Skip to main content

 

ပြည်ထောင်စုသမ္မတမြန်မာနိုင်ငံတော်

 

ဒုတိယအကြိမ် ပြည်သူ့လွှတ်တော် (၁၂) ကြိမ်မြောက် ပုံမှန်အစည်းအဝေး ဆဋ္ဌမနေ့

 

အစည်းအဝေးမှတ်တမ်းအကျဉ်းချုပ်

 

(၂၀၁၉ ခုနှစ်၊ မေလ ၁၅ ရက်)

 

၁။ ဒုတိယအကြိမ် ပြည်သူ့လွှတ်တော် (၁၂)ကြိမ်မြောက် ပုံမှန်အစည်းအဝေး ဆဋ္ဌမနေ့ကို ၂၀၁၉  ခုနှစ်၊ မေလ ၁၅ ရက်(ဗုဒ္ဓဟူးနေ့) နံနက် ၁၀ နာရီ အချိန်တွင် စတင်ကျင်းပပြီး တက်ရောက်ခွင့်ရှိသူ လွှတ်တော်ကိုယ်စားလှယ်( ၄၃၃ )ဦးအနက် (၃၉၉)ဦး တက်ရောက်သည်။

 

၂။ လွှတ်တော်အစည်းအဝေးတွင် ပြုလုပ်ခဲ့သည့် ဆောင်ရွက်ချက်များမှာ အောက်ပါအတိုင်း ဖြစ်ပါသည်-

 

( က ) ကြယ်ပွင့်ပြမေးခွန်း(၇)ခုမေးမြန်းဖြေကြားခြင်း

 

(၁) ဒေါ်တင်တင်ရီ၊ ကျွန်းစုမဲဆန္ဒနယ်က မေးမြန်းသော တနင်္သာရီမြို့နယ်၊ မောတောင် မြို့နယ်ခွဲရှိ မြန်မာ-ထိုင်း ကုန်သွယ်ရေး နယ်စပ်ဂိတ်စခန်းအား ယာယီအထူးဂိတ် အခန်းအဖြစ်မှ အမြဲတမ်းကုန်သွယ်မှု ဂိတ်စခန်းအဖြစ် အဆင့်တိုးမြှင့်ဖွင့်လှစ်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဉီးအောင်ထူးက နှစ်နိုင်ငံနယ်နိမိတ်အား စနစ်တကျ တိုင်းတာသတ်မှတ်ပြီး နယ်စပ်ဖြတ်သန်းသွားလာရေးဆိုင်ရာ သဘောတူညီချက် စာချုပ်တွင် ဖြည့်စွက်လက်မှတ်ရေးထိုးပြီးပါက မောတောင်စခန်းကို တရားဝင် အမြဲတမ်းကုန်သွယ်ရေးစခန်းအဖြစ် အဆင့်တိုးမြှင့်ဖွင့်လှစ်ပေးသွားနိုင်ပါကြောင်း ပြန်လည်ဖြေကြားခဲ့သည်။

 

(၂) ဦးလဂန်ဇယ်ဂျုံး၊ ဝိုင်းမော်မဲဆန္ဒနယ်က မေးမြန်းသော ဝိုင်းမော်မြို့နယ်ရှိ ကန်ပိုင်တီ နယ်စပ်ကုန်သွယ်ရေးစခန်းရုံးကို လက်ရှိထက် ဝန်ဆောင်မှု ပေးနိုင်ရန်အတွက် လိုအပ်သော အခြေခံအဆောက်အဉီများ၊ ဝန်ထမ်းအိမ်ရာများ၊ ကုန်တင်ယာဉ်ကြီးများ ရပ်နားစခန်း၊ ကုန်သိုလှောင်ရုံများ၊ ကတ္တားများ၊ စစ်ဆေးရေးကိရိယာ(X-Ray) စသည်ဖြင့် အခြားလိုအပ်သည်များကို တိုးမြှင့်တည်ဆောက်ရန်   အစီအစဉ် ရှိ၊ မရှိ မေးခွန်းနှင့်စပ်လျဉ်း၍ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဉီးအောင်ထူးက ဝန်ကြီးဌာနအနေဖြင့် ကန်ပိုက်တီနယ်စပ်ကုန်သွယ်ရေး စခန်းတွင် လုပ်ငန်းလိုအပ်ချက်အပေါ်မူတည်၍ လိုအပ်သည်များကို ဖြည့်ဆည်း ဆောင်ရွက် ပေးသွားမည်ဖြစ်ပါကြောင်း ပြန်လည်ဖြေကြား ခဲ့သည်။

                  

