Skip to main content

 

ကျောင်းသားမိဘများ၏ အမည်ကို သူငယ်တန်းကျောင်း အပ်စအချိန်က ပေးထားသော အမည်နှင့် အထက်တန်းအဆင့်တွင် မိဘအမည် ပေးသွင်းသည်‌့အခါ အိမ်ထောင်စုဇယားအမည်ဖြင့် ကွဲလွဲမှု ရှိနေပါက အမည်‌ပြောင်းလဲပြင်ဆင်ခွင့် ပြင်ကြရပါကြောင်း၊ ယခုလို အမည်ပြောင်းလဲ ပြင်ဆင်ခွင့် တင်ကြရသည့်အခါ (၁) ရဲစခန်းထောက်ခံချက်၊ (၂) အမည်မှန်ဖြစ်ကြောင်း၊ ကြော်ငြာသည်‌့ သတင်းစာဖြတ်ပိုင်း၊ (၃) တရားရုံးကျမ်းကျိန်ချက်တို့ ပါရှိရပါကြောင်း၊ ယခုကဲ့သို့ လုပ်ဆောင်ရသည့် အချက် ၃ ချက်သည် ကျောင်းသားမိဘ ပြည်သူများအတွက် ဝင်ထုပ်ဝန်ပိုး ဖြစ်ရသည့်အပြင် စိတ်အနှောင့်အယှက်လည်း ဖြစ်ရပါကြောင်း၊ ထို့ကြောင့် ပြည်သူတင်မြှောက်သည့် အစိုးရမဟုတ်သည်‌့ လက်ထက်က ပြည်သူ့မျက်နှာကို မကြည့်ဘဲ သူ့လူသူအကြံအဖန်လုပ်ရန် ချပေးခြင်းများသာ ဖြစ်ပါကြောင်း၊

ရဲစခန်းထောက်ခံချက်ဆိုလျှင် ၁၀၀၀ ကျပ် ပေးရပါကြောင်း၊ မိမိတို့တာဝန် စယူစဉ် ၂၀၁၆ ခုနှစ်က စခန်းမှူးနှင့်ညှိပြီး ၅၀၀ ကျပ်သာ အလှူခံရန် ပြောထားသော်လည်း တစ်လခန့် ၅၀၀ ကျပ်ယူပြီး ယခုအချိန်ထိ ၁၀၀၀ ကျပ် ယူနေပါကြောင်း၊ နောက်သတင်းစာ ကြော်ငြာဖို့ရာ ၂၅၀၀၀ ကျပ်ကနေ ၃၀၀၀၀ ကျပ်အထိ ကုန်ကျကြပါကြောင်း၊ တရားရုံးကျမ်းကျိန်ချက်က တံဆိပ်ခေါင်း ၅၀၀ ကို ၁၀၀၀ ကျပ် ပေးကြရပါကြောင်း၊ Blue Label ၊ Black Label သောက်နိုင်သူများအတွက် ၁၀၀၀၀ ကျပ် တန်သည် တစ်နေ့လုပ်တစ်နေ့စား မရှိဆင်းရဲသား တောနေလူတန်းစားများ အတွက်က ၁၀၀၀ ကျပ်တန် မပြောနှင့် ၅၀၀ ကျပ်တန်ဆိုလျှင်ကို တန်ဖိုးကြီးလှပါကြောင်း၊ ထု့ိကြောင့် ကျောင်းသား မိဘများကွဲလွဲနေသည့် အမည်နှစ်မျိုးမှာ ယင်းကျောင်းသား၏ မိဘအမည်များပင် ဖြစ်ပါကြောင်း၊ ရပ်/ကျေးအုပ်ချုပ်ရေးမှူးများ၏ ထောက်ခံစာနှင့် လ.ဝ.ကမှလည်း ရပ်ကျေးအုပ်ချုပ်ရေးမှူးများ၏ ထောက်ခံချက်အရ အိမ်ထောင်စုဇယားပါ အိမ်ထောင်ဦးစီး ပုဂ္ဂိုလ်သည် ယင်းကျောင်းသား၏ မိဘပင် ဖြစ်ပါကြောင်း၊ ထောက်ခံရုံမျှနှင့် ပြီးမြောက်နိုင်သည်‌့ ကိစ္စဖြစ်ပါကြောင်း၊ ကိုယ်စားလှယ်ကြီး ဦးစောကျော်ဝင်းမောင် NLD ၏ ၂၀၁၅ ရွေးကောက်ပွဲကြေညာ စာတမ်းတွင်ပါသည့် ပြည်သူကို ဝန်ထုပ်ဝန်ပိုး မဖြစ်စေသည့် ပညာရေးစနစ်ကို ကျင့်သုံးပြီဆိုသည့် သဘောလေးလည်း သိလိုက်ရပါကြောင်း၊ ထို့နောက် သက်ဆိုင်ရာဝန်ကြီးက ဖြေကြားသည့်အခါ ကျောင်းသားမိဘများ အသုံးစရိတ် လျှော့ချရေးကို လုပ်ဆောင်နေသည်လည်း သိလိုက်ရပါကြောင်း၊ ထို့ကြောင့် ကျောင်းသားမိဘများ ငွေကုန်ကြေးကျများသဖြင့် ဝန်ထုပ်ဝန်ပိုးဖြစ်စေသည်‌့ သတင်းစာ ကြော်ငြာ ရခြင်းကိစ္စ၊ စိတ်အနှောင့်အယှက် ဖြစ်စေသည်‌့ ရဲစခန်းသွားရခြင်း၊ တရားရုံးသွားရခြင်း ကိစ္စများကို ဖြေလျှော့ပေးရန် အစီအစဉ် ရှိ/မရှိ သိရှိလိုပါကြောင်း မေးမြန်းပါသည်။


 

ပညာရေးဝန်ကြီးဌာန အနေဖြင့် အခြေခံပညာကျောင်း စီမံခန့်ခွဲရေးမွန်းမံ သင်တန်းများတွင် အခြေခံပညာ ကျောင်းအုပ်ကြီးများအတွက် စီမံဘာသာရပ်ဆိုင်ရာ ပို့ချချက်အခန်း (၇) တွင် ကျောင်းသား/သူများ၏ အမည်ပြောင်းခြင်း၊ ပြင်ဆင်ခြင်းနှင့်ပတ်သက်ပြီး လိုအပ်ချက်များကို ရှင်းလင်းပို့ချ စီစဉ်ဆောင်ရွက်လျက် ရှိပါကြောင်း၊ မိဘလျောက်လွှာမူရင်း၊ အမြင့်ဆုံးအတန်း အောင်မြင်ကြောင်း၊ သက်ဆိုင်ရာကျောင်းအုပ် ထောက်ခံစာ အတန်း၊ ခုံအမှတ်၊ ခုနှစ်၊ အိမ်ထောင်စု စာရင်း၊ အမည်ပြင်ဆင်သည့် သတင်းစာဖြတ်ပိုင်း၊ နိုင်ငံသားစိစစ်ရေးကတ်မူရင်း၊ အသက် ၁၀ နှစ် မပြည်‌့သေး၍ နိုင်ငံသားစိစစ်ရေးကတ်ပြား မပြုလုပ်ရသေးပါက မပြုလုပ်ရသည့်ကြောင်း လူဝင်မှု ကြီးကြပ်ရေး၏ ထောက်ခံချက်၊ ရပ်ကွက်အုပ်ချုပ်ရေးမှူး၏ ထောက်ခံချက်၊ အကျင့်စာရိတ္တ ကောင်းမွန်ကြောင်း၊ ရာဇဝတ်မှုကင်းရှင်းကြောင်း၊ ယခင်အမည်ဟောင်းအတွက် ရဲစခန်းထောက်ခံချက် စသည်များလိုပါကြောင်း၊

တက္ကသိုလ်ဝင်တန်း အောင်မြင်ပြီးသည့် ကျောင်းသား/သူ ဟောင်းများ၏ အမည်ပြောင်းခြင်းကို ခွင့်မပြုပါကြောင်း၊ အရွယ်ရောက်သော ကျောင်းသား/သူ တစ်ဦးအနေဖြင့် လိုအပ်သည့်အတွက် ထောက်ခံစာ တောင်းရခြင်းဖြစ်ပါကြောင်း၊ မိဘအမည်‌ပြောင်းခြင်း၊ ပြင်ဆင်ခြင်းနှင့်ပတ်သက်ပြီး မိဘလျှောက်လွှာ၊ အတန်းအောင်မြင်ကြောင်း၊ သက်ဆိုင်ရာကျောင်းအုပ် ထောက်ခံစာ၊ ဦး/ဒေါ်အမည် တစ်မျိုးတည်းသာရှိပြီး အခြားအမည်ကွဲမရှိကြောင်း ထောက်ခံစာ၊ ပြစ်မှုကင်းရှင်းကြောင်း ရဲစခန်း ထောက်ခံစာ၊ အိမ်ထောင်စုဇယားမူရင်း၊ အမည်ပြင်ဆင်သည့် သတင်းစာကြော်ငြာ သို့မဟုတ် ၅၀ ကျပ်တန်တံဆိပ်ခေါင်းဖြင့် ကျမ်းကျိန်ချက်၊ လ.ဝ.က ၏ ထောက်ခံချက်၊ မိဘ၏နိုင်ငံသား စိစစ်ရေး ကတ်ပြားစသည်များ လိုအပ်ခြင်းဖြစ်ပါကြောင်း၊ ကျောင်းသား/သူ၏ မိဘအမည်ရင်းမှလွဲ၍ ဆွေမျိုးတော်စပ်သူ အဖိုး၊ အဖွား၊ မိဘအမည်အရင်းနေရာတွင် ပြင်ဆင်ရန်ခွင့်မပြု ခြင်းများကလည်း နောင်တွင် ပြဿနာတစ်စုံတစ်ရာ မဖြစ်ပွားရန်နှင့် အခက်အခဲပြဿနာများ မလိုလားအပ်သော စီမံခန့်ခွဲရေး၊ တရားဥပဒေဆိုင်ရာ ဖြစ်ပေါ်နိုင်သည့်အတွက်ကြောင့် ခွင့်မပြုရခြင်း ဖြစ်ပါကြောင်း၊

မိမိတို့အနေဖြင့် လူတစ်ဦး၏အမည် တစ်ခုတည်း ရှိသင့်ပါကြောင်း၊ မြန်မာနိုင်ငံစာစစ်ဦးစီးဌာန အနေဖြင့်လည်း နှစ်စဉ်တက္ကသိုလ်ဝင် စာမေးပွဲဖြေဆို အောင်မြင်ကြသော ကျောင်းသား/သူတို့၏ အချက်အလက်ဆိုင်ရာ မှတ်တမ်းများကို တိကျမှန်ကန်သေသပ်စွာ သိမ်းဆည်းပြီးမှလိုအပ်လျှင် အချက်အလက် အထောက်အထားများကို တိုက်ဆိုင်ပြီး ပြန်လည်ဆောင်ရွက် ပေးရခြင်း ဖြစ်သည့်အတွက် အမည်မှန်ဖြစ်ရန် မိခင်၊ ဖခင်များ၏ အမည်မှန်ဖြစ်ရန်လည်း အရေးကြီးသည့် မှတ်တမ်းများ ဖြစ်ပါကြောင်း၊ အခြားဝန်ကြီးဌာနများ၊ အခြားအဖွဲ့အစည်းများ၊ ဦးစီးဌာနများ၊ နိုင်ငံတကာ တက္ကသိုလ်များသွားလျှင် Certificate များသည် မှန်/မမှန်ပြန်လည်ပြီး တိုက်ဆိုင်စစ်ဆေး ရန်အတွက်ကိုလည်း တောင်းသည့်အခါ အမည်သည်‌ ပြောင်းသွားခဲ့လျှင် တိုက်ဆိုင် စစ်ဆေးသည့်အခါ အခက်အခဲရှိနိုင်ပါကြောင်း၊ ထို့ကြောင့် ယခုလို တိုက်ဆိုင်စစ်ဆေးပေးထားသည့် အချက်အလက်များ ဖြစ်သည့်အတွက်ကြောင့် ခိုင်လုံတိကျမှန်ကန်သော မှတ်တမ်းအထောက် အထားများ ပြည့်စုံရန် အရေးကြီးပါကြောင်း၊

ထို့ကြောင့် ကျောင်းသား/သူများ၏ အမည်၊ မိဘအမည်၊ မွေးသက္ကရာဇ်များ ပြင်ဆင်လိုလျှင် တက္ကသိုလ်ဝင် စာမေးပွဲအောင်စာရင်း မထွက်မီ ပြင်ဆင်ရခြင်း ဖြစ်ပါကြောင်း၊ တက္ကသိုလ်ဝင်စာမေးပွဲ အောင်စာရင်းထွက်ပြီးလျှင် ပြင်ဆင်ခွင့်ပြုရန် အခက်အခဲရှိပါကြောင်း၊ အကယ်၍ ပြင်ဆင်ခဲ့ပြီးပါက နိုင်ငံတကာ တက္ကသိုလ်များကိုသွားသွား၊ အလုပ်ကိုလျှောက်သည်ပဲဖြစ်စေ အကယ်၍ ၎င်း အဖွဲ့အစည်းများ ဝန်ကြီးဌာနများ၊ နိုင်ငံတကာအဖွဲ့အစည်းများ တက္ကသိုလ်များက အထောက်အထား တိုက်ဆိုင်ရန်တောင်းလျှင် မနစ်နာအောင် စိစစ်ပေးရခြင်း ဖြစ်သည့်အတွက် ကျောင်းသား/သူအမည်၊ မိဘအမည်၊ နာမည်ကွဲလွဲမှု အမှန်‌ပြောင်းလဲပြင်ဆင် နိုင်ရန်အတွက်ကို သတ်မှတ်ထားသည့် အထောက်အထားများနှင့် တိုက်ဆိုင်စိစစ်ရခြင်း ဖြစ်သည့်အတွက် သတ်မှတ်အထောက်အထား များဖြင့်သာ မိမိတို့တစ်တွေသည် ကျောင်းသား/သူများ ၎င်းအလုပ်အကိုင် လုပ်မည့်သူများ ပံ့ပိုးပေးနိုင်ရန်အတွက်ကို အချက်အလက်များ အထောက်အထားပြည်‌့စုံစွာ သိမ်းဆည်းပြီးမှ ပူးပေါင်းညှိနှိုင်း ဆောင်ရွက်ရခြင်း ဖြစ်သည့်အတွက် စီစဉ်ဆောင်ရွက်ရခြင်း ဖြစ်ပါကြောင်း ရှင်းလင်းဖြေကြားပါသည်။

ဦးအောင်ခင်ဝင်း (မြိုင်မဲဆန္ဒနယ်) က ဆက်စပ်မေးခွန်း မေးမြန်းပါသည်။

ဝန်ကြီးကလည်း အမည်မှန်ဖြစ်ရန် အရေးကြီးကြောင်းကို အထောက်အထားပေါင်းစုံ လုပ်ရသည် ဆိုသည်ကိုလည်း တင်ပြသွားပါကြောင်း၊ ၎င်းအထောက်အထား ပေါင်းစုံတွင် မိမိက ၃ ချက်သာ ဖြေလျော့ခိုင်းခြင်း ဖြစ်ပါကြောင်း၊ ၁၂ ချက် ခန့်ရှိသည်ဆိုသော်လည်း အချိန်မလောက်မည် ဆိုးသဖြင့် မတင်ပြဘဲ အချက် ၃ ချက်ဖြင့် ဝန်ထုပ်ဝန်ပိုးဖြစ်နေသည့်အတွက် အဆိုပါအချက် ၃ ချက်ကို လျော့ပေးနိုင်ခြင်းမရှိပါက ၃၀၀၀၀ ခန့်ကုန်သည်ကို မိမိတို့ပြန်ဆက်များနှင့်ညှိပြီး ၁၀၀၀၀ ခန့် ကုန်အောင် စီစဉ်ဆောင်ရွက် ပေးနိုင်မှုရှိ/မရှိ ဆက်စပ်မေးခွန်း မေးမြန်းပါသည်။

ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာမျိုးသိမ်းကြီး

ကိုယ်စားလှယ်ကြီး၏ ဆက်စပ်မေးခွန်းနှင့် ပတ်သက်ပြီး ဖြေကြားရန် မရှိပါကြောင်းဖြင့် ရှင်းလင်းပြောကြားပါသည်။

ပြည်ထောင်စုဝန်ကြီး ဒေါက်တာမျိုးသိမ်းကြီး