၊ ကောလိပ်များသို့ တက်ရောက်သင်ယူ နိုင်ရေးအတွက် ပညာသင်ထောက်ပံ့ကြေး အစီအစဉ်များ၊ ပညာသင်ဆုများ တိုးချဲ့ပေးခြင်း၊ တက္ကသိုလ်ပရဝုဏ်အတွင်း အိပ်ဆောင်၊ ကျောင်းဆောင်များကို တိုးချဲ့ဆောက်လုပ်ပေးခြင်းများဖြင့် နှစ်စဉ်တိုးချဲ့စီစဉ် ဆောင်ရွက်ပေးလျက် ရှိပါကြောင်း၊ ဝေးလံခေါင်သီဒေသအဖြစ် နိုင်ငံတော်မှ ထုတ်ပြန်ထားသော ဒေသစရိတ်ခံစားခွင့် ရှိသည့် ဒေသများမှ တက္ကသိုလ်ဝင်တန်းအောင် ကျောင်းသား/သူများအတွက် ပြီးခဲ့သည့် ကာလအတွင်း ရန်ကုန်နည်းပညာ တက္ကသိုလ်တွင် ကျောင်းသား/သူ ၁၉ ဦး၊ မန္တလေးနည်းပညာ တက္ကသိုလ်တွင် ကျောင်းသား/သူ ၂၁ ဦး၊ သတင်းအချက်အလက် နည်းပညာတက္ကသိုလ်တွင် ကျောင်းသား/သူ ၁၂ ဦး၊ မန္တလေးကွန်ပျူတာ တက္ကသိုလ်တွင် ကျောင်းသား/သူ ၁၅ ဦး၊ နည်းပညာတက္ကသိုလ် ရတနာပုံဆိုက်ဘာစီးတီးတွင် ကျောင်းသား/သူ ၂၁ ဦးနှင့် မြန်မာနိုင်ငံလေကြောင်းနှင့် အာကာသပညာ တက္ကသိုလ်တွင် ကျောင်းသား/သူ ၁၀ ဦး၊ စုစုပေါင်း ကျောင်းသား/သူ ၉၈ ဦးအား တက္ကသိုလ်ဝင်ခွင့် လမ်းညွှန်ပါ မူလဝင်ခွင့်ရမှတ် သတ်မှတ်ချက်များကို အထူးဒေသများအတွက် ဝင်ခွင့်ပေးသည့် အနိမ့်ဆုံးရမှတ်များအဖြစ် ဖြေလျှော့သတ်မှတ်၍ တက်ရောက် ပညာသင်ယူခွင့် ပြုလုပ်လျက်ရှိပါကြောင်း၊ ထို့အပြင် ဝေးလံခေါင်သီသော ‌ဒေသများမှ တက္ကသိုလ်ဝင်တန်း အောင်မြင်သော ကျောင်းသား/သူများအတွက် လုပ်ငန်းခွင်အကြို ဆရာအတတ်ပညာ ဒီပလိုမာသင်တန်း ရွေးချယ်ရေးမူအရ တက္ကသိုလ်ဝင်တန်း စာမေးပွဲအောင်မြင်၍ ပညာရေးကောလိပ် သင်တန်းဝင်ခွင့် လျှောက်ထားသူများကိုလည်း တိုင်းဒေသကြီး၊ ပြည်နယ်အစိုးရ အဖွဲ့များ၏ ထောက်ခံချက်ဖြင့် တက်ရောက်ခွင့်ပြုရန် သက်ဆိုင်ရာပညာရေး ကောလိပ်များတွင် သတ်မှတ်ထားသော လက်ခံသင်ကြားပေးမည့် ဦးရေ၏ ၁၀ ရာခိုင်နှုန်းအထိ တိုးချဲ့လက်ခံဆောင်ရွက် ပေးလျက်ရှိပါကြောင်း၊ ထို့အတူ စစ်ကိုင်းပညာရေးတက္ကသိုလ်နှင့် ရန်ကုန်ပညာရေးတက္ကသိုလ် တို့တွင်လည်း တက္ကသိုလ်ဝင်ခွင့် လျှောက်ထားရမည့် ဝင်ခွင့်သတ်မှတ် အရည်အချင်းများနှင့် ကိုက်ညီပါက တိုင်းဒေသကြီး၊ ပြည်နယ်ခွဲတမ်းဖြင့် ဝင်ခွင့်ပြုပေးလျက် ရှိပါကြောင်း၊ ရန်ကုန်တက္ကသိုလ်၊ မန္တလေးတက္ကသိုလ်နှင့် တက္ကသိုလ်အချို့တွင်လည်း ဝေးလံခေါင်သီဒေသများမှ လျှောက်ထားသော ကျောင်းသား/သူများအတွက် ဘာသာရပ်အသီးသီးတွင် Quota ဖြင့် လက်ခံမည့် ဦးရေ၏ ၂ ရာခိုင်နှုန်းအထိ လက်ခံစီစဉ် ဆောင်ရွက်ပေးလျက် ရှိပါကြောင်း ရှင်းလင်းဖြေကြားပါသည်။

ဦးတင်နု (ခ) တင်နုအောင် (မာန်အောင်မဲဆန္ဒနယ်) က ဆက်စပ်မေးခွန်း မေးမြန်းပါသည်။

မိမိတို့မာန်အောင်မဲဆန္ဒနယ်ကို ဝေးလံခေါင်သီဒေသ ရှားပါးစရိတ်ခံစားခွင့် ပြုထားသည့်အတွက် ပညာရေးတွင် အခြေအနေသိပ်မဆိုးပါကြောင်း၊ သို့သော်လည်း အခြေအနေမကောင်းသည်က မိမိတို့ရခိုင်ပြည်နယ်နှင့် ကျန်သည့်ပြည်နယ်များ ဖြစ်ပါကြောင်း၊ မိမိတို့ရခိုင်ပြည်နယ်သည် နိုင်ငံတော်တွင် ဒုတိယအဆင်းရဲဆုံး ပြည်နယ်တစ်ခု ဖြစ်ပါကြောင်း၊ ဆင်းရဲသည့် ပြည်နယ်ဖြစ်သဖြင့် ပညာရေးတွင်လည်း အလွန်နိမ့်ကျပါကြောင်း၊ ပြည်နယ်က ကျောင်းသား/သူများသည် ရိုးရိုးအောင်ရန် မနည်းကြိုးစားကြရပါကြောင်း၊ ရခိုင်ပြည်နယ်က ၆ ဘာသာဂုဏ်ထူးဖြင့် အောင်ရန်ဆိုသည်မှာ သိပ်မလွယ်သည့်အရာ ဖြစ်ပါကြောင်း၊ ရှားရှားပါးပါး ၆ ဘာသာဂုဏ်ထူးဖြင့် အောင်မြင်သော်လည်း ဆေးတက္ကသိုလ်လို တက္ကသိုလ်မျိုးကို တက်ခွင့်မရသည့် ကျောင်းသား/သူများ အများကြီးရှိပါကြောင်း၊ ၂၀၁၇-၁၈ ပညာသင်နှစ်က အမ်းမြို့နယ်ရှိ ကျောင်းသားတစ်ယောက်နှင့် သံတွဲမြို့နယ်က ကျောင်းသူ တစ်ယောက်တို့သည် ၆ ဘာသာဂုဏ်ထူးဖြင့် အောင်သော်လည်း ဆေးတက္ကသိုလ် တက်ခွင့် မရခဲ့ကြပါကြောင်း၊ ၆ ဘာသာဂုဏ်ထူးဖြင့် ဆေးတက္ကသိုလ် တက်ခွင့်မရဘူးဆိုလျှင် ပြည်နယ်များတွင် ပညာသင်ကြားနေသော ကျောင်းသား/သူများ စိတ်ထိခိုက်မှု ရှိနိုင်သည်ကို စဉ်းစားကြည့်မိပါကြောင်း၊ ကျောင်းသားများသာမက မိဘများပါ စိတ်ဓာတ်ကျကြပါကြောင်း၊ မိမိတို့ရခိုင်ပြည်နယ်များကဲ့သို့ ကျန်သည့် ပြည်နယ်များတွင်လည်း ၆ ဘာသာ ဂုဏ်ထူးထွက်ပြီး ဆေးကျောင်းတက်ခွင့်မရသည့် ကျောင်းသား/သူများ အများကြီးရှိပါကြောင်း၊ ထို့ကြောင့် ပြည်နယ်က ကျောင်းသား/သူများအတွက် ပြည်နယ်/ပြည်မ ပညာရေးကွာဟမှုမရှိအောင် အမှတ်နှင့်တိုက်ရိုက်လျှောက်ပြီး တက်ခွင့်ပြုသည့် အဆင့်မြင့်တက္ကသိုလ် ၁၁ ခုနှင့် ကောလိပ်သင်တန်းများကို တက်ရောက်နိုင်ရေး၊ နိုင်ငံတော်အစိုးရ အနေဖြင့် ပညာရေးဝန်ကြီးဌာနအနေနှင့် အမှတ်ကိုလျှော့ပေါ့ပေးရန် အစီအစဉ်ရှိ/မရှိ ဆက်စပ်မေးခွန်း မေးမြန်းပါသည်။

ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာမျိုးသိမ်းကြီး

မိမိဖြေသည့်အထဲတွင် တင်ပြပြီးဖြစ်ပါကြောင်း၊ Quota ၂ ရာခိုင်နှုန်း ကျောင်းအပ်လက်ခံနိုင်သည့် အရေအတွက်၏ ၂ ရာခိုင်နှုန်းကို ဝေးလံသောဒေသမှ တက္ကသိုလ်ဝင်တန်း အောင်မြင်သော ကျောင်းသား/သူ များထဲက လျှောက်ထားလျှင် ၎င်း ၂ ရာခိုင်နှုန်းကိုဖျက်ပြီး ခေါ်ပေးလျက် ရှိပါကြောင်း ဆက်စပ်မေးခွန်းအား ပြန်လည်ဖြေကြားပါသည်။

ပြည်ထောင်စုဝန်ကြီး ဒေါက်တာမျိုးသိမ်းကြီး