(၃) ဒေါက်တာဉီးသန်းအောင်စိုး၊ မင်းလှမဲဆန္ဒနယ်က မေးမြန်းသော ဆန်စက်များမှ ဘေးထွက်ပစ္စည်းအဖြစ် ထွက်ရှိလာသော ဖွဲနုကို အကျိုးရှိအောင် သုံးစွဲရန် မည်သို့စီစဉ်ထားပြီး ဖွဲနုဆီစက်အဟောင်းများကို မည်ကဲ့သို့ဆောင်ရွက်နေသည်နှင့် ဖွဲနုဆီ စက်အသစ်များ တည်ဆောက်ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဉီးအောင်ထူး က ဖွဲနုဆီစက်အသစ်များကို နိုင်ငံပိုင်လုပ်ငန်းအနေဖြင့် တည်ဆောက်ရန် အစီအစဉ် မရှိသော်လည်း ပြည်ပမှစားသုံးဆီတင်သွင်းမှုကို လျော့ကျစေပြီး ကျန်းမာရေးအတွက် အကျိုးရှိမည့်ဖွဲ့နုဆီများကို ပြည်သူများစားသုံးလာနိုင်စေရန် နှင့် မွေးမြူရေးလုပ်ငန်းများ အတွက် တိုးတက်လိုအပ်လာသည့် တိရစ္ဆာန်အစားအစာရရှိလာရန် ပုဂ္ဂလိကကဏ္ဍ၏ ဖွဲနုဆီစက်များကို အားပေးလျက်ရှိပါကြောင်း ပြန်လည်ဖြေကြားခဲ့သည်။

 

(၄) ဦးဦးထွန်းဝင်း၊ ကျောက်တော်မဲဆန္ဒနယ်က မေးမြန်းသော  ကျောက်တော်မြို့နယ်၊ အပေါက်ဝကျွေးရွာ ကမ်းပြိုမှုအန္တရာယ်အား တားဆီး ကာကွယ် ရန် ထိရောက်သည့် နည်းလမ်းများကို စနစ်တကျ သုတေသနပြုဆောင်ရွက်ပေးနိုင်ခြင်း ရှိ၊ မရှိ မေးခွန်း နှင့်စပ်လျဉ်း၍ ပို့ဆောင်ရေးနှင့် ဆက်သွယ်ရေး ဝန်ကြီးဌာန ဒုတိယဝန်ကြီး ဉီးကျော်မျိုးက အပေါက်ဝကျေးရွာရေလမ်းကို နှစ်စဉ်စောင့်ကြည့်၍ တိုင်းတာမှုများ ပြုလုပ်လျက် ရှိပြီး ပြောင်းလဲမှုများအပေါ် မည်ကဲ့သို့ ထိရောက်စွာ ဆောင်ရွက်သွားသင့်သည်ကို လေ့လာစိစစ်၍ ဆောင်ရွက်ပေးသွားမည် ဖြစ်ပါကြောင်း  ပြန်လည်ဖြေကြားခဲ့သည်။

 

(၅) ဦးထွန်းမြင့်၊ ဗဟန်းမဲဆန္ဒနယ်က မေးမြန်းသော ဗဟန်းမြို့နယ်၊ ရွှေဂုံတိုင်လမ်းမကြီး၊ ဉီးချစ်မောင်လမ်းမ၊ တက္ကသိုလ်ရိပ်သာလမ်းနှင့် တချို့ လမ်းများ၏ လူသွားစြင်္ကံပေါ်တွင် ပိတ်ဆို့တည်ဆောက်ထားသော ဆက်သွယ်ရေးပုံးများ(Network Boxes) ကိုပြောင်းရွှေ့ ပေးရန်နှင့် ရှုပ်ထွေးစွာတပ်ဆင်ထားသော ဆက်သွယ်ရေးကြိုးများ၊ ယိုင်လဲနေသော ဆက်သွယ်ရေးတိုင်များကို စနစ်တကျပြုပြင်တပ်ဆင်ပေးရန်  အစီအစဉ်ရှိ၊ မရှိ မေးခွန်းနှင့်စပ်လျဉ်း၍ ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဉီးကျော်မျိုးက ဗဟန်းမြို့နယ်အတွင်းတွင် မြန်မာ့ဆက်သွယ်ရေး လုပ်ငန်းက (MSAN) အိတ်ချိန်း စက်ပစ္စည်းအသစ်များဖြင့် အစားထိုးလဲလှယ် တပ်ဆင်ခြင်းလုပ်ငန်းကို စနစ်တကျကြီးကြပ်ဆောင်ရွက်စေခြင်း၊ ဆက်သွယ်ရေး ညွှန်ကြားမှုဉီးစီးဌာနက ငှားရမ်းဆောင်ရွက်လျက်ရှိသော ပြင်ပကျွမ်းကျင်သူအဖွဲ့၏ စစ်ဆေးတွေ့ရှိချက်များ အပေါ်မူတည်၍ ဆက်သွယ်ရေးဝန်ဆောင်မှု လိုင်စင်ရကုမ္ပဏီများသို့ ညွှန်ကြား ဆောင်ရွက်စေခြင်းနှင့် ရန်ကုန်တိုင်းဒေသကြီးအစိုးရအဖွဲ့က ဉီးဆောင်၍ စီစဉ် ဆောင်ရွက်လျက်ရှိသောလုပ်ငန်းများ ဆောင်ရွက်ပြီးစီးပါက ဆက်သွယ်ရေးတိုင်များ စိုက်ထူခြင်း၊ ကောင်းကင်ကေဘယ်ကြိုးသွယ်တန်းခြင်းများ လျော့နည်းသွားမည် ဖြစ်ပါသဖြင့် ဗဟန်းမြို့နယ်နှင့် ရန်ကုန်မြို့တော်စည်ပင်သာယာ နယ်နိမိတ်အတွင်း ဆက်သွယ်ရေးကေဘယ်ကြိုး ရှုပ်ထွေးမှုများ လျော့နည်းသွားမည်ဖြစ်ပါကြောင်း ပြန်လည်ဖြေကြားခဲ့သည်။

 

(၆) ဦးမြတ်လေးဉီး၊ ထီးလင်းမဲဆန္ဒနယ်က မေးမြန်းသော ထီးလင်းမြို့နယ်အတွင်းရှိ ဂန့်ဂေါ-ရေမျက်နီ-ပုလဲ ပဆငလမ်းနှင့် ကျောချောင်း-မျက်မြောင်သို့ ဆက်သွယ် ထားသောလမ်းပေါ်ရှိ စစ်ရှီးချောင်းကူး ကွန်ကရစ်တံတား(၁၄ x ၈၀) ပေအား ကျေးရွာ လမ်းကူးတံတားအဖြစ် အသုံးပြုခွင့်ပေးရန် အစီအစဉ် ရှိ၊ မရှိ မေးခွန်းနှင့် စပ်လျဉ်း၍ ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဉီးကျော်မျိုးက ဂန့်ဂေါ-ရေမျက်နီ-ပုလဲကားလမ်းနှင့် မျက်မြောင်ဘူတာနှင့် ရေမျက်နီဘူတာသို့ ဆက်သွယ်ထားသော ရထားလမ်းပေါ်ရှိ စစ်ရှီးချောင်းကူးမီးရထား ကွန်ကရစ် တံတားကို ကျေးရွာကားလမ်းကူးတံတားအဖြစ် အသုံးပြုခွင့်ပေးနိုင်ပါကြောင်း ပြန်လည်ဖြေကြားခဲ့သည်။

 

(၇) ဦးအောင်ကျော်ဟိန်း၊ တနင်္သာရီမဲဆန္ဒနယ်က မေးမြန်းသော ရေကြီးရေလျှံမှုကြောင့် နှစ်စဉ်နီးပါး ရေကြီးနစ်မြုပ်လေ့ရှိသော ရေထိန်းတံခါး (၂) ခု၊ ရွာလုံးကျွတ် ပြောင်းရွှေ့ နေရသော ကျေးရွာများအတွက် Cyclone Shelter များ၊ အရေးပေါ်ကယ်ဆယ်ရေး ဆောင်ရွက်နိုင်ရန် Speed Boat (၁)စီး၊ စားနပ်ရိက္ခာများ ပို့ဆောင်ရေးအတွက် ဝန်တင်လှေ(၂)စီး ခွင့်ပြုပေးရန်နှင့် တနင်္သာရီမြစ်ကြောင်း ရှင်းလင်းရေး အစီအမံနှင့် မြစ်ကြောင်းရှင်းလင်းရေးကို ပုဂ္ဂလိက ကုမ္ပဏီများအား ခွင့်ပြုပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယ ဝန်ကြီး ဉီးကျော်မျိုးက တနင်္သာရီမြစ်ကြောင်း ရှင်းလင်းရေးအစီအမံများကို တိုင်းတာရေးလုပ်ငန်းများ ဆောင်ရွက်ပြီးမှသာ ရေးဆွဲနိုင်မည်ဖြစ်ပါကြောင်းနှင့် မြစ်ကြောင်းရှင်းလင်းရေးကို ပုဂ္ဂလိကကုမ္ပဏီများအား ခွင့်ပြုပေးနိုင်ခြင်း ရှိ၊ မရှိ ဆိုသည်မှာ သက်ဆိုင်ရာဝန်ကြီးဌာနများ၏ သဘောထားများရယူပြီးနောက် တိုင်းဒေသကြီး အစိုးရအဖွဲ့၏ ထောက်ခံချက်နှင့်အတူ ပြည်ထောင်စုအစိုးရအဖွဲ့၊ စီးပွားရေးရာကော်မတီမှတစ်ဆင့် ပြည်ထောင်စုအစိုးရအဖွဲ့အစည်းအဝေးသို့ တင်ပြ၍ ခွင့်ပြုချက်ရရှိမှသာ ဆက်လက်ဆောင်ရွက်နိုင်မည်ဖြစ်ပါကြောင်း ပြန်လည်ဖြေကြား ခဲ့သည်။

 

( ခ )  ဥပဒေကြမ်း (၁) ခုနှင့် စပ်လျဉ်း၍ လွှတ်တော်၏ အဆုံးအဖြတ်ရယူခြင်း

ပညာရေးဝန်ကြီးဌာနက တင်သွင်းသည့် အခြေခံပညာရေးဉပဒေကြမ်း တစ်ရပ်လုံးကို ပြင်ဆင်ထားသည့် အပိုဒ်၊ အပိုဒ်ခွဲများအတိုင်း အတည်ပြုကြောင်းနှင့် ၂၀၁၃ ခုနှစ်၊ ပြည်သူ့လွှတ်တော်ဆိုင်ရာ နည်းဉပဒေ ၁၉၁ အရ ဆက်လက်ဆောင်ရွက်သွားမည် ဖြစ်ကြောင်း ကြေညာခဲ့သည်။

 

(ဂ) အဆို (၁) ခု တင်သွင်းခြင်း

အခြေခံပညာမူလတန်းသင်ဆရာ၊ ဆရာမ ဝန်ထမ်းရွေးချယ်ခန့်ထားရာတွင် တိုင်းရင်းသား ဒေသကျေးရွာ ကျောင်းများ၏ လိုအပ်ချက်အလိုက် ထိုဒေသခံကျေးရွာရှိ ဘွဲ့ရတိုင်းရင်းသား၊ သူများကို ဉီးစားပေးခန့်အပ်ရေး မူဝါဒတစ်ရပ် ထည့်သွင်းချမှတ် အကောင်အထည် ဖော်ပေးပါရန် ပြည်ထောင်စုအစိုးရသို့ တိုက်တွန်းကြောင်းအဆိုကို ဉီးဉာဏ်ဟိန်း၊ သံဖြူဇရပ်မဲဆန္ဒနယ်က တင်သွင်းပြီး ၊ ဉီးမြင့်ဝေ၊ ဂွမဲဆန္ဒနယ်က ထောက်ခံခဲ့သည်။ အဆိုအား ဆက်လက်ဆွေးနွေးရန် လွှတ်တော်က ဆုံးဖြတ်ခဲ့သဖြင့် ဆွေးနွေးလိုသော လွှတ်တော်ကိုယ်စားလှယ်များက ၁၆-၅-၂၀၁၉ ရက် (ကြာသပတေးနေ့) ညနေ ၄နာရီ နောက်ဆုံးထား၍ အမည်စာရင်း တင်သွင်းရန်ဖြစ်သည်။

 

(ဃ) အဆို (၁) ဆွေးနွေးခြင်းနှင့် လွှတ်တော်၏ အဆုံးအဖြတ်ရယူခြင်း

ဒေါ်ချိုချို၊ အုတ်တွင်းမဲဆန္ဒနယ်က တင်သွင်းသည့် ပြည်တွင်းစက်မှုလက်မှုလုပ်ငန်းများ ဖွံ့ဖြိုးတိုးတက်စေရန်အတွက် ရင်းနှီးမြှုပ်နှံမှု မူဝါဒများကို ပြန်လည်သုံးသပ်ပြီး Global Supply Chainတွင် ပြည်တွင်းထုတ်လုပ်မှုများ အချိုးအစားတစ်ခုအဖြစ်ပါဝင်နိုင်စေရေး နှင့် လိုအပ်သောငွေကြေး နည်းပညာအထောက်အပံ့များရရှိစေရေး ကူညီဆောင်ရွက် ပေးရန် နိုင်ငံတော်အစိုးရအား တိုက်တွန်းကြောင်းအဆိုကို လွှတ်တော်ကိုယ်စားလှယ် (၃)ဦးက ဆွေးနွေးပြီး အဆိုအား လွှတ်တော်က အတည်ပြုကြောင်း ဆုံးဖြတ်ခဲ့သည်။

 

၃။ ပြည်သူ့လွှတ်တော် အစည်းအဝေးကို နေ့လယ် ၁၂ နာရီ ၅၅ မိနစ်တွင် ရပ်နားပြီး ဒုတိယအကြိမ် ပြည်သူ့လွှတ်တော် (၁၂) ကြိမ်မြောက် ပုံမှန် အစည်းအဝေး သတ္တမနေ့ကျင်းပမည့်ရက်ကို ၁၇-၅-၂၀၁၉ ရက်(သောကြာနေ့)  နံနက် ၁၀ နာရီတွင် လျာထားပါသည်။