Skip to main content

(က)-နိုင်ငံတစ်ဝန်းတွင် ဖွင့်လှစ်ထားရှိကြသည့် နားမကြားကျောင်းများရှိ ကျောင်းသူ၊ ကျောင်းသားများနှင်‌့ ကျောင်းသို့ရောက်ရှိမလာသော ကလေးသူငယ်များ၊ အရွယ်ရောက်ပြီးသူများ၏ ဘဝရှေ့ရေး လုံခြုံ ချောမွေ့စွာ ရပ်တည်နိုင်ရေးအတွက် မည်သို့စီမံဆောင်ရွက်ထားသည်ကို သိလိုခြင်းနှင်‌့ စပ်လျဉ်းသည့် မေးခွန်း

နိုင်ငံတော်ကို စတင်ထူထောင်ခဲ့ကြသည့် နိုင်ငံသူနိုင်ငံသားများသည် အမြော်အမြင်ကြီးမားပြီး နူးညံ့သိမ်မွေ့ကြသူများ ဖြစ်ပါကြောင်း၊ ထို့ကြောင့် မွေးရာပါမသန်စွမ်း ဦးရေသည် တခြားနိုင်ငံသားများနှင်‌့ နှိုင်းယှဉ်လျှင် ရာခိုင်နှုန်းအားဖြင့် များနေသော်လည်း မိမိပတ်ဝန်းကျင်တွင် အတွေ့နည်းနေရခြင်း ဖြစ်ပါကြောင်း၊ ၎င်းသည် နိုင်ငံသူ/သားများ၏ လူ့အသိုင်းအဝိုင်း တစ်ခုလုံးအပေါ် ထားရှိသည့် တန်ဖိုးကိုဖော်ပြခြင်း ဖြစ်သဖြင့် ဂုဏ်ယူရပါကြောင်း၊

နိုင်ငံတကာတွင် နားမကြားကလေးသူငယ်များ၊ တခြားကလေးသူငယ်များနှင်‌့ ဆက်သွယ်ပြောကြား နိုင်ရေး၊ ပညာဗဟုသုတရှာဖွေနိုင်ရေးနှင်‌့ လွတ်လပ်စွာအသက်မွေးဝမ်းကျောင်း ပြုနိုင်ရေးအတွက် ရည်ရွယ်ချက်များနှင်‌့ လက်ဟန်ခြေဟန်နှင်‌့ ပြောဆိုခြင်းကို ရာစုနှစ်အတော်ကြာ ကတည်းက တီထွင်ဖန်တီးပြီး ပညာသင်ကြား ပေးခဲ့ကြပါကြောင်း၊ ၎င်းတို့ထဲမှ မိမိတို့ မြန်မာစာကိုလည်း သင်ကြားနေနိုင်ပြီ ဖြစ်ပါကြောင်း၊ မိမိတို့နိုင်ငံတွင် နားမကြားသော ကလေးသူငယ်များအတွက် ပထမဦးဆုံး ဖွင့်လှစ်သင်ကြားပေးခဲ့သည်က ၁၉၂၀ ခုနှစ်က ရန်ကုန်မြို့ မယ်ရီချက်မင်းကျောင်း ဖြစ်ပါသည်။ ယခုဆိုလျှင် တစ်နိုင်ငံလုံးအတိုင်းအတာနှင်‌့ ရန်ကုန်တွင်နှစ်ကျောင်း၊ မန္တလေးတွင် တစ်ကျောင်းနှင်‌့ ကလေးမြို့မြို့ရွာ နားမကြားအပါအဝင် ကျောင်းပေါင်းလေးကျောင်း ဖွင့်လှစ်ထားပါကြောင်း၊ မြို့ရွာကျောင်းများဆိုလျှင် ၂၀၀၅ ခုနှစ် ကျောင်းသား/သူ ခြောက်ဦး၊ ဆရာမ နှစ်ဦးနှင်‌့ မြေအကျယ်အဝန်း ၁၅၀ ပေ ပတ်လည်အကျယ်အဝန်းတွင် ကိုယ့်အားကိုယ်ကိုး စတင် ထူထောင်ခဲ့ခြင်း ဖြစ်ပါကြောင်း၊ ယခုဆိုလျှင် ကျောင်းသားဦးရေ ၃၉ ဦး၊ ဆရာမရှစ်ဦးထိ ရှိလာခဲ့ပါကြောင်း၊ ၂၀၁၆ ခုနှစ်တွင် အသင်းအဖွဲ့များ မှတ်ပုံတင်ဥပဒေနှင့်အညီ လျှောက်ထား ဆောင်ရွက်ခဲ့ပြီး ၂၀၁၈ ခုနှစ်တွင် ခွင့်ပြုချက်အမှတ် ၈၇/A နှင်‌့ ဥပဒေနှင့်အညီ ဆောင်ရွက်လျက် ရှိပါကြောင်း၊ မိမိယခုလို တင်ပြသည်မှာ အဖွဲ့အစည်းတစ်ခုခုကို ထင်ရှားပေါ်လွင်စေလိုသည့် ဆန္ဒမဟုတ်ပါကြောင်း၊ နိုင်ငံသူ/သားများ၏ တာဝန်ကျေပွန်မှုကို ပေါ်လွင်ထင်ရှားစေလိုသည့် စေတနာသက်သက် ဖြစ်ပါကြောင်း၊ နိုင်ငံတော်အစိုးရအနေဖြင့်လည်း သက်ကြီးရွယ်အိုများ၊ ကိုယ်ဝန်ဆောင် မိခင်များနှင်‌့ ကလေးများ၊ မသန်စွမ်းသူများကို ယခုနှစ်ပိုင်းအတွင်း ပိုမိုထောက်ပံ့ပြီး စောင်‌့ရှောက်လာသည်ကို မျက်မြင် ကိုယ်တွေ့ဖြစ်ပါကြောင်း၊ သို့သော်လည်း ဆွံ့အနားမကြား သူများအတွက် အားနည်းနေသေးသည်ကို မိမိတို့မဲဆန္ဒနယ်မြေရှိ ပရဟိတနားမကြားကျောင်းလေးကို ကြည့်ခြင်းအားဖြင့် သိနိုင်ခြင်းဖြစ်ပါကြောင်း၊

ဆွံ့အနားမကြားသူများသည် ဉာဏ်ရည်အမျိုးမျိုးရှိကြပါကြောင်း၊ အချို့က အခြားသူများ၏ ရာနှုန်းပြည့်ကြည့်ရှု စောင်‌့ရှောက်မှု လိုအပ်သကဲ့သို့ အချို့သူများကို စနစ်ကျသည့် ထောက်ပံ့ကူညီမှု အချို့ကိုသာ ပေးနိုင်ခဲ့မည်ဆိုလျှင် ကိုယ့်ခြေထောက်ပေါ် ကိုယ်ရပ်တည်နိုင်စွမ်း ရှိကြမည်ဆိုတာ လေ့လာတွေ့ရှိရပါကြောင်း၊ ထို့ကြောင့် မိမိမေးမြန်းလိုသည်မှာ နိုင်ငံတစ်ဝန်းလုံးတွင်  ဖွင့်လှစ်ထားရှိသော  နားမကြားကျောင်းများ ကျောင်းသား/သူများနှင်‌့ ကျောင်းသို့ရောက်ရှိ မလာသော ကလေးသူငယ်များ၊ အရွယ်ရောက်သူများ ဘဝရှေ့ရေးလုံခြုံချောမွေ့စွာ ရပ်တည်နိုင်ရေးအတွက် နိုင်ငံတော်မှ မည်သို့စီမံဆောင်ရွက် ထားသည်ကို သိရှိလိုပါသဖြင့် မေးမြန်းပါသည်။


 

လူမှုဝန်ထမ်း၊ ကယ်ဆယ်ရေးနှင်‌့ ပြန်လည်နေရာချထားရေး ဝန်ကြီးဌာနတွင် ယခင်က ဦးစီးဌာန နှစ်ခုဖြင်‌့ ဖွဲ့စည်းထားရှိရာမှ ၃၀-၁-၂၀၁၈ ရက်နေ့တွင် ပြန်လည်ထူထောင်‌ရေး ဦးစီးဌာနအသစ် တစ်ခုကို မသန်စွမ်းသူများ၊ သက်ကြီးရွယ်အိုများ၊ မူးယစ်ဆေးဖြတ်ပြီးသူများ၊ လူကုန်ကူးခံရသူများ၊ စွန့်ပစ်ကလေးများ၊ လမ်‌းပေါ်နေကလေးများ၊ အမျိုးသမီးများ၊ တိုက်ပွဲရှောင်ပြည်သူများ၊ ရွှေ့ပြောင်း လုပ်သားများ၏ မိသားစုများစသည့် လူမှုဒုက္ခခံစားနေရသူများအတွက် ပြန်လည်ထူထောင်ပေးခြင်းဖြင့် ပိုမိုကောင်းမွန်သည့် လူနေမှုဘဝရရှိရန် မူဝါဒများဖြင့် အသစ်တိုးချဲ့၍ ဖွဲ့စည်းခဲ့ပါကြောင်း၊

နိုင်ငံတော်အနေဖြင့် မသန်စွမ်းသူများ၏ အခွင်‌့အရေးဥပဒေကို ၅-၆-၂၀၁၅ ရက်နေ့တွင် အတည်ပြုပြဋ္ဌာန်း ပေးခဲ့ပြီးဖြစ်သဖြင့် ၂၇-၁၂-၂၀၁၇ ရက်နေ့တွင် မသန်စွမ်းသူများ၏ အခွင်‌့အရေး နည်းဥပဒေများကို ထုတ်ပြန်ခဲ့ပြီးဖြစ်ပါကြောင်း၊ မသန်စွမ်းသူများ၏ အခွင်‌့အရေးဥပဒေပုဒ်မ ၄ အရ မသန်စွမ်းသူများ၏ အခွင်‌့အရေးများဆိုင်ရာ အမျိုးသားကော်မတီကို ဒုတိယသမ္မတ-၂ ဦးဆောင်၍ ဆက်စပ်ဝန်ကြီးဌာနများမှ ပြည်ထောင်စုဝန်ကြီး၊ ဒုတိယဝန်ကြီးများ၊ အမြဲတမ်းအတွင်းဝန်များ တိုင်းဒေသကြီး၊ ပြည်နယ်များမှ သက်ဆိုင်ရာဝန်ကြီးများအပြင် မသန်စွမ်းသူများ ဖွံ့ဖြိုးတိုးတက်ရေး ဆောင်ရွက်လျက်ရှိသည့် မြန်မာနိုင်ငံမသန်စွမ်းသူများ အသင်းချုပ်မှဥက္ကဋ္ဌကို ဒုတိယဥက္ကဋ္ဌနေရာ၌ လည်းကောင်း၊ အတွင်းရေးမှူးကို တွဲဖက်အတွင်းရေးမှူးအနေဖြင့် လည်းကောင်း၊ ထို့နောက် အရပ်ဘက် အဖွဲ့အစည်း လေးခုမှရရှိသည့် မသန်စွမ်းအမျိုးအစားအလိုက် ကိုယ်စားလှယ်ကိုးဦးကို ထည့်သွင်းဖွဲ့စည်း ထားရှိပါကြောင်း၊ အမျိုးသားကော်မတီကို အထောက်အကူပြု ဖြစ်စေရန်အတွက် လုပ်ငန်းကော်မတီနှင့် နေပြည်တော်၊ တိုင်းဒေသကြီး/ပြည်နယ် ကော်မတီများတွင် ဖွဲ့စည်းထားရှိသည့်အပြင် ဆပ်ကော်မတီရှစ်ခုကိုလည်း ဖွဲ့စည်းနိုင်ရေး ဆောင်ရွက်လျက်ရှိပါကြောင်း၊ ၅-၁၂-၂၀၁၈ ရက်နေ့မှ ကျင်းပပြုလုပ်ခဲ့သော အမျိုးသားကော်မတီ၏ ၂/၂၀၁၈ အစည်းအဝေးက ဆုံးဖြတ်ချက် ၁၇ ချက်ချမှတ်ပြီး ဥပဒေပါပြဋ္ဌာန်းချက်များနှင့်အညီ အမျိုးသားကော်မတီအနေဖြင့် သက်ဆိုင်ရာဌာန အဖွဲ့အစည်းများနှင့် ပူးပေါင်းအကောင်အထည်ဖော် ဆောင်ရွက်လျက်ရှိပါကြောင်း၊ ထို့ကြောင့် ဥပဒေထဲတွင် မသန်စွမ်းသူများ၏ ပညာသင်ကြားခွင်‌့၊ ကျန်းမာရေးစောင်‌့ရှောက်မှု ခံယူခွင်‌့၊ ပညာသင်ယူပိုင်ခွင်‌့များ ပြဋ္ဌာန်းထားသည့်အခါ ပညာသင်ကြားရာတွင် သင်ရိုးညွှန်းတမ်းများ၊ သင်ထောက်ကူ ပစ္စည်းများရရှိရေး၊ ကျောင်းဝင်ခွင်‌့ရရှိရေး အထူးပညာရေး၊ ကျောင်းပြင်ပ ပညာရေးနှင်‌့ အသက်မွေးကျောင်းအစီအစဉ်များကို ဆောင်ရွက်ပေးရမည်ဟု ပြဋ္ဌာန်းပေးထား ပါကြောင်း၊ ဥပဒေအခန်း ၁၁ အရ နည်းဥပဒေများတွင်လည်း မသန်စွမ်းမှုအဆင်‌့ ခွဲခြားသတ်မှတ်သည့် ပုံစံများကို သတ်မှတ်ထားရှိပြီး ဖြစ်သည့်အတွက် နိုင်ငံတော်အစိုးရနှင့် အခြားအဖွဲ့အစည်းများမှ ထောက်ပံ့မှုများ၊ ပညာရေး၊ ကျန်းမာရေး၊ အလုပ်အကိုင်စသည့် အကျိုးကျေးဇူးတို့ကို အဆင်‌့သတ်မှတ် ချက်နှင်‌့အညီ ရရှိခံစားနိုင်စေရန် မသန်စွမ်းသူများ မှတ်ပုံတင်ခြင်းနှင့် မသန်စွမ်းမှုအဆင့် သတ်မှတ်ရေးစနစ် ပေါ်ထွက်လာစေရေး ဆောင်ရွက်လျက်ရှိရာ ၂၀၁၈-၁၉ ဘဏ္ဍာရေးနှစ်တွင် အဆိုပါ လုပ်ငန်းများ ဆောင်ရွက်ရန် နိုင်ငံတော်ဘဏ္ဍာငွေ ခွဲဝေရရှိထားပြီး ဖြစ်ပါကြောင်း၊ ကနဦးစီမံကိန်းများကို မကွေးတိုင်းဒေသကြီး၊ ပဲခူးတိုင်းဒေသကြီး၊ ကရင်ပြည်နယ်၊ မွန်ပြည်နယ်တို့တွင် အကောင်အထည်ဖော်ရန် စတင်စီမံဆောင်ရွက်လျက်ရှိပါကြောင်း၊ အဆိုပါစနစ် ဆောင်ရွက်စဉ် ကာလအတွင်း ဝန်ကြီးဌာနအနေဖြင့် ၂၀၁၇-၁၈ ခုနှစ် ဘဏ္ဍာရေးနှစ်နှင့် ယခု ဘဏ္ဍာရေးနှစ်ဖြစ်သည့် ဇန်နဝါရီလထိ မသန်စွမ်းသူ ၅၆၁၉၇ ဦးအတွက် ထောက်ပံ့ငွေကျပ်သန်း ၂၃၁၆.၇၁၅ ကို ထောက်ပံ့ပေးနိုင်ခဲ့ပြီး အများပြည်သူဆိုင်ရာ နေရာများသို့ မသန်စွမ်းသူများ အလွယ်တကူ သွားလာနေနိုင်စရာ အတားအဆီးကင်းသော ပတ်ဝန်းကျင် ဖန်တီးဖော်ဆောင် ရေးကိုလည်း သက်ဆိုင်ရာဝန်ကြီးဌာနများက ထိရောက်စွာဆောင်ရွက်နိုင်ရေး ဆက်လက်ညှိနှိုင်း ဆောင်ရွက်လျက် ရှိပါကြောင်း၊ မြန်မာနိုင်ငံတစ်ဝန်း မသန်စွမ်းသူများအတွက် လူမှုဝန်ထမ်းဦးစီး ဌာနက ဖွင့်လှစ်ထားရှိသော မသန်စွမ်းကျောင်း ရှစ်ကျောင်းနှင့် ဦးစီးဌာနတည်ထောင် ခွင့်ပြုမိန့်ရရှိပြီး ထောက်ပံ့ကြေးပေးလျက်ရှိသည့် မသန်စွမ‌ျားဂေသည် ၁၂ ခုရှိပါကြောင်း၊ ဦးစီးဌာနမှ ဖွင့်လှစ်ထားသည့် မသန်စွမ်းကျောင်းများတွင် စာပေပညာ၊ အသက်မွေးဝမ်း ကျောင်းပညာရပ်များအား လေ့ကျင့်သင်ကြားပေးလျက်ရှိရာ နားမကြားသော ကလေးများကျောင်း မန္တလေးနှင်‌့ရန်ကုန်တို့တွင် အသက်ခြောက်နှစ်မှ ၁၈ နှစ်အတွင်းရှိ အကြားအာရုံ ချို့ယွင်းသူများကို လက်ခံစောင်‌့ရှောက် ပေးလျက်ရှိပါကြောင်း၊ အဆိုပါ ကျောင်နှစ်ကျောင်းတွင် ဌာနပိုင်အဆောင်များ၊ နေ့တက် ကျောင်းသား/သူပေါင်း ၃၂၆ ဦးရှိရာ ၂၀၁၈-၁၉ ပညာသင်နှစ်တွင် ကျောင်းသား/သူ ၃၁၀ ဦးတို့အား ပညာသင်ကြားပေးလျက်ရှိပြီး ၁၆ ဦးကို ကျောင်းပညာနှင်‌့ အသက်မွေးဝမ်း ကျောင်းပညာများကို တွဲပြီး သင်ကြားပေးလျက် ရှိပါကြောင်း၊ နားမကြားကျောင်းများတွင် စားဖိုမှူး၊ စက်ချုပ်၊ ဇာထိုး၊ ပန်းထိုး၊ ရေဆေးဆီလိုက်စသည့် သင်တန်းများကိုဖွင့်လှစ် သင်ကြားပေးပြီး အလုပ်အကိုင်ရရှိရေး ချိတ်ဆက်ဆောင်ရွက် ပေးလျက်ရှိရာ နားမကြားသူ ၇၂ ဦး အား ဝင်ငွေရ လုပ်ငန်းများကို လုပ်ကိုင် လျက်ရှိပါကြောင်း၊ ယခုလိုဆောင်ရွက်လျက် ရှိသော်လည်း တစ်နိုင်ငံလုံး လွှမ်းခြုံနိုင်မှု မရှိသေးသည့်အတွက် နားမကြားကျောင်းများသို့ အကြောင်းအမျိုးမျိုးကြောင့် တက်ရောက်နိုင်ခြင်း မရှိသူများနှင့် မသန်စွမ်းသူများ၏ ဘဝဖွံ့ဖြိုးတိုးတက်ရေးအတွက် နည်းဥပဒေများအရ အစိုးရဌာန အဖွဲ့အစည်းများနှင်‌့ ညှိနှိုင်းဆောင်ရွက်ခြင်း၊ အလုပ်ရှင်များမှ အလုပ်သမားခန့်ထားရာတွင် ဝေပုံကျနှုန်းထားအတိုင်း ခန့်ထားနိုင်ရန် ကြီးကြပ်ခြင်း၊ ဝေပုံကျနှုန်းထားအတိုင်း ခန့်ထားခြင်း မပြုနိုင်ပါက သတ်မှတ်ငွေပမာဏကို မသန်စွမ်းသူများ၏ အခွင့်အရေးဆိုင်ရာ ရန်ပုံငွေသို့ ထည့်သွင်း ပေးရမည်ကို အသိပေးခြင်း၊ မသန်စွမ်းသူများအား အလုပ်ခန့်ထားပေးသည့် ကုမ္ပဏီများကို အခွန် လျှော့ပေါ့ ထမ်းဆောင်စေခြင်း၊ အလုပ်အကိုင်ခန့်ထားရေးနှင်‌့ ပတ်သက်၍ ဥပဒေပါအတိုင်းလိုက်နာ ဆောင်ရွက်နိုင်ရန် အသိပညာပေးခြင်း လုပ်ငန်းများ ဆောင်ရွက်သွားမည် ဖြစ်ပါကြောင်း၊ ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေး အေဂျင်စီ JIKA ၏ ငွေကြေးနှင်‌့နည်းပညာ ပံ့ပိုးမှုနှင်‌့ မြန်မာနိုင်ငံတွင်ရှိသည့် အကြားအမြင်ချို့ယွင်း မသန်စွမ်းသူများအတွက် ၂၀၀၀ ခုနှစ်တွင် လက်သင်္ကေတပြ စကားပြောစာအုပ်ထုတ်ဝေပြီး တိုင်းဒေသကြီး/ပြည်နယ်များတွင် အသိပညာပေး သင်တန်းများပေးခြင်း၊ ဆင့်ပွားသင်တန်းများ ဖွင့်လှစ်၍ စေတနာ့ဝန်ထမ်းများကို မွေးထုတ်ဆောင်ရွက် ပေးခဲ့သည့်အပြင် ၂၀၁၄ ခုနှစ် လူဦးရေနှင့်အိမ်အကြောင်းအရာ သန်းခေါင်စာရင်းအရ တစ်နိုင်ငံလုံးတွင် နားမကြားသူ ၆၇၃၁၂၆ ဦး လူဦးရေ၏ ၁.၃ ရာခိုင်နှုန်းရှိရာ နားမကြားသူ အရေအတွက် အနည်းအများပေါ် မူတည်ပြီးမှ လိုအပ်ချက်အလိုက် တိုင်းဒေသကြီး/ပြည်နယ်များတွင် နားမကြားကျောင်းများ တိုးချဲ့ဖွင့်လှစ်နိုင်ရေး လျာထားလျက်ရှိပါကြောင်း၊ မြန်မာနိုင်ငံမသန်စွမ်းသူများ ဖွံ့ဖြိုးတိုးတက်ရေး မဟာဗျူဟာ ၂၀၁၆-၂၅ ခုနှစ်ကိုလည်း ဦးတည်ကဏ္ဍ ခုနှစ်ရပ်ဖြင့် ရေးဆွဲထားပြီး ၎င်းမဟာဗျူဟာအား နှစ်အလိုက် လုပ်ငန်းစီမံချက်များ ရေးဆွဲပြီးအကောင်အထည်ဖော် ဆောင်ရွက်သွားမည် ဖြစ်ပါကြောင်း၊ သို့ဖြစ်ပါ၍ လွှတ်တော်ကိုယ်စားလှယ်ကြီး မေးခွန်းနှင်‌့စပ်လျဉ်း၍ အကြားအာရုံချို့ယွင်းနေသူများ အပါအဝင် မသန်စွမ်းကျောင်းသား/သူများနှင့် ကျောင်းသို့ရောက်ရှိ မလာသောကလေးသူငယ်များ အရွယ်ရောက်ပြီးသူများ၏ ဘဝရှေ့ရေး လုံခြုံချောမွေ့စွာ ရပ်တည်နိုင်ရေး၊ ပညာသင်ကြားရေးနှင့် အလုပ်အကိုင်အခွင့်အလမ်း ရရှိနိုင်ရေးတို့အတွက် ဆက်စပ်ဝန်ကြီးဌာနများ၊ လူမှုအဖွဲ့အစည်းများနှင်‌့ လူမှုဝန်ထမ်း၊ ကယ်ဆယ်ရေးနှင်‌့ ပြန်လည်နေရာ ချထားရေးဝန်ကြီးဌာနက စီစဉ်ပြဋ္ဌာန်း ဆောင်ရွက်လျက် ရှိပါကြောင်းနှင်‌့ လာမည့် ၂၀၁၉-၂၀ ခုနှစ် ဘဏ္ဍာရေးနှစ်တွင် မသန်စွမ်းသူများ၏ အခွင့်အရေး ဥပဒေပါလုပ်ငန်းများကို ထိရောက်အောင်မြင်စွာ အကောင်အထည်ဖော် ဆောင်ရွက်နိုင်ရန်အတွက် ရန်ပုံငွေတစ်ရပ် ထူထောင်နိုင်ရေး ဝန်ကြီးဌာန အနေဖြင့် ညှိနှိုင်းဆောင်ရွက် ထားရှိပါကြောင်း ရှင်းလင်းဖြေကြားပါသည်။

လူမှုဝန်ထမ်းကယ်ဆယ်ရေးနှင့် ပြန်လည်နေရာချထာရေး၊ ဒုတိယဝန်ကြီး ဦးစိုးအောင်