Skip to main content

 

ပထမအပိုင်းအနေဖြင့် မယ်စဲ့မြို့ပေါ်တွင်တည်ရှိနေသော မယ်စဲ့ရေစုကန် ကိစ္စဖြစ်ပါကြောင်း၊ အဆိုပါမယ်စဲ့ ရေစုကန်သည် ဘဏ္ဍာငွေမြောက်မြားစွာ ကုန်ဆုံးပြီး ယနေ့အထိ ပြည်သူလူထုအတွက် အသုံးမဝင်သည့် ရေစုကန်လည်း ဖြစ်ပါကြောင်း၊ ရေစုကန်တည်ဆောက်ခြင်း၏ ရည်ရွယ်ချက်သည် မယ်စဲ့မြို့နယ် ပြည်သူလူထုအတွက် တည်ဆောက်ပေးခြင်း ဖြစ်သည်ဟု သိရပါကြောင်း၊ သို့သော်လည်း ပြည်သူလူထုအတွက် သောက်သုံးရေလည်း သုံးစွဲခွင့်မရ၊ စိုက်ပျိုးရေလည်း စိုက်ပျိုးခွင့် မရ ဖြစ်နေခြင်းမှာ နှစ်အတော်ကြာနေပြီလည်း ဖြစ်ပါကြောင်း၊ စနစ်အမှားတစ်ခုကြောင့် တည်ဆောက်ခဲ့သည့် ရေစုကန်ကို ပစ်ထားမည်ဆိုပါက တိုင်းပြည်ဘဏ္ဍာငွေကို အလဟဿ ဖြုန်းတီးနေသည်နှင့် အတူတူဖြစ်နေပါကြောင်း၊ အဆိုပါရေစုကန်၏ အဓိကပြဿနာက ရေမနေခြင်း ပြဿနာဖြစ်နေပါကြောင်း၊ မိုးတွင်းကာလတွင်သာ ရေရရှိပါကြောင်း၊ ထို့ကြောင့် ရေစုကန် တည်ဆောက်မည်ဆိုလျှင် ပညာရှင်ဖြင့် သေချာတိုင်းတာပြီးမှ ပြည်သူလူထုအတွက် အကျိုးပြုစေမည့် အရာအဖြစ် တည်ဆောက် စေလိုပါကြောင်း၊ ထို့ကြောင့် ရေစုကန်ကို ပြည်သူလူထုအတွက် အမှန်တကယ် အကျိုးပြုနိုင်မည့် ရေစုကန်ပြန်လည် ဖြစ်နိုင်အောင် ပညာရှင်ဖြင့် ပြုပြင်ထိန်းသိမ်းပေး နိုင်ရန် တောင်းဆိုလိုခြင်း ဖြစ်ပါကြောင်း၊

ဒုတိယအပိုင်းအနေဖြင့် မယ်စဲ့မြို့နယ် မယ်စဲ့အုပ်စု မယ်စဲ့ကျေးရွာတွင်တည်ရှိသည့် ဟိုစဲ့မြို့သစ် ဆည်ဟု အမည်ရပါကြောင်း၊ ကယားပြည်နယ်အတွင်း တည်ရှိသည့် ဆည်ကြီးတစ်ဆည် အပါအဝင်လည်း ဖြစ်ပါကြောင်း၊ ကယားပြည်နယ်နေ့ အခမ်းအနားကျင်းပသည့်အခါ ပြခန်းများတွင် ပြသခြင်းခံရသည့် ဆည်ကြီးလည်း ဖြစ်ပါကြောင်း၊ ပြခန်းများတွင် ဟန်ရေးပန်ရေးဖြင့် ပြသခြင်းခံရခြင်းမှာလည်း လက်တွေ့မြေပြင်တွင် ပြခန်းမှာ ပြထားသည့်ပုံနှင့် တခြားစီဖြစ်နေပါကြောင်း၊ မယ်စဲ့မြို့နယ် ဟိုစဲ့ကျေးရွာတွင်တည်ရှိသည့် ဟိုစဲ့မြို့သစ်ဆည်သည်လည်း မယ်စဲ့မြို့ပေါ်က ရေစုကန်နှင့် ထိုနည်းလည်းကောင်း အတူတူဖြစ်ပါကြောင်း၊ သို့သော်လည်း လတ်တလောတွင် ပြည်သူလူထုအတွက် မည်သို့မျှအကျိုးမပြုခြင်းမှာက စိတ်မကောင်းစရာ ဖြစ်ပါကြောင်း၊ ၎င်းဆည်ကို တည်ဆောက်ရန်အတွက် ပြည်သူလူထုကို ကြွေးကြော်ထားသည်က ၂၄ နာရီ လျှပ်စစ်မီးရရှိရေး၊ စိုက်ပျိုးရေရရှိရေးနှင့် သောက်သုံးရေရာသီမရွေး ရရှိရေးဆိုသည့် ကြွေးကြော်သံဖြင့် တည်ဆောက်ခြင်းလည်း ဖြစ်ပါကြောင်း၊ ယခု တိုင်းပြည်ဘဏ္ဍာငွေကို သိန်းပေါင်း ထောင်ချီသုံးစွဲပြီး မည်သည့်အတွက်ကြောင့် ဆည်ကို ဆည်နှင့်မတူအောင် မတည်ဆောက်နိုင်ကြ သနည်း ဆိုသည့်မေးခွန်း ထုတ်ချင်လာပါကြောင်း၊ အဓိကပြဿနာက ပညာရှင်မပါဘဲ ဆည်တည်ဆောက်ခြင်း ဖြစ်သည်ဟု ယူဆမိပါကြောင်း၊

ပထမပိုင်းက တင်ပြထားသည့် မယ်စဲ့ရေစုကန်နှင့် အလားတူဖြစ်ပါကြောင်း၊ ယခု မိုးတွင်းရေရရှိပြီး နွေရာသီနှင့်ဆောင်ရာသီတွင် ရေမရပါကြောင်း၊ ရေမရှိသည့်အတွက် နွေစပါးလုပ်မည့် တောင်သူများ၊ ကြက်သွန်စိုက်မည့် တောင်သူများအတွက် ရေအခက်အခဲ ဖြစ်နေပါကြောင်း၊ မိမိတို့ မယ်စဲ့မြို့နယ်၏ တောင်သူလယ်သမားများသည် တစ်နှစ်လုံးမှ စပါးတစ်ကြိမ်ကိုသာ စိုက်ပျိုးခွင့်ရကြပါကြောင်း၊ ဆည်ကြီးရှိပြီး ရေမရှိသည့် ပြဿနာကြောင့် မိုးတွင်းတစ်မိုးကိုသာ စိုက်ပျိုးခွင့်ရရှိနေခြင်း ဖြစ်ပါကြောင်း၊ တိုင်းပြည်ဘဏ္ဍာငွေ မြောက်မြားစွာသုံးပြီး တည်ဆောက်ထားသော ဟိုစဲ့မြို့သစ် ဆည်ကြီးကို ပြည်သူလူထုအတွက် အမှန်တကယ်ပြန်လည် အကျိုးဖြစ်ထွန်းလာနိုင်အောင် ရေလည်း နွေ၊ မိုး၊ ဆောင်း အစဉ်အမြဲရှိနေအောင် ပညာရှင်ဖြင့် ပြန်လည်စမ်းသပ်ပြီး ပြုပြင်ထိန်းသိမ်း ပေးနိုင်ခြင်း ရှိ/မရှိသိရှိ လိုပါကြောင်း မေးမြန်းပါသည်။


 

ကယားပြည်နယ်၊ မယ်စဲ့မြို့နယ်တွင်ရှိသည့် မယ်စဲ့ရေစုကန်ကို မြို့သောက်သုံးရေ ပေးဝေနိုင်ရန်အတွက် ရည်ရွယ်ပြီး ထိုစဉ်ကာလ ကယားပြည်နယ် အေးချမ်းသာယာရေးနှင့် ဖွံ့ဖြိုးရေး ကောင်စီ၏ လမ်းညွှန်ချက်ဖြင့် ဆည်မြောင်းနှင့်ရေ အသုံးချမှု စီမံခန့်ခွဲရေး ဦးစီးဌာနက ၂၀၀၅-၀၆ ခုနှစ်တွင် တည်ဆောက်ပေးခဲ့ခြင်း ဖြစ်ပါကြောင်း၊ ကန်ပေါင်အလျား ပေ ၄၀၀ ခန့်၊ အမြင့် ၂၆ ပေရှိပြီး ကန်ရေအပြည့် ရေသိုလှောင်နိုင်သည့် ပမာဏသည် ဧကပေ ၃၉ ပေခန့် ရှိပါကြောင်း၊ ရာသီဥတု ဖောက်ပြန် ပြောင်းလဲလာမှု အခြေအနေများကြောင့် မယ်စဲ့ရေထွက်တွင် မိုးရာသီတွင်သာ ရေစီးထွက်မှုရှိပြီး ကျန်ကာလများတွင် ရေစီးထွက်လျော့နည်း လာခဲ့သည့်အတွက် ကန်အတွင်း ရေစီးဝင်မှု နည်းပါးလာသည့် အခြေအနေရှိလာပါကြောင်း၊ မိုးရာသီတွင် မယ်စဲ့ရေထွက်ကရေကို ရေစုကန်အတွင်း စုဆောင်းသိုလှောင် ထားသော်လည်း ကန်ရေဝပ်ဧရိယာ အောက်ခံမြေလွှာ အတွင်းကနေ ရေစိမ်‌့ထွက်ရှိမှု ရှိနေပါကြောင်း၊ ထို့အတူ မိုးကုန်ပြီး နွေရာသီရောက်လာသည့်အချိန် ရေငွေ့ပျံမှုကြောင့်လည်း ဆောင်းနှင့်နွေးရာသီများတွင် ကန်အတွင်း ထိန်းသိမ်းထားသည့် ရေများသည် သိုလှောင်ထားသော ပမာဏနည်းပါးလာသည့် အခြေအနေ ဖြစ်ပေါ်လာခဲ့ပါကြောင်း၊ ထို့ကြောင့် ဒေသအစီအစဉ်ဖြင့် မယ်စဲ့ရေထွက်က‌ ရေကို ကန်၏အထက်ဘက် ရေထွက်ကနေပြီး ရေပိုက်ဖြင့်တိုက်ရိုက် သွယ်တန်းခြင်းဖြင့် နယ်စပ်ကုန်သွယ်ရေးစခန်း အပါအဝင် ဘုန်းကြီးကျောင်း တစ်ကျောင်းနှင့် ပညာရေးဝန်ထမ်း၊ အိမ်ရာအချို့ကို သောက်သုံးရေပေးဝေလျက် ရှိပါကြောင်း စိစစ်သိရှိရပါသည်။ လက်ရှိမယ်စဲ့မြို့ သောက်သုံးရေ ရရှိရေးအတွက် မြို့နယ်စည်ပင်သာယာရေး အဖွဲ့အနေဖြင့် မယ်စဲ့ချောင်းကရေကို လျှပ်စစ်ရေတင်စနစ် တင်ယူသန့်စင်ပြီး လုံလောက်စွာ ပေးဝေလျက် ရှိပါကြောင်း၊ သို့ဖြစ်သည့်အတွက် ကန်အတွင်းကို ဝင်ရောက်နိုင်သည့် ရေအရင်းအမြစ် နည်းပါးမှုအခြေအနေ အရလည်းကောင်း၊ ကန်ရေဝပ်ဧရိယာအောက်ခံမြေ ရေလုံအောင် ဆောင်ရွက်ရာတွင် ကုန်ကျစရိတ်လွန်စွာ များပြားနိုင်သောကြောင့်လည်းကောင်း လက်ရှိ အခြေအနေရလည်း မြို့နယ်စည်ပင်သာယာရေး အဖွဲ့အနေနဲ့ မြို့သောက်သုံးရေကို လုံလောက်စွာ ပေးဝေနိုင်လျက်ရှိသည့် အခြေအနေကြောင့်လည်းကောင်း လက်ရှိအနေအထားအတိုင်းသာ ထိန်းသိမ်းဆောင်ရွက် သင့်ပါကြောင်း ကယားပြည်နယ်အစိုးရ အဖွဲ့ကလည်း ရှင်းလင်းဖြေကြား ထားပါကြောင်း၊

ဆက်လက်ပြီး မယ်စဲ့မြို့နယ်တွင်ရှိသည့် ဟိုစဲ့ရေလွှဲဆည်ပြန်လည် ပြုပြင်ရန်ကိစ္စနှင့် ပတ်သက်ပြီး ဟိုစဲ့ရေလွှဲဆည်ကို မိုးစပါးစိုက်ပျိုးရေပေးဝေနိုင်ရန် ရည်ရွယ်ပြီး နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီလက်ထက် ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာန ထိုစဉ်က ဆည်မြောင်း ဦးစီးဌာနအနေဖြင့် ၂၀၀၉-၁၀ တွင် တည်ဆောက်ပြီးစီးခဲ့သော ဆည်ဖြစ်ပါကြောင်း၊ ရေလွှဲဆည်သည် အလျား ပေ ၂၀၀၊ အမြင့် ၂၇ ပေခန့်ရှိပါကြောင်း၊ မိုးရာသီတွင် ရေထွက်ကရေကို ပိတ်ဆို့သိုလှောင်ပြီး မိုးစပါးစိုက်ပျိုးရေပေးဝေလျက် ရှိသော်လည်း ကျန်ကာလများတွင် ရေထွက်က ရေစီးထွက်မှု မရှိသည့်အတွက် စိုက်ပျိုးရေမပေးဝေနိုင်သည့် အခြေအနေ ဖြစ်ပါကြောင်း၊ ရေလွှဲဆည် တည်ဆောက်ခြင်း၏ သဘောသဘာဝသည်လည်း မိုးရာသီတွင်သာ စီးဝင်ရေရှိပြီး ကျန်ကာလများတွင် စီးဝင်ရေမရှိသည့် ရေအရင်းအမြစ်ပေါ်တွင် အခြေတည် တည်ဆောက်ရခြင်း ဖြစ်သည့်အတွက် တစ်နှစ်ပတ်လုံး ရေသိုလှောင်ထိန်းသိမ်း ထားနိုင်ခြင်း မရှိသည့် အနေအထား ဖြစ်ပါကြောင်း၊

၂၀၁၄-၁၅ ခုနှစ် ဟိုစဲ့မြို့သစ်သောက်သုံးရေ ရရန်အတွက် ရေလွှဲဆည်ကနေပြီး ရေပိုက် သွယ်တန်းပေးခြင်း လုပ်ငန်းကို ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန အနေဖြင့် ပံ့ပိုးစီမံ ဆောင်ရွက်ပေးခဲ့ပါကြောင်း၊ ထို့နောက် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက ဟိုစဲ့မြို့သစ် သောက်သုံးရေ ရရှိရေးအတွက် ရေလွှဲဆည်၏ အထက်ဘက် ပေ ၃၀၀၀ ခန့်အကွာတွင် အုတ်ရေလှောင် ကန်တည်ဆောက်ပြီး ရေထွက်မှရေ စုဆောင်းသိုလှောင်မှုနှင့် ရေပိုက်သွယ်တန်းပြီး သောက်သုံးရေ ပေးဝေလျက်ရှိပါကြောင်း၊ ဟိုစဲ့ရေလွှဲဆည်ကို အစဉ်အမြဲရေရရှိအောင် ပြုပြင်နိုင်ရေးသည် ရင်းနှီးမြှုပ်နှံမှုများစွာ ကုန်ကျဆောင်ရွက်ရမည့် အခြေအနေဖြစ်ပါကြောင်း၊ ပညာရှင်များနှင့် စူးစမ်းလေ့လာမှု ဆောင်ရွက်ခဲ့ပြီးလည်း ဖြစ်ပါကြောင်း၊ သို့ဖြစ်သည့်အတွက် ဒေသ ရေရရှိရေးကို ဆောင်ရွက်ပေးလိုသော်လည်း ဒေသ၏ ရေမြေသဘာဝ အနေအထားအရ ရေလွှဲဆည် အတွင်းကို မိုးရာသီမှသာ စီးဝင်ရေရှိပြီး ကျန်ကာလများတွင် စီးဝင်ရေမရှိသည့်အတွက် လက်တွေ့တွင် လိုလားသည့်အတိုင်း ရေဝင်ရောက်နိုင်သည့် အ‌ခြေအနေမရှိသည့် အတွက်ကြောင့် ဟိုစဲ့ရေလွှဲဆည်ကို ရေအစဉ်အမြဲရရှိအောင် ပြုပြင်ရန်အတွက် သင့်လျော်မှု မရှိပါကြောင်း၊ ကယားပြည်နယ် အစိုးရအဖွဲ့၏ ဖြေကြားချက်နှင့်အတူ ပေါင်းစပ်ရှင်းလင်း ဖြေကြားပါသည်။

စိုက်ပျိုးရေး၊ မွေးမြူရေးနှင့် ဆည်မြောင်း၊ ဒုတိယဝန်ကြီး ဦးလှကျော